Ani Ohiɛ Sɔɔ Krɔŋkrɔŋ Nibii?
1 Kɛ abi wɔ koni wɔkɛɛ kɛji akɛ wɔhiɛ sɔɔ krɔŋkrɔŋ nibii lo lɛ, ekolɛ wɔkɛ oyaiyeli baakɛɛ akɛ hɛɛ! Mɛni ji krɔŋkrɔŋ nibii ni Nyɔŋmɔ kɛha ni wɔhiɛ sɔɔ lɛ ekomɛi?
2 Kwɛ bɔ ni wɔbuɔ wɔkɛ wɔŋwɛi Tsɛ lɛ teŋ wekukpaa ni ahaa wɔkɛ lɛ náa lɛ akɛ nɔ ko ni jara wa waa diɛŋtsɛ! Emaa nɔ mi kɛhaa wɔ akɛ kɛ́ ‘wɔbɛŋkɛ lɛ lɛ, ebaatsi ebɛŋkɛ wɔ.’ (Yak. 4:8) Eji Yesu Kristo kpɔmɔ afɔleshaa lɛ bɛ kulɛ, gbɔmɔ ko gbɔmɔ ko kwraa naŋ naanɔ wala. (Yoh. 3:16) Wɔjieɔ anɔkwa shidaa kpo gbi fɛɛ gbi yɛ sɔlemɔ mli akɛ wɔhiɛ esɔ nɛkɛ nikeenii ni jɛ Nyɔŋmɔ ŋɔɔ nɛɛ waa diɛŋtsɛ akɛ nɔ ni jara wa.
3 Nyɔŋmɔ Wiemɔ ni jɛ mumɔŋ ni ji Ŋmalɛ Krɔŋkrɔŋ lɛ hu yɛ krɔŋkrɔŋ kɛha wɔ taakɛ Yehowa shikpɔŋ nɔ gbɛjianɔtoo lɛ ji pɛpɛɛpɛ lɛ. Wɔjieɔ hiɛsɔɔ ni sa kpo wɔtsɔɔ nibii ni jɛ Yehowa ŋɔɔ nɛɛ kɛ́ wɔhi shi yɛ Biblia mli shishitoo mlai anaa, ní wɔha nyɛmimɛi asuɔmɔ mli ekomefeemɔi lɛ amli wa, ní wɔkɛ teokrase gbɛjianɔtoo tsu nii jogbaŋŋ, ní wɔkɛ mɛi ni nyiɛɔ hiɛ lɛ fee ekome lɛ.—1 Pet. 1:22.
4 Wɔnine shɛɔ mumɔŋ niyenii babaoo nɔ kɛtsɔɔ tsulɔ anɔkwafo kɛ nilelɔ lɛ nɔ. Nakai ji bɔ ni ebaaba lɛ yɛ “Nyɔŋmɔ Wiemɔ lɛ Nɔyelɔi” Kpokpaa Wulu nɔ Kpee lɛ shishi. Jɛmɛ ji he ni wɔnine baashɛ nitsɔɔmɔ ni he hiaa nɔ yɛ ni wɔná naanyobɔɔ ni yɔɔ miishɛɛ ni he hiaa wɔ amrɔ nɔŋŋ lɛ mli ŋɔɔmɔ. Te wɔɔfee tɛŋŋ wɔtsɔɔ hiɛsɔɔ ni jɛ wɔtsuiŋ kɛha krɔŋkrɔŋ nibii ni akɛhaa nɛɛ?
5 Kaakwa Yehowa We Lɛ: Nehemia wo mɛi ni etsu nii waa kɛtswa Yerusalem gbogboi lɛ ekoŋŋ lɛ ŋaa ‘koni amɛkakwa amɛ-Nyɔŋmɔ lɛ we lɛ.’ (Neh. 10:40) Ŋmɛnɛ, Yehowa “we” lɛ ji gbɛjianɔ ni eto kɛha jamɔ. Wɔ kpokpaa wulu nɔ kpeei lɛ ji nakai gbɛjianɔ ni ato lɛ fã. Akɛni esaaa akɛ wɔkwaa gbɛjianɔ ni ato nɛɛ hewɔ lɛ, esa akɛ wɔya jɛmɛ ni wɔbo sane toi jogbaŋŋ, ní wɔtsɔɔ Yehowa akɛ wɔbuɔ nibii ni ekɛhaa lɛ akɛ nɔ ni jara wa waa diɛŋtsɛ. (Heb. 10:24, 25) Mɛɛ gbɛjianɔ esa akɛ wɔto amrɔ nɛɛ ni wɔkɛtsɔɔ akɛ wɔhiɛ sɔɔ nifeemɔ ni yɔɔ krɔŋkrɔŋ nɛɛ jogbaŋŋ?
6 Yaa Gbii Etɛ lɛ Fɛɛ: Esa akɛ mɔ fɛɛ mɔ ato gbɛjianɔ koni eya kpee lɛ gbii etɛ lɛ fɛɛ. Ani ooto gbɛjianɔ koni oya jɛmɛ mra gbi fɛɛ gbi koni ohi jɛmɛ aahu kɛyashi naagbee sɔlemɔ lɛ yɛ Hɔgbaa mli? Kɛ nakai ni lɛ, no lɛ obaaná jɔɔmɔi babaoo. Ekolɛ kpee ni obaaya daa lɛ efeŋ mlɛo. Ekolɛ oheloonaa nitsumɔ ni oootsake mli lɛ baabi koni okɔ shidaamɔ ni yɔɔ shiŋŋ. Ekolɛ jeee be fɛɛ be tsɔne taomɔ baafee mlɛo. Shi kaaha nibii nɛɛ eko je onijiaŋ wui kɛmiijɛ kpee lɛ ni oooya lɛ he.
7 Susumɔ Nɔkwɛmɔnii ni Nɔ Bɛ Nɛɛ He Okwɛ: Beni nyɛmimɛi akuu ko ni yɔɔ Afrika maŋ ko ni maŋ basabasafeemɔ yaa nɔ yɛ jɛmɛ lɛ nyiɛ gbɛ kɛyaa kpokpaa wulu nɔ kpee ko nyɛsɛɛ afi lɛ, amɛkɛ asraafoi akuu ko kpe. Abi nyɛmimɛi lɛ akɛ: “Namɛi ji nyɛ, ni nɛgbɛ nyɛyaa?” Amɛha hetoo akɛ: “Yehowa Odasefoi ji wɔ, ni wɔmiiya kpokpaa wulu nɔ kpee lɛ.” Asraafoi lɛ ateŋ mɔ kome wie akɛ: “Nyɛ Yehowa Odasefoi lɛ, nyɛsheee nɔ ko nɔ ko gbeyei. Nyɛ lɛ, nyɛyaa ni nyɛbaanyɛ nyɛfee nyɛ kpee lɛ ni nyɛnaŋ naagba ko kwraa. Shi kɛlɛ, nyɛhiɛ ahia nyɛhe nɔ akɛ nyɛkɛ asraafoi babaoo baakpe. Nyɛnyiɛa gbɛ lɛ teŋ be fɛɛ be! Kɛ nyɛna akɛ mɛi babaoo ebua amɛhe naa lɛ, nyɛnyiɛa gbɛ lɛ teŋ lolo!” Amɛfee nakai, ni amɛyashɛ kpee lɛ shishi shweshweeshwe. Awo nɛkɛ nyɛmimɛi nɛɛ anyɔmɔ ejaakɛ amɛtsɔɔ hiɛsɔɔ ni amɛyɔɔ kɛha mumɔŋ nibii.
8 Taakɛ wɔnyɛmimɛi ni yɔɔ Afrika hei komɛi lɛ ji lɛ, wɔ hu wɔkɛ kaai kpeɔ. Shi ŋwanejee ko kwraa bɛ he akɛ wɔbaanyɛ wɔkase amɛhemɔkɛyeli lɛ ni wɔtswa wɔfai shi akɛ wɔbaaya wɔ kpokpaa wulu nɔ kpee lɛ kɛha wiemɔi lɛ fɛɛ toiboo. Kɛ ehe miihia ni ofee tsakemɔi lɛ, kwɛmɔ Yehowa gbɛ kɛha gbɛtsɔɔmɔ yɛ be mli ni ole akɛ ebaajɔɔ mɔdɛŋ ni wɔbɔɔ koni wɔyabo wiemɔi lɛ fɛɛ toi lɛ.
9 Ná Emli Jɔɔmɔi Lɛ: Wɔmiishwe koni wɔnine ashɛ Nyɔŋmɔ Wiemɔ lɛ nɔ yɛ be mli ni wɔle akɛ wɔbaanyɛ wɔdara kɛya yiwalaheremɔ mli kɛtsɔ no nɔ lɛ. (1 Pet. 2:2) Kpokpaa wulu nɔ kpee lɛ ni wɔɔya ni wɔbo wiemɔ he gbɛjianɔtoo lɛ toi lɛ baaye abua wɔteŋ mɔ fɛɛ mɔ koni wɔtswa hemɔkɛyeli ni mli wa waa wɔma shi yɛ nakai Wiemɔ lɛ mli koni wɔfee mɛi ni nyɛɔ amɛdamɔɔ Satan tutuamɔi ni naa wa waa lɛ anaa. Yɛ nakai feemɔ mli lɛ, wɔbaatsɔɔ Yehowa kɛ mɛi fɛɛ ni kwɛɔ enɛ lɛ akɛ wɔhiɛ sɔɔ krɔŋkrɔŋ nibii waa diɛŋtsɛ, ni ‘wɔjeee mɛi ni kpaleɔ kɛyaa shi moŋ wɔji mɛi ní kɛ hemɔkɛyeli náa amɛsusuma yiwalaheremɔ lɛ ateŋ mɛi komɛi.’—Heb. 10:39; 12:16; Abɛi 27:11.
10 Wɔbaanyɛ wɔkwɛ Yehowa Nyɔŋmɔ gbɛ koni egbele ŋwɛi samfɛji lɛ anaa ni enɛ mumɔŋ jɔɔmɔi babaoo eshwie wɔnɔ. (Mal. 3:10) Ha efee oti ni ma ohiɛ akɛ ooohi “Nyɔŋmɔ Wiemɔ lɛ Nɔyelɔi” Kpokpaa Wulu nɔ Kpee lɛ shishi kɛjɛ Sohaa leebi wiemɔ lɛ shishijee tɔ̃ɔ kɛyashi Hɔgbaa shwane naagbee sɔlemɔ kɛ “Amen!” lɛ nɔ. Omii baashɛ ohe akɛ ofee nakai!