“Te Mafee Tɛŋŋ . . . akɛ Ja Mɔ ko Tsɔɔ Mi?”
1 Beni sanekpakpa jajelɔ Filipo bi Etiopia piafonyo lɛ akɛ enuɔ nɔ ni ekaneɔ yɛ Nyɔŋmɔ Wiemɔ lɛ mli lɛ shishi lo lɛ, nuu lɛ ha hetoo akɛ: “Te mafee tɛŋŋ ni manyɛŋ, akɛ ja mɔ ko tsɔɔ mi?” Filipo kɛ miishɛɛ ye ebua lɛ koni enu Yesu he sanekpakpa lɛ shishi, ni enɛ ha abaptisi nuu lɛ amrɔ nɔŋŋ. (Bɔf. 8:26-38) No mli lɛ, nɔ ni Filipo kɛtsuɔ nii ji famɔ ni Kristo kɛha akɛ ‘afee maji fɛɛ amli mɛi lɛ kaselɔi, ní abaptisi amɛ ni atsɔɔ amɛ nii lɛ.’—Mat. 28:19, 20.
2 Esa akɛ wɔkɛ famɔ ni akɛha koni afee kaselɔi lɛ atsu nii, taakɛ Filipo fee lɛ. Shi kɛlɛ, bei pii lɛ, gbɔmɛi ni wɔkɛ amɛ kaseɔ Biblia lɛ jeee mɛi ni náa mumɔŋ hiɛyaa ni baa oyayaayai nɛɛ tamɔ bɔ ni Etiopia piafonyo lɛ ná nɔyaa lɛ. Nakai nuu ni eji mɔ ko ni atsake lɛ awo Yuda jamɔ mli lɛ le Ŋmalɛi lɛ jogbaŋŋ, ni eyɛ tsui ni kpɛlɛɔ sane nɔ, ni nɔ̃ pɛ ni he hiaa ni eshwɛ kɛkɛ ji ní ekpɛlɛ nɔ akɛ Yesu ji Mesia ni awo shi yɛ ehe lɛ. Ebafeɔ kaa, kɛ́ mɛi ni wɔkɛ amɛ kaseɔ nii lɛ bɛ Biblia lɛ he nilee, ní akɛ apasa jamɔŋ tsɔɔmɔi elaka amɛ, aloo amɛ diɛŋtsɛ amɛnaagbai ni naa wa etsɔ jatsu kɛha amɛ lɛ. Mɛni baaye ebua wɔ koni wɔye omanye yɛ Biblia mli nikaselɔi ni wɔtsɔɔ amɛ gbɛ kɛyaa henɔjɔɔmɔ kɛ baptisimɔ mli lɛ?
3 Kwɛmɔ Koni Ole Biblia Mli Nikaselɔ lɛ Mumɔŋ Hiamɔ Nii: Nɔ ni aŋma ahɔ August 1998 Wɔ Maŋtsɛyeli Sɔɔmɔ lɛ mli lɛ wie be ni wɔkɛbaatsu nii koni wɔkɛ mɛi akase nii yɛ be mli ni wɔkɛ Taoɔ wolo bibioo kɛ Nilee wolo lɛ tsuɔ nii lɛ he sane. Gbɛtsɔɔmɔ ni ekɛha ji akɛ: “Ehe miihia ni wɔle bɔ ni nikasemɔ lɛ yaa nɔ ehaa yɛ nikaselɔ lɛ shihilɛi kɛ nyɛmɔ ni eyɔɔ yɛ nikasemɔ mli lɛ naa. . . . Wɔsumɔɔɔ ni wɔtsĩɔ shishinumɔ ni yɔɔ faŋŋ ni nikaselɔ lɛ baaná lɛ naa yɛ oyai ni wɔyeɔ hewɔ. Ehe miihia ni nikaselɔi fɛɛ aná shishitoo ni wa yɛ hemɔkɛyeli hee ni ená yɛ Nyɔŋmɔ Wiemɔ lɛ mli lɛ mli.” No hewɔ lɛ, nilee yɛ mli akɛ awoŋ Nilee wolo lɛ mli nii ni akaseɔ lɛ foi kɛ jwɛŋmɔ lɛ akɛ aabɔ mɔdɛŋ ni agbe wolo lɛ naa yɛ nyɔji ekpaa mli. Ekolɛ ebaabi ni akɛ nɔ ni fa fe nyɔji ekpaa aye abua aŋkroaŋkroi komɛi kɛyashi beni aaabaptisi amɛ. Yɛ be mli ni okwɛɔ nikasemɔ lɛ nɔ otsi fɛɛ otsi lɛ, okɛ be fɛɛ be ni he hiaa lɛ aye abua nikaselɔ lɛ koni enu nɔ ni ekaseɔ kɛjɛɔ Nyɔŋmɔ Wiemɔ lɛ mli lɛ shishi ni ekpɛlɛ nɔ. Yɛ shihilɛi komɛi amli lɛ, ekolɛ otsii enyɔ loo etɛ he baahia koni akɛgbe yitso kome naa yɛ Nilee wolo lɛ mli. Enɛ baaha aná be koni akane ŋmalɛi babaoo ni aŋmalako amɛmli wiemɔi lɛ koni atsɔɔ mli.—Rom. 12:2.
4 Shi kɛlɛ, kɛ́ agbe Nilee wolo lɛ naa ni oyɔse akɛ ehe miihia ni aha shishinumɔ ni nikaselɔ lɛ yɔɔ yɛ anɔkwale lɛ he lɛ aya hiɛ jogbaŋŋ, aloo nɔ ko tsirɛɛɛ lɛ lolo akɛ ekɔ shidaamɔ yɛ anɔkwale lɛ he ni ejɔɔ ewala nɔ eha Nyɔŋmɔ hu? (1 Kor. 14:20) Mɛni ekoŋŋ obaanyɛ ofee koni okɛtsɔɔ lɛ gbɛ kɛyi wala gbɛ lɛ nɔ?—Mat. 7:14.
5 Tsu Biblia Mli Nikaselɔ lɛ Mumɔŋ Hiamɔ Nii Ahe Nii: Kɛ eyɛ faŋŋ akɛ mɔ ko miiya ehiɛ, tsɛbelɛ eyɛ shɔ̃ɔ, ní eená hiɛsɔɔ kɛmiiha nɔ ni ekaseɔ lɛ, no lɛ okɛ wolo ni ji enyɔ atsá Biblia mli nikasemɔ lɛ nɔ, kɛ́ agbe Taoɔ wolo bibioo lɛ kɛ Nilee wolo lɛ naa. Ekolɛ enɛ he ebahiaŋ yɛ shihilɛ fɛɛ shihilɛ mli, shi kɛ́ ehe miihia lɛ, okɛ True Peace wolo lɛ, Ekome ni Afee Kɛmiija wolo lɛ, aloo God’s Word wolo lɛ atsá nikasemɔ lɛ nɔ. Shiɛlɔi babaoo diɛŋtsɛ yɛ woji nɛɛ eko ni amɛkɛbaatsu nii kɛ́ eko bɛ asafo lɛ mli. Abaanyɛ ashɛ nɛkɛ woji nɛɛ fioo ko kɛjɛ Asafo lɛ dɛŋ. Yɛ shihilɛi fɛɛ mli lɛ, abaakase Taoɔ wolo bibioo lɛ kɛ Nilee wolo lɛ klɛŋklɛŋ. Esa akɛ aŋma Biblia mli nikasemɔ, sɛɛsaramɔi, kɛ be ni ayeɔ kɛtsáa nikasemɔ lɛ nɔ lɛ koni akɛbu shiɛmɔ nitsumɔ lɛ he akɔntaa, kɛ́ abaptisi nikaselɔ lɛ dani akɛ lɛ gbe wolo ni ji enyɔ lɛ kasemɔ naa po.
6 Ani enɛ tsɔɔ akɛ agbɛnɛ esa akɛ akɛ yelikɛbuamɔ ekoŋŋ aha mɛi ni abaptisi amɛ nyɛsɛɛ nɛɛ ni akɛ amɛ kase wolo kome pɛ lɛ koni akɛ amɛ akase wolo ni ji enyɔ lɛ? Jeee nakai tsɔ̃. Shi kɛlɛ, ekolɛ amɛkpa shiɛmɔyaa loo ekolɛ amɛyaaa hiɛ yɛ anɔkwale lɛ mli, ni ekolɛ amɛbaanu he akɛ ehe miihia ni aye abua amɛ koni amɛkɛ anɔkwale lɛ atsu nii jogbaŋŋ diɛŋtsɛ yɛ amɛshihilɛi amli. Esa akɛ ayana sɔɔmɔ nitsumɔ nɔkwɛlɔ lɛ dani asaa akɛ shiɛlɔ ko ni abaptisi lɛ lɛ aje nikasemɔ shishi ekoŋŋ. Shi kɛlɛ, kɛ́ ole mɛi komɛi ni be ko ni eho lɛ, amɛkase Nilee wolo lɛ, shi amɛyaaa amɛhiɛ kwraa bɔ ni amɛaajɔɔ amɛhe nɔ koni abaptisi amɛ lɛ, ekolɛ obaasumɔ ni otsɔ hiɛ oyana amɛ akɛ amɛbaasumɔ ni amɛje amɛ Biblia mli nikasemɔ lɛ shishi ekoŋŋ lo.
7 Eji Kristofoi asuɔmɔ he kadimɔnii akɛ wɔkɛ yelikɛbuamɔ ni mli wa aaaha mɔ fɛɛ mɔ ni wɔkɛ lɛ kaseɔ nii lɛ. Yiŋtoo lɛ ji koni wɔye wɔbua nikaselɔ lɛ koni ená nilee ni fa babaoo yɛ anɔkwale ni yɔɔ Nyɔŋmɔ Wiemɔ lɛ mli lɛ mli. Kɛkɛ lɛ, ebaanyɛ ekɔ shidaamɔ kpakpa ni nilee yɔɔ mli yɛ anɔkwale lɛ he ni ejɔɔ ewala nɔ eha Yehowa, ní ekɛ nu mli baptisimɔ afee nakai henɔjɔɔmɔ lɛ he okadi.—Lala 40:9; Efe. 3:17-19.
8 Ani okaiɔ nɔ ni ba beni abaptisi Etiopia piafonyo lɛ sɛɛ? “Eyi gbɛ kɛ nyamɔ” akɛ Yesu Kristo kaselɔ hee. (Bɔf. 8:39, 40) Eba akɛ wɔ kɛ mɛi ni wɔkɛ gbɛtsɔɔmɔ haa amɛ yɛ omanyeyeli mli yɛ anɔkwale gbɛ lɛ nɔ lɛ aaaná mlifilimɔ kpeteŋkpele yɛ Yehowa Nyɔŋmɔ sɔɔmɔ mli—kɛjɛ amrɔ nɛɛ kɛyashi naanɔ!