“Nyɛhaa Afea Fɛɛ Bɔ ni Mɛi Anane Aaamɔ Shi”
1 Yɛ be mli ni wɔkɛ wɔnyɛmimɛi yeɔ lɛ, esa akɛ wɔfee nɔ ni hi ni baaha amɛnane amɔ shi. Enɛ tsɔɔ akɛ esa akɛ wɔsusu bɔ ni wɔɔfee wɔbu amɛmumɔŋ shihilɛi ahe. Kɛ wɔkɛ wɔhe wo heloonaa nitsumɔ pɔtɛɛ ko ni haa nɔ ko ni afeɔ loo nitsumɔ ko yaa hiɛ lɛ mli lɛ, ehe baahia ni wɔkwɛ jogbaŋŋ ni wɔkafee nɔ ko ni baatɔ̃tɔ̃ wɔnyɛmimɛi anane.—2 Kor. 6:3; Fil. 1:9, 10.
2 Mɛi komɛi kɛ amɛhe ewo jarayeli nitsumɔi srɔtoi amli, ni amɛkɛ nanemɛi Kristofoi lɛ miifee oti ni ma amɛhiɛ akɛ mɛi ni baahe nibii ni amɛfeɔ lɛ. Jarayeli gbɛjianɔtoi komɛi woɔ nitsulɔi ni damɔɔ amɛnajiaŋ amɛhɔ̃ɔ nii amɛhaa amɛ lɛ hewalɛ koni amɛbu mɔ fɛɛ mɔ akɛ mɔ ni baanyɛ ahe nibii ni amɛfeɔ lɛ—ni mɛi ni kɛ amɛ yɔɔ jamɔ kome mli lɛ fata he. Nyɛmimɛi komɛi ebua Odasefoi babaoo anaa kɛ yiŋtoo akɛ amɛaawo amɛ hewalɛ koni amɛkɛ amɛhe awo jarayeli nitsumɔ ko mli. Mɛi krokomɛi hu haa amɛnitsumɔ lɛ yaa hiɛ kɛtsɔ saji ni aŋmala, woji bibii, saji ni yɔɔ Internet lɛ nɔ, loo vidio kpãa kɛ kasɛt kpãa ni amɛwieɔ he amɛtsɔɔ nanemɛi heyelilɔi ni biko enɛɛmɛi ashi lɛ nɔ. Ani eeefee nɔ ni ja akɛ Kristofonyo ko kɛ eteokrase nifeemɔ gbɛ̀i aaatsu nii koni ekɛná emumɔŋ nyɛmimɛi lɛ ahe sɛɛ? Dabi!—1 Kor. 10:23, 24, 31-33.
3 Esa akɛ Nyɛmimɛi Akwɛ Jogbaŋŋ: Enɛ etsɔɔɔ akɛ Kristofonyo nyɛŋ ekɛ nyɛmi ko atsu nitsumɔ ko. Enɛ ji mɔ lɛ diɛŋtsɛ sane. Shi kɛlɛ, mɛi komɛi jeɔ nitsumɔ gbɛjianɔtoi ni woɔ hiɛjoomɔ he hewalɛ lɛ shishi, ni amɛwoɔ nanemɛi heyelilɔi hewalɛ koni amɛbafata amɛhe loo amɛkɛ amɛshika abawo mli. Nɛkɛ nitsumɔi nɛɛ ateŋ babaoo gbeeɔ shi, ni shika babaoo jeɔ mɛi ni kɛ amɛhe wo mli lɛ adɛŋ. Eyɛ mli akɛ ekolɛ suɔmɔ ni ayɔɔ akɛ aaaná shika babaoo yɛ be kukuoo mli lɛ ji nɔ ni tsirɛ mɛi ni kɛ amɛhe wo nitsumɔ lɛ mli lɛ moŋ, shi mɔ ni to he gbɛjianɔ lɛ akasusu akɛ anyɛŋ ashwa lɛ kɛ́ nitsumɔ lɛ gbee shi. Esa akɛ etsɔ hiɛ esusu bɔ ni ebaasa enyɛmimɛi lɛ amumɔŋ kɛ gbɔmɔtsoŋ hilɛ-kɛhamɔ he lɛ he kɛji eeeba lɛ akɛ nitsumɔ lɛ yeee omanye. Esa akɛ mɛi ni teokrase gbɛnaa nii kã amɛnɔ lɛ titri akwɛ jogbaŋŋ yɛ amɛ heloonaa nitsumɔi amli ejaakɛ mɛi krokomɛi baanyɛ ni amɛkɛ bulɛ aha amɛ akɛ mɛi ni amɛkɛ amɛhe fɔ̃ɔ amɛnɔ waa. Ebaafee tɔ̃mɔ akɛ akɛ nakai hekɛnɔfɔɔ lɛ aaatsu nii yɛ gbɛ ni ejaaa nɔ. Hegbɛi kɛha sɔɔmɔ krɔŋkrɔŋ baanyɛ aje nyɛmi ko dɛŋ kɛ́ mɛi krokomɛi náaa bulɛ kɛhaaa lɛ.
4 Esa akɛ oti ni ma wɔhiɛ lɛ afee akɛ, ní ‘wɔɔfee nɔ fɛɛ nɔ bɔ ni aaaha mɛi anane amɔ shi.’ (1 Kor. 14:26) Esa akɛ wɔkwa nɔ fɛɛ nɔ ni wɔbaafee ni baagbala jarayeli nitsumɔ awo asafo lɛ mli loo eha eya hiɛ lɛ. Nibii ni tamɔ nɛkɛ kɔɔɔ wɔ Ŋmalɛ naa yiŋtoi ahewɔ ni wɔkpeɔ kutuu lɛ he kwraa.—Heb. 10:24, 25.