“Nɛgbɛ Maná Be Kɛjɛ?”
1 No ji ŋkɔmɔ ni wɔteŋ mɛi pii yeɔ, ejaakɛ nitsumɔi eyi wɔshihilɛ mli obɔ. Áwie akɛ be ji wɔ sɛɛnamɔi lɛ ateŋ nɔ ni jara wa fe fɛɛ kɛ nɔ ni hoɔ oya fe fɛɛ. No hewɔ lɛ, nɛgbɛ wɔbaaná be yɛ kɛha nibii ni he hiaa diɛŋtsɛ, tamɔ Nyɔŋmɔ Wiemɔ lɛ kanemɔ kɛ ekasemɔ?—Fil. 1:10.
2 Hetoo lɛ jeee ni wɔtao be babaoo, shi moŋ, ní wɔkpɛ wɔyiŋ yɛ nɔ ni wɔsumɔɔ ni wɔfee yɛ be ni wɔyɔɔ lɛ mli lɛ he. Wɔ fɛɛ wɔyɛ ŋmɛlɛtswai 168 daa otsi, ni ekolɛ wɔbaafite emli 100 yɛ wɔɔ kɛ nitsumɔ mli. No hewɔ lɛ, te wɔɔfee tɛŋŋ ni wɔkɛ ŋmɛlɛtswai abɔ ni eshwɛ lɛ atsu nii ni ehe aba sɛɛnamɔ diɛŋtsɛ kɛha wɔ? Efesobii 5:15-17 jieɔ yi akɛ, ‘wɔkanyiɛ tamɔ mɛi ni bɛ yitseiaŋ, shi moŋ tamɔ nilelɔi, ni wɔtsu wɔdekã he nii, ni wɔyoo nii ni ji Nuntsɔ lɛ suɔmɔnaa nii lɛ.’ Enɛ tsɔɔ bɔ ni ehe hiaa ni wɔŋɔ hegbɛ fɛɛ hegbɛ ni wɔɔná ni wɔkɛfee nii ni Yehowa kɛɔ akɛ ehe hiaa lɛ.
3 Yesu kɛ wɔgbii lɛ to Noa gbii lɛ ahe. (Luka 17:26, 27) Gbɔmɛi ni hi shi yɛ nakai gbii lɛ amli lɛ bɛ dekã kwraa kɛ amɛ daa gbi shihilɛ mli nifeemɔi. Shi Noa tao be ni ekɛkpɛ adeka agbo ko, ni eshiɛ hu. (Heb. 11:7; 2 Pet. 2:5) Te fee tɛŋŋ ni amɛná be? Amɛkɛ Nyɔŋmɔ suɔmɔnaa nii ye klɛŋklɛŋ gbɛhe ni amɛbo lɛ toi kɛtsɔ nibii ni amɛfee lɛ “nakai pɛpɛɛpɛ” lɛ nɔ.—1 Mose 6:22.
4 Mɛni Esa akɛ Eba Klɛŋklɛŋ? Yesu kɛɛ akɛ: “Jeee aboloo kɛkɛ haa gbɔmɔ yi náa wala; shi moŋ wiemɔ fɛɛ wiemɔ ni jɛɔ Nyɔŋmɔ daaŋ lɛ.” (Mat. 4:4) Wɔnine shɛɔ ‘mumɔŋ niyenii falɛ ko’ nɔ “yɛ be ni sa mli” daa otsi. (Luka 12:42) Kɛji akɛ wɔɔnyɛ wɔnu fɛɛ shishi ni ehe aba sɛɛnamɔ kɛha wɔ lɛɛlɛŋ lɛ, belɛ enɛ biɔ teemɔŋ nikanemɔ daa kɛ nikasemɔ he gbɛjianɔtoo. Yɛ shidaa ni wɔyɔɔ kɛha mumɔŋ niyenii hewɔ lɛ, wɔyeee lɛ kpalakpala, ní wɔmiikwɛ mli oya kɛmiiho kɛkɛ, tamɔ mɔ ko yeɔ heloo naa niyenii kɛ foi lɛ. Shi moŋ hiɛsɔɔ kpakpa tsirɛɔ wɔ koni wɔto wɔtsui shi kɛkase mumɔŋ nibii, ní wɔná mli ŋɔɔmɔ.
5 Mumɔŋ niyenii ni ayeɔ baanyɛ ni ekɛ mɔ aya naanɔ wala mli. (Yoh. 17:3) Esa akɛ wɔkɛwo he ko titri yɛ wɔ daa gbi be he gbɛjianɔtoo mli. Ani wɔbaanyɛ wɔná be wɔha daa gbi Biblia kanemɔ kɛ hesaamɔ kɛha Kristofoi akpeei? Hɛɛ, wɔbaanyɛ. No lɛ, wɔnine baashɛ “nyɔmɔwoo kpele” ni baa kɛjɛɔ Nyɔŋmɔ suɔmɔnaa nii ni wɔleɔ ni wɔfeɔ lɛ mli baa lɛ nɔ.—Lala 19:8-12.