Jɔɔmɔi ni Jɛɔ Hiɛsɔɔ ni Ayɔɔ Kɛha Yehowa Suɔmɔ lɛ Mli Baa—Fa 1
1 Bɔfo Yohane ŋma akɛ: “Wɔsumɔɔ lɛ, ejaakɛ lɛ [Yehowa] tsutsu esumɔ wɔ.” (1 Yoh. 4:19) Kɛji akɛ wɔsusu nibii fɛɛ ni Yehowa kɛha wɔ lɛ he lɛ, etsirɛɔ wɔ koni wɔjie wɔ hiɛsɔɔ ni mli kwɔ waa kpo wɔto najiaŋ. Yesu to okadi yɛ enɛ feemɔ mli kɛtsɔ toiboo ni ekɛye Nyɔŋmɔ gbɛi lɛ kɛ Maŋtsɛyeli lɛ he odase lɛ nɔ. (Yoh. 14:31) Wɔɔfee jogbaŋŋ akɛ wɔɔsusu gbɛ̀i komɛi ni wɔɔtsɔ nɔ wɔjie wɔ hiɛsɔɔ kpo kɛha Yehowa suɔmɔ lɛ kɛ jɔɔmɔi ni jɛɔ mli baa lɛ he.
2 Shia kɛ Shia ni Wɔɔya: Yesu tsɔɔ ekaselɔi lɛ bɔ ni amɛaatsu Maŋtsɛyeli shiɛmɔ nitsumɔ lɛ amɛha. Gbɛtsɔɔmɔi ni ekɛha lɛ tsɔɔ yɛ faŋŋ mli akɛ amɛtee shia kɛ shia, ni amɛgbɛ sanekpakpa lɛ amɛshwã. (Luka 9:1-6; 10:1-7) Ebiɔ suɔmɔ kɛha Nyɔŋmɔ kɛ naanyo dani aya nɔ aya shia kɛ shia beni wɔkɛ shikpilikpii-feemɔ kɛ shitee-kɛ-woo kpeɔ lɛ. Shi, yɛ nakai feemɔ mli lɛ, ehe baa sɛɛnamɔ kɛhaa wɔ diɛŋtsɛ, ejaakɛ wɔhemɔkɛyeli fiɔ shi shiŋŋ, wɔhekɛnɔfɔɔ feɔ nɔ ni mli wa, ni wɔhiɛnɔkamɔ kpɛ́ɔ kaŋkaŋ.
3 Ájɔɔ mɛi babaoo ni tsuɔ enɛ yɛ ŋwɛibɔfoi agbɛtsɔɔmɔ shishi lɛ, ejaakɛ amɛ́na mɛi ni anɔkwale lɛ he hɔmɔ kɛ kumai yeɔ amɛ lɛ. (Kpoj. 14:6) Shiatsɛmɛi ewie akɛ amɛsɔleɔ kɛhaa yelikɛbuamɔ, kɛkɛ lɛ Odasefonyo epue yɛ amɛ shinaa naa. Odasefoi enyɔ ko kɛ gbekɛ bibioo ko miiya shia kɛ shia yɛ Caribbean ŋshɔkpɔ ko nɔ. Kɛkɛ ni onukpai nɛɛ kpɛ amɛyiŋ akɛ amɛbaakpa agbɛnɛ, shi gbekɛ lɛ kome tsɔ hiɛ kɛtee tsũ ni tsa nɔ lɛ naa ni etswa shinaa lɛ. Oblayoo fioo ko gbele shinaa lɛ. Beni onukpai lɛ na enɛ lɛ, amɛtee jɛmɛ ni amɛkɛ lɛ yawie. Efɔ̃ nine etsɛ amɛ ni amɛba mli, ni etsɔɔ mli eha amɛ akɛ, no mli lɛ ehiɛ sɔlemɔ mli koni Nyɔŋmɔ atsu Odasefoi lɛ kɛba ni amɛbatsɔɔ lɛ Biblia mli saji!
4 Shiɛmɔ yɛ Gbɛjegbɛi Anɔ: Akɛni ewa waa akɛ aaana gbɔmɛi yɛ shia yɛ hei komɛi hewɔ lɛ, gbɛjegbɛi anɔ odaseyeli ji gbɛ ni mɔɔ shi jogbaŋŋ ni aaatsɔ nɔ ana amɛ. Agbɛnɛ hu, gbɔmɛi pii hiɔ akutsei ni áŋamɔ amɛ shiai agbói amli lɛ amli, aloo he ni bulɔi buɔ shiai nɛɛ ahe waa ni haaa wɔnyɛ wɔbote shiai nɛɛ amli. Shi kɛlɛ, hiɛsɔɔ ni wɔyɔɔ yɛ Yehowa suɔmɔ lɛ he lɛ kanyaa wɔ koni wɔŋɔ hegbɛ fɛɛ hegbɛ ni wɔɔná koni wɔkɛ Maŋtsɛyeli sane lɛ aha gbɔmɛi lɛ, ni gbɛjegbɛi anɔ odaseyeli fata he.—Abɛi 1:20, 21.
5 Sɛɛsaramɔi ni Afeɔ: Akɛni wɔmiitao mɛi ni “amɛhiɛ yɔɔ amɛmumɔŋ hiamɔ nii anɔ” lɛ hewɔ lɛ, wɔmiisumɔ ni wɔfee nɔ fɛɛ nɔ ni wɔɔnyɛ ni wɔkɛtsu nakai hiamɔ lɛ he nii. (Mat. 5:3, NW) Enɛ biɔ ni wɔku wɔ sɛɛ wɔya ni wɔyashwã anɔkwale wui ni wɔdu lɛ anɔ nu. (1 Kor. 3:6-8) Nyɛmi yoo ko ni yɔɔ Australia kɛ dɛhiɛmɔ wolo ko ha yoo ko ni tamɔ mɔ ko ni nyaaa he tsɔ. Fɛɛ sɛɛ lɛ, nyɛmi yoo lɛ bɔ mɔdɛŋ akɛ eeetao eshia lɛ ekoŋŋ. Beni yɛ naagbee lɛ enine shɛ enɔ lɛ, wɔnyɛmi yoo lɛ na akɛ, beni etee eŋɔɔ klɛŋklɛŋ kwraa lɛ sɛɛ lɛ, yoo lɛ yahe Biblia ko ni jara wa waa. Kɛkɛ ni nyɛmi yoo lɛ kɛ lɛ bɔi nikasemɔ!
6 Biblia Mli Nikasemɔi Afeemɔ: Enɛ baanyɛ afee wɔsɔɔmɔ lɛ fã ko ni ŋɔɔ ni nyɔmɔwoo yɔɔ mli waa fe fɛɛ. Mɛɛ jɔɔmɔi eji nɛkɛ, akɛ aaaye abua gbɔmɛi koni amɛkase Yehowa he nii, ni ana bɔ ni amɛfeɔ tsakemɔi yɛ amɛshihilɛi amli koni amɛsa ehiɛ, ni agbɛnɛ aye amɛ Kristofoi abaptisimɔ ni amɛkɛfeɔ amɛ henɔjɔɔmɔ kɛha Nyɔŋmɔ lɛ he odase!—1 Tes. 2:20; 3 Yoh. 4.
7 Wɔbaasusu gbɛ̀i pii ni ajɔɔ wɔ yɛ nɔ, akɛni wɔjieɔ hiɛsɔɔ kpo kɛhaa Yehowa suɔmɔ lɛ hewɔ lɛ he, yɛ nɔ ni baanyiɛ enɛ sɛɛ aba lɛ mli.