Jaa Nyɔŋmɔ Wiemɔ lɛ Mli Pɛpɛɛpɛ
1 Beni “Filipo” yeɔ nɔyeli lɛ mli onukpa ko odase lɛ, ‘egbele enaa ni ebɔi kɛjɛ Ŋmalɛ ko nɔ, ni ejaje Yesu he sanekpakpa lɛ etsɔɔ lɛ.’ (Bɔf. 8:35) Filipo ‘miija anɔkwale wiemɔ lɛ mli pɛpɛɛpɛ.’ (2 Tim. 2:15) Shi kɛlɛ, ŋmɛnɛ, nɔkwɛlɔi gbɛfalɔi eyoo akɛ shiɛlɔi pii efɔɔɔ Biblia lɛ kɛ nitsumɔ beni amɛyeɔ odase. Ani okɛ Biblia lɛ tsuɔ nii yɛ osɔɔmɔ nitsumɔ lɛ mli?
2 Nyɔŋmɔ Wiemɔ lɛ ji nɔ fɛɛ nɔ ni wɔheɔ wɔyeɔ ni wɔtsɔɔ lɛ jɛɛhe. (2 Tim. 3:16, 17) No gbalaa gbɔmɛi kɛbaa Yehowa ŋɔɔ ni etsɔseɔ amɛ kɛhaa wala. No hewɔ ni ehe hiaa ni wɔkɛ Biblia lɛ atsu nii yɛ wɔsɔɔmɔ nitsumɔ lɛ mli moŋ fe ni wɔɔwie saji ni wɔyɔɔ he miishɛɛ kɛkɛ lɛ ahe lɛ. (Heb. 4:12) Akɛni Biblia lɛ he nɔ ko fioo ko pɛ mɛi babaoo le hewɔ lɛ, ehe miihia ni wɔkane sane kɛjɛ mli ni wɔkɛtsɔɔ amɛ gbɛtsɔɔmɔ ni anyɛɔ atsuɔ he nii ni ekɛhaa lɛ kɛ wɔsɛɛ be he gbɛkpamɔ kpakpa ni eyɔɔ kɛha adesai lɛ.
3 Kanemɔ Sane lɛ Tɛ̃ɛ Kɛjɛ Biblia lɛ Mli: Ekolɛ obaabɔ mɔdɛŋ akɛ oooya shiɛmɔ shi ohiɛɛɛ baagi. Obaanyɛ ni okɛ wolo ni akɛtsuɔ nii ni osumɔɔ ni okɛha lɛ awo baagi bibioo ko mli ni ohiɛ Biblia lɛ yɛ odɛŋ loo okotoku mli. Kɛkɛ lɛ, kɛ okɛ mɔ ko bɔi sanegbaa lɛ, obaanyɛ ojie Biblia lɛ bɔ ni ehaŋ gbɔmɔ lɛ anu he akɛ oobɔ mɔdɛŋ ni oshiɛ otsɔɔ lɛ. Jajemɔ ohe kɛdamɔ shi koni otoibolɔ lɛ anyɛ ana nɔ ni okaneɔ yɛ o-Biblia lɛ mli lɛ. Ekolɛ obaanyɛ obi ni ekane kuku ko waa ni onu. Kɛji akɛ enyɛɔ enaa nɔ ni Biblia lɛ kɛɔ lɛ moŋ fe ni eeenu nɔ ni akaneɔ kɛjɛɔ mli lɛ, ebaaná enɔ hewalɛ waa. Shi kɛlɛ, bɔni afee ni oye obua lɛ koni enu nɔ ni ŋmalɛ lɛ kɛɔ lɛ shishi lɛ, esa ni oma wiemɔi titrii ni esa akɛ enu shishi lɛ anɔ mi.
4 Ŋmalɛ Kome Shiɛmɔ Wiemɔ: Beni ojie ohe kpo sɛɛ lɛ, obaanyɛ okɛɛ akɛ: “Mɛi kwɛɔ hei srɔtoi kɛhaa gbɛtsɔɔmɔ yɛ amɛshihilɛi amli. Te nɔ ni onuɔ he akɛ no ji nɔ ni haa anáa gbɛtsɔɔmɔ ni hi fe fɛɛ ni anyɛɔ akɛ he fɔ̃ɔ nɔ lɛ? [Ŋmɛɛ gbɛ ni eha hetoo.] Mɛni osusuɔ yɛ nɛkɛ sane nɛɛ he? [Kanemɔ Abɛi 2:6, 7 ni oŋmɛ gbɛ ni eha hetoo.] Adesa nilee kɛ naagbai babaoo eba, ni eha mɛi pii anijiaŋ eje wui. Shi Nyɔŋmɔ nilee efee nɔ ni anyɛɔ akɛ he fɔ̃ɔ nɔ ni sɛɛnamɔ yɔɔ he be fɛɛ be.” Agbɛnɛ okɛ wolo ni okɛtsuɔ nii lɛ atsɔɔ lɛ, ni ojɛ wolo lɛ mli oma Nyɔŋmɔ nilee ni anyɛɔ atsuɔ he nii lɛ he nɔkwɛmɔnɔ kome nɔ mi.
5 Yesu kɛ Ŋmalɛi lɛ tsu nii ni ekɛye ebua mɛi ni tsui ja lɛ. (Luka 24:32) Paulo kɛ Ŋmalɛi lɛ tsu nii yɛ enitsɔɔmɔ mli. (Bɔf. 17:2, 3) Wɔ hekɛnɔfɔɔ kɛ miishɛɛ ni wɔyɔɔ yɛ sɔɔmɔ nitsumɔ lɛ mli lɛ baaya hiɛ yɛ be mli ni wɔhe saa kɛmɔɔ shi yɛ Nyɔŋmɔ Wiemɔ lɛ ni wɔkɛtsuɔ nii yɛ gbɛ ni ja nɔ lɛ mli lɛ.