Okɛ Hesaa Atsu Nii Yɛ Osɔɔmɔ Nitsumɔ Lɛ Mli

¹ Bɔfo Paulo woɔ wɔ hewalɛ ni wɔkɛ hesaa atsu nii yɛ sɔɔmɔ nitsumɔ lɛ mli. Eŋma akɛ: “Bɔɔ mɔdɛŋ ni okɛ ohe adamɔ Nyɔŋmɔ hiɛ, akɛ mɔ ko ni sa, nitsulɔ ni hiɛ gbooo, ni jaa anɔkwale wiemɔ lɛ mli pɛpɛɛpɛ.”​—Tim. 2:⁠15.

² Ataoɔ hesaa ni wɔkɛbaatsu nii yɛ sɔɔmɔ nitsumɔ lɛ mli lɛ ni anaa. No hewɔ lɛ, esa akɛ ‘wɔbɔ mɔdɛŋ’​—ni wɔkɛ ekaa awo wɔmɔdɛŋbɔɔ lɛ mli​—kɛji wɔbaatsɔmɔ sɔɔlɔi ni he esa lɛ, Shi mɛni baaye abua wɔ?

Kasemɔ Nii Kɛjɛ Nyɔŋmɔ Wiemɔ Lɛ Mli

³ Bɔ ni wɔle Ŋmalɛi lɛ wɔha wɔ diɛŋtsɛ lɛ naa hewalɛ tɛɛ yɛ bɔ ni wɔyeɔ omanye akɛ sɔɔlɔi lɛ nɔ. Kɛji wɔle nibii ni Biblia lɛ tsɔɔ lɛ jogbaŋŋ lɛ, no lɛ ebaaha wɔhe asa jogbaŋŋ akɛ mɛi ni “jaa anɔkwale wiemɔ lɛ mli pɛpɛɛpɛ.” No hewɔ lɛ ehe miihia ni wɔto be kɛha wɔ aŋkroaŋkro nikasemɔ.​—1 Tim. 4: 15, 16.

⁴ Gbɛ kroko ni wɔɔtsɔ nɔ wɔle Nyɔŋmɔ Wiemɔ lɛ jogbaŋŋ hu ji ni “wɔmɔ” gbɛtsɔɔmɔi ni damɔ Biblia lɛ nɔ ni wɔnine shɛɔ nɔ yɛ asafoŋ kpeei ashishi “lɛ mli ni awa.” (Heb. 2:⁠1) Asusuɔ saji ni hi jogbaŋŋ kɛha sɔɔmɔ nitsumɔ lɛ ahe yɛ maŋshiɛmɔi amli, aloo wɔbaanyɛ wɔkpa enɛ kɛjɛ Asafo Woloŋ Nikasemɔ lɛ mli. Teokrase Sɔɔmɔ Skul lɛ kɛ tsɔsemɔ ni he hiaa lɛ haa wɔ bɔni afee ni wɔfee tsɔɔlɔi ni he esa, ni Sɔɔmɔ Kpee lɛ kɛ ŋaawoi ni yeɔ buaa kɛ nɔkwɛmɔ nii ni anyɛɔ akɛtsuɔ nii haa wɔ bɔni afee ni eye ebua wɔ ni wɔtsɔmɔ sɔɔlɔi ni he esa, Shi kɛlɛ, dani wɔɔna enɛ he sɛɛ waa kɛmɔ shi lɛ, ehe miihia ni wɔsaa wɔhe jogbaŋŋ ni wɔkɛ wɔhe awo kpeei lɛ fɛɛ mli hu.

Okɛ Ŋaawoi Lɛ Atsu Nii

⁵ Paulo kɛɛ asafo ni yɔɔ Filipi lɛ ni amɛkɛ nibii ni amɛkase yɛ ehe lɛ atsu nii. (Filip. 4:⁠9) Ehe miihia ni wɔ hu wɔkɛ nibii ni wɔkaseɔ kɛtsɔɔ Yehowa gbɛjianɔtoo lɛ nɔ lɛ atsu nii. Akɛ nɔkwɛmɔ nɔ lɛ, wɔkase gbɛi ni wɔɔtsɔ nɔ wɔna shikpɔŋkuku “hee” yɛ hei ni afɔɔ mli nitsumɔ waa lɛ he nii yɛ September 1, 1988 Buu-Mɔɔ ni je kpo lɛ baafai 14-19. Kɛfata gbɛ hee ni anyaa he ni wɔkɛaaatsu nii, kɛ jwɛŋmɔ kpakpa ni ama nɔ mi hu lɛ he lɛ, nikasemɔ lɛ wo wɔ hewalɛ ni wɔha ahi shiatsɛ lɛ jwɛŋmɔ mli akɛ wɔbaaba eŋɔɔ daa koni ekpa wɔ gbɛ. Awo wɔ ŋaa hu koni wɔtao mɛi ni sa lɛ jogbaŋŋ kɛmɔ shi, ni Wɔtao mɛi aŋkroaŋkroi sɔrɔtoi ni yɔɔ shia kome mli lɛ fɛɛ. Kɛ wɔkɛ ŋaawoi nɛɛ tsu nii lɛ, no lɛ wɔkɛ nibii ni wɔkaseɔ lɛ miitsu nii ni wɔmiiya wɔhiɛ yɛ wɔhesaa yɛ sɔɔmɔ nitsumɔ lɛ mli lɛ mli.

⁶ Ani wɔkɛ Reasoning wolo lɛ tsuɔ nii yɛ shiɛmɔ nitsumɔ lɛ mli daa? Hiɛkpamɔ wiemɔi ni akɛha kɛ agbɛnɛ afa ni tsɔɔ bɔ ni wɔɔfee wɔha mɛi ni tsiɔ sanegbaa naa lɛ ahetoo lɛ baanyɛ aha wɔhe asa babaoo yɛ shiɛmɔ nitsumɔ lɛ mli. Kɛfata he lɛ, kɛ wɔsaa wɔhe ni wɔti Saneyitso Kɛha Sanegbaa lɛ mli kɛ gbɛ nɔ ni wɔɔtsɔ ni wɔkɛ wolo ni akɛtsuɔ nii yɛ nyɔŋ lɛ mli aha lɛ, ebaaye ebua ni wɔye omanye yɛ sɔɔmɔ lɛ mli.

⁷ Kɛji obaasumɔ ŋaawoo babaoo ni kɔɔ gbɛ ni oootsɔ nɔ oha osɔɔmɔ lɛ aya hiɛ lɛ he lɛ, no lɛ bɛŋkɛmɔ sɔɔmɔ nɔkwɛlɔ lɛ aloo owoloŋ nikasemɔ nɔkwɛlɔ lɛ ni obi yelikɛbuamɔ. Wɔ fɛɛ wɔbaanyɛ wɔha wɔhesaa akɛ sɔɔlɔi lɛ aya hiɛ akɛ mɛi ni “jaa anɔkwale wiemɔ lɛ mli pɛpɛɛpɛ.” Eshwɛ fioo kɛkɛ ni Yehowa Nyɔŋmɔ kɛ yiwalɛ nibii agbɛjianɔtoo nɛɛ baaba naagbee. Kɛyashi nakai be lɛ, nɔ ni wɔshweɔ yɛ wɔtsuiŋ ji ni wɔye wɔbua mɛi abɔ ni wɔɔnyɛ ni amɛna yiwalaheremɔ ni amɛtsɔ no nɔ amɛwo Yehowa wɔ-Nyɔŋmɔ lɛ hiɛ nyam.​—Yohane 15:⁠8.