Miishɛɛ ni Yɔɔ Be-Fɛɛ Sɔɔmɔ lɛ Mli
1 Ákɛ oblanuu loo oblayoo lɛ, ŋwanejee ko bɛ he akɛ osusu owɔsɛɛ shihilɛ he. Abɛi 21:5 lɛ kɛɔ wɔ akɛ, “mɔdɛŋbɔlɔ jwɛŋmɔi lɛ, nifálɛ sɔŋŋ ekɛbaa.” Ebaafee nɔ ni sɛɛnamɔ yɔɔ he kɛha bo akɛ okɛ hiɛdɔɔ aaasusu otii ni okɛmamɔ ohiɛ yɛ shihilɛ mli lɛ he. Yɛ be mli ni otoɔ gbɛjianɔ kɛhaa wɔsɛɛ lɛ, susumɔ be-fɛɛ sɔɔmɔ lɛ ni okɛ ohe aaawo mli lɛ he. Mɛni hewɔ?
2 Bi mɛi komɛi ni edara ni tsu gbɛgbamɔ nitsumɔ lɛ beni amɛji oblahii kɛ oblayei lɛ nɔ ni amɛsusuɔ yɛ he, ni taakɛ efɔɔ kaa lɛ, amɛbaakɛɛ nɔ kome too lɛ nɔŋŋ akɛ: “Nomɛi ji mishihilɛ mli afii ni fe fɛɛ!” Nyɛmi nuu ko ni ná be-fɛɛ sɔɔmɔ lɛ mli miishɛɛ kɛjɛ eblahiiaŋ lɛ wie beni eda yɛ afii amli lɛ akɛ: “Eji tsui ni nyɔɔ mɔ mli waa akɛ mɔ aaasusu eblahiiaŋ loo eblayeiaŋ be lɛ he, ni enyɛ ekɛɛ akɛ ebo ŋaawoo ni nilee yɔɔ mli ni ji: ‘Kaimɔ obɔlɔ lɛ, yɛ oblahiiaŋ gbii lɛ amli’ lɛ toi.” (Jaj. 12:1) Ebiɔ gbɛjianɔtoo kpakpa yɛ bo kɛ ofɔlɔi fɛɛ agbɛfaŋ bianɛ, koni nyɛto gbɛjianɔ ni oná nɛkɛ miishɛɛ nɛɛ mli ŋɔɔmɔ yɛ oblahiiaŋ loo oblayeiaŋ gbii lɛ amli.
3 Fɔlɔi, Nyɛwoa Be-Fɛɛ Sɔɔmɔ He Hewalɛ: Akɛ Tsɛ ni yɔɔ suɔmɔ lɛ, Yehowa tsɔɔ nyɛ gbɛ ni esa akɛ nyɛtsɔ nɔ. (Yes. 30:21) Yɛ suɔmɔ gbɛtsɔɔmɔ ni tamɔ nɛkɛ ni ekɛhaa lɛ mli lɛ, efeɔ nɔkwɛmɔnɔ fɛfɛo kɛhaa nyɛ ni ji fɔlɔi Kristofoi lɛ. Yɛ nɔ najiaŋ ni nyɛaashi nyɛha nyɛbii lɛ ni amɛhala gbɛ ni hi ha amɛ lɛ, nyɛkɛ nilee atsɔse amɛ yɛ gbɛ ni esa akɛ amɛtsɔ nɔ bɔni afee ni amɛná Yehowa jɔɔmɔ. Kɛkɛ lɛ, kɛji amɛdara lɛ, nyɛ tsɔsemɔ lɛ baaye abua amɛ ni ‘amɛle ekpakpa kɛ efɔŋ mlikpamɔ.’ (Heb. 5:14.) Mɛi ni edara le kɛjɛ niiashikpamɔ mli akɛ amɛnyɛŋ amɛkɛ amɛhe afɔ amɛ diɛŋtsɛ amɛsusumɔi anɔ; esa akɛ amɛkɛ amɛhiɛ afɔ Yehowa nɔ koni amɛgbɛ̀i aja. (Abɛi 3:5, 6) Hiamɔ nɛɛ da waa po yɛ oblahii kɛ oblayei agbɛfaŋ, akɛni amɛbɛ niiashikpamɔ babaoo yɛ shihilɛ mli lɛ hewɔ.
4 Fɔlɔi, yɛ be mli ni nyɛbii lɛ bɛŋkɛɔ afii nyɔŋma kɛ etɛ kɛyaa, loo dani nakai be lɛ aaashɛ po lɛ, nyɛjɛa anɔkwale mli nyɛkɛ amɛ awiea otii ni amɛkɛmamɔ amɛhiɛ kɛha nitsumɔ lɛ he. Skul he ŋaawolɔi, tsɔɔlɔi, kɛ klasbii baabɔ mɔdɛŋ ni amɛkɔne amɛyiŋ ni amɛhala je lɛŋ heloonaa nibii asɛɛdii. Nyɛyea nyɛbuaa nyɛbii lɛ ni amɛhala skul nikasemɔi ni kɛ nitsumɔ mli tsɔsemɔi haa, koni no awaje amɛ ni amɛtsu amɛ heloonaa hiamɔ nii ahe nii, ní amɛkuuu amɛhiɛ amɛshwieee Maŋtsɛyeli nitsumɔi anɔ. (1 Tim. 6:6-11) Yɛ shihilɛi babaoo mli lɛ, nɔtsamɔ skul ni ninenaa nitsumɔ aloo nitsumɔ ni atsuɔ lɛ mli tsɔsemɔ ni anáa fata he lɛ baafee nɔ pɛ ni he hiaa kɛha mɔ ko ní ená ehiamɔ nii, yɛ be mli ni ejeɔ gbɛgbamɔ sɔɔmɔ lɛ shishi lɛ.
5 Wó oblahii kɛ oblayei hewalɛ ni amɛtiu oshijayeli nikeenii lɛ sɛɛ. Kɛji akɛ sɛɛ mli lɛ, amɛkpɛ amɛyiŋ akɛ amɛbaabote gbalashihilɛ mli lɛ, no mli lɛ amɛfee klalo akɛ amɛaaŋɔ gbalashihilɛ mli sɔ̃i ni tsii lɛ amɛfɔ amɛnɔ. (Kwɛmɔ May 15, 1992, Buu Mɔɔ lɛ bf. 14, kk. 18 lɛ mli.) Kɛtsɔ gbɛgbamɔ nitsumɔ lɛ, he ni hiamɔ lɛ da ni aaasɔmɔ yɛ, Betel sɔɔmɔ, kɛ maŋsɛɛ sanekpakpa sɔɔmɔ lɛ ni ooowie he ekpakpa lɛ nɔ lɛ, dũ suɔmɔ ni aaana ákɛ akɛ shihilɛ aaatsu nii yɛ gbɛ ni saa Yehowa hiɛ, ni ehe aba sɛɛnamɔ aha mɛi krokomɛi, koni ekɛ miishɛɛ abaha amɛ diɛŋtsɛ hu lɛ owo oblahii kɛ oblayei amli yɛ amɛ mra be mli afii lɛ po amli.
6 Oblahii kɛ Oblayei, Nyɛkɛ Be-Fɛɛ Sɔɔmɔ lɛ Ayea Klɛŋklɛŋ Gbɛhe: Oblahii kɛ Oblayei, esaaa akɛ nyɛnáa jwɛŋmɔ enyɔnyɔɔnyɔ yɛ bɔ ni gbɛgbamɔ nitsumɔ lɛ tamɔ ha lɛ he. Nyɛbaanyɛ nyɛkɛ be-fã aka nyɛkwɛ kɛtsɔ gbɛgbalɔi awamɔ nitsumɔ lɛ ni nyɛkɛ nyɛhe aaawo mli be fɛɛ be ni hegbɛ lɛ aaaba, yɛ be mli ni nyɛyaa skul kɛ be mli ni nyɛha gbɛ lɛ mli lɛ nɔ. Kɛkɛ lɛ nyɛbaana bɔ ni gbɛgbamɔ sɔɔmɔ lɛ yɔɔ miishɛɛ diɛŋtsɛ hã! Ani nyɛbaanyɛ nyɛtsɔ hiɛ nyɛto gbɛjianɔ ni nyɛtsu gbɛgbalɔi awamɔ nitsumɔ lɛ kɛjɛ bianɛ kɛyashi gbɛhamɔ ni sɛɛ kɛ lɛ naagbee be lɛ mli?
7 Kɛ oji oblanuu yɛ Nyɔŋmɔ gbɛjianɔtoo lɛ mli lɛ, okɛ hiɛdɔɔ hu asusu bɔ ni ooofee ni ohe asa akɛ asafoŋ sɔɔlɔ lɛ he. (1 Tim. 3:8-10, 12) Kɛfata he lɛ, kpɛɛ oyiŋ kɛji akɛ obaasumɔ ni oŋma wolo kɛbi ni oyasɔmɔ yɛ Betel loo ni oya Sɔɔlɔi Atsɔsemɔ Skul lɛ eko kɛ oshɛ afii ni ataoɔ lɛ he lɛ. Oniiashikpamɔ yɛ gbɛgbamɔ sɔɔmɔ lɛ mli lɛ baaha ole nikasemɔi ni sɛɛnamɔ yɔɔ he, tamɔ bɔ ni ooohi shi yɛ gbɛjianɔtoo naa, bɔ ni oooha bo diɛŋtsɛ ogbɛjianɔtoo aya hiɛ, gbɛ nɔ ni oootsɔ okɛ mɛi krokomɛi ahi shi, kɛ bɔ ni ooona nyɛmɔ kɛha gbɛnaanii ahe nitsumɔ. Enɛɛmɛi fɛɛ baasaa bo kɛha sɔɔmɔ hegbɛi wuji yɛ sɛɛ mli.
8 Oti ko ni he hiaa yɛ omanye ni aaaye yɛ be-fɛɛ sɔɔmɔ lɛ mli ji, ni wɔtsu nii waa yɛ teokrase saji ahe. Bɔfo Paulo wo su ni tamɔ nɛkɛ he hewalɛ, ni etsɔɔ sɛɛnamɔi ni baajɛ mli aba akɛ: “Ni nɔ fɛɛ nɔ ní nyɛfeɔ lɛ, nyɛjiea nyɛmusuŋ nyɛtsua, taakɛ Nuntsɔ lɛ nyɛtsuɔ nyɛhaa, . . . ni nyɛle akɛ Nuntsɔ lɛ dɛŋ nyɛnine baashɛ gboshinii lɛ anɔ yɛ akɛ nyɛnyɔmɔwoo.” (Kol. 3:23, 24) Eba akɛ Yehowa kɛ miishɛɛ babaoo aaawo bo nyɔmɔ yɛ be-fɛɛ sɔɔmɔ lɛ mli!