Yaa Nɔ Oná Buu-Mɔɔ kɛ Awake! lɛ He Sɛɛ

Amrɔ nɛɛ ni aakpa Buu-Mɔɔ lɛ kɛ Awake! ni ashɛɔ kɛtsɔɔ post ɔfis gbɛjianɔtoo nɔ lɛ ashɛɛ lɛ, mɔdɛŋbɔɔ he baahia koni akwɛ akɛ wɔ, kɛ mɛi ni wɔshiɛɔ wɔhaa lɛ, haŋ ekome folo po aŋmɛɛ wɔ.

Wɔ Diɛŋtsɛ Wɔnɔ: Kɛji akɛ be ni okɛshɛɔ bo diɛŋtsɛ onɔ̃ lɛ ba naagbee lɛ, hã woji ni oshɛɔ amrɔ nɛɛ yɛ woji tɛtrɛbii ahamɔhe lɛ aya hiɛ. Esa akɛ fɔlɔi ashɛ woji tɛtrɛbii lɛ bɔ ni fa koni weku lɛ mli bii lɛ ateŋ mɔ fɛɛ mɔ aná lɛ diɛŋtsɛ enɔ̃. Ogbɛi ni oooŋma yɛ bo diɛŋtsɛ onɔ̃ lɛ nɔ lɛ baaye abua koni okɛkáha yɛ shiɛmɔ mli beni ohiɛ bɛ ohe nɔ. Nyɛmi nuu ni kwɛɔ woji tɛtrɛbii lɛ anɔ lɛ baakwɛ koni kɛji ebashɛ shi lɛ ejie eko fɛɛ eko kpo amrɔ nɔŋŋ yɛ Maŋtsɛyeli Asa lɛ nɔ.

Mɛi ni Akɛ Woji Tɛtrɛbii lɛ Yahaa Daa: Esa akɛ shiɛlɔi abɔ mɔdɛŋ koni amɛkɛ mɛi fɛɛ ni yɔɔ wiemɔ lɛ he miishɛɛ ni miisumɔ ni amɛnine ashɛ woji tɛtrɛbii lɛ eko fɛɛ eko nɔ lɛ afee mɛi ni amɛyahaa amɛ eko daa. Woji tɛtrɛbii lɛ ni wɔ diɛŋtsɛ wɔkɛbaaha mɛi ni tamɔ nɛkɛ lɛ baaha wɔ hegbɛi koni wɔkɛtsu miishɛɛ ni ajie lɛ kpo lɛ he nii, koni wɔje Biblia mli nikasemɔi ashishi.—Kwɛmɔ Wɔ Maŋtsɛyeli Sɔɔmɔ, October 1998, baafa 8 lɛ.

Mɛi ni Yɔɔ Hiamɔ Nii Krɛdɛɛ Lɛ: Kɛji akɛ mɔ aŋkro ko jie anɔkwa miishɛɛ kpo shi eji mɔ ko ni yɔɔ shikpɔŋkuku ni akɛwoko mɔ ko dɛŋ lɛ mli lɛ, abaanyɛ afee tsakemɔ koni aŋmɛ lɛ gbɛ ni enine ashɛ woji tɛtrɛbii lɛ anɔ kɛtsɔ post ɔfis gbɛjianɔtoo nɔ. Kɛji akɛ nine nyɛŋ ashɛ mɔ ko ni yɔɔ asafo lɛ shikpɔŋkuku lɛ mli lɛ nɔ koni akɛ woji tɛtrɛbii lɛ ayaha lɛ daa, shi ekɛ anɔkwayeli miisumɔ ni enine ashɛ woji tɛtrɛbii lɛ anɔ lɛ, okɛ Asafoŋ Sɔɔmɔ Ajinafoi Akuu lɛ agba he sane. Kɛji amɛkpɛlɛ nɔ lɛ, abaanyɛ ashɛ aha mɔ ni yɔɔ wiemɔ lɛ he miishɛɛ lɛ. Ekolɛ abaanyɛ akɛ woji bibii ni akɛshɛɔ daa ni ji (M-1 kɛ M-101) lɛ atsu nii kɛha yiŋtoo nɛɛ.

Wɔbaanyɛ wɔná nɔmimaa akɛ Yehowa baaya nɔ ajɔɔ mɔdɛŋ fɛɛ ni wɔbɔɔ koni wɔtswa Maŋtsɛyeli lɛ he adafi kɛtsɔ Buu-Mɔɔ lɛ kɛ Awake! lɛ nɔ lɛ nɔ.