Hewalɛwoo Krɛdɛɛ ni Wɔkɛaawo Wɔ Fɛɛ Wɔhe Hewalɛ
1 Gbi kome po hooo ni Yehowa webii kɛ amɛhemɔkɛyeli he kaai ekpeee. Akɛni Abonsam le akɛ be fioo kɛkɛ eyɔɔ hewɔ lɛ, ekɛ naagbee tutuamɔ ni naa wa miiba koni ekɛfite emuuyeli ni wɔhiɛɔ mli kɛhaa Yehowa lɛ. (Kpoj. 12:12) Ehe miihia ni ‘wɔhe awa yɛ Nuŋtsɔ lɛ kɛ ehewalɛ nyɛmɔ lɛ mli’ koni ‘wɔnyɛ gbi fɔŋ lɛ naa wɔkpee, ni beni wɔgbe fɛɛ naa lɛ ni wɔwo shidaamɔ.’—Efe. 6:10, 13.
2 Nanemɛi heyelilɔi ni wɔkɛ amɛ aaabua wɔhe naa lɛ ji gbɛjianɔtoo ni jɛ Yehowa dɛŋ koni eye ebua wɔ ni wɔná hewalɛ. Bɔfo Paulo hiɛ sɔ enɛ. Eshwe akɛ eeefata enyɛmimɛi Kristofoi lɛ ahe kɛha henaabuamɔ koni amɛnyɛ ‘amɛwo amɛhe hewalɛ’ ni ‘aŋɔwaje amɛ.’ (Rom. 1:11, 12) Bɔni afee ni awaje wɔ kɛha Nyɔŋmɔ suɔmɔnaa nifeemɔ lɛ, Nɔyeli Kuu lɛ ejɛ suɔmɔ mli eto gbɛjianɔ koni eha wɔná hegbɛ kɛná hewalɛwoo ni wɔkɛaawo wɔ fɛɛ wɔhe hewalɛ lɛ he sɛɛ yɛ “Maŋtsɛyeli Jajelɔi ni Yɔɔ Ekãa” Kpokpaa Wulu nɔ Kpee ni baa lɛ shishi.
3 Hii Jɛmɛ Koni Oná He Sɛɛ: Ha efee oti ni ma ohiɛ akɛ ooohi jɛmɛ gbii etɛ lɛ fɛɛ. ‘Ehe baa sɛɛnamɔ kɛhaa wɔ’ kɛ́ wɔhi jɛmɛ dani alá klɛŋklɛŋ lala lɛ ni wɔhi jɛmɛ kɛyashi beni wɔɔjɛ wɔtsuiŋ wɔkɛɛ “Amen” yɛ naagbee sɔlemɔ lɛ mli lɛ. (Yes. 48:17, 18) Ehe baahia ni mɛi babaoo ato nitsumɔ ni amɛtsuɔ lɛ he gbɛjianɔ kwraa kɛtsɔ hiɛ koni amɛná be ni amɛkɛya gbii etɛ lɛ fɛɛ. Eji anɔkwale akɛ, ekolɛ efeŋ mlɛo akɛ ooobi koni onitsumɔtsɛ lɛ aŋmɛ bo gbɛ ni okaya nitsumɔ, shi wɔyɛ nɔmimaa akɛ Yehowa baaye abua bo koni ofee esuɔmɔnaa nii. (1 Yoh. 5:14, 15) Kɛ wɔtoko gbɛjianɔ jogbaŋŋ lolo kɛhako tsɔne ni wɔɔtá mli kɛya kɛ wɔɔhe lɛ, no lɛ, be ni wɔkɛbaafee nakai lɛ nɛ, ní wɔkasusu akɛ nɔ fɛɛ nɔ baanyɛ aya nɔ jogbaŋŋ. Wɔbaanyɛ wɔná nɔmimaa akɛ Yehowa baajɔɔ mɔdɛŋ ni wɔbɔɔ koni wɔya gbii etɛ lɛ fɛɛ lɛ nɔ.—Abɛi 10:22.
4 Kpa Hewalɛwoo ni Baaya nɔ lɛ Gbɛ: Ani oshi kpokpaa wulu nɔ kpee shishi pɛŋ ni ókɛɛ akɛ: “Enɛ ji kpee ni éŋɔɔ minaa fe fɛɛ!” Mɛni hewɔ ni ekolɛ onu he nakai? Nɔ ni ha ebalɛ nakai ji akɛ, ákɛ adesai ni yeee emuu lɛ, ebaanyɛ etɔ wɔ fiofio, ni wɔbaana akɛ ehe miihia ni wɔná mumɔŋ hewalɛwoo. (Yes. 40:30) Nyɛmi yoo ko kɛɛ akɛ: “Shihilɛ lɛ haa etɔɔ mi, ni kpeei haa mijajeɔ mimumɔŋ shihilɛ lɛ jogbaŋŋ ekoŋŋ, ni ehaa mináa mumɔŋ hewalɛ ni he hiaa mi lɛ. Etamɔ nɔ ni hewalɛwoo lɛ baa yɛ be mli ni ehe hiaa mi fe fɛɛ lɛ.” Ekolɛ oná henumɔi ni tamɔ nɛkɛ.
5 Jeee wiemɔi kɛ sanebimɔi pɛ anɔ wɔtsɔɔ wɔnine shɛɔ hewalɛwoo ni he hiaa nɔ, shi moŋ kɛtsɔ wɔkpeei lɛ he nibii kpakpai krokomɛi lɛ hu anɔ. Nyɛmi nuu ko wie akɛ: “Biblia mli shishitoo mlai ni yɔɔ faŋŋ ni akɛtsuɔ nii jogbaŋŋ lɛ ji nɔ ni mináa he miishɛɛ diɛŋtsɛ. Eji anɔkwale akɛ, drama srɔtoi lɛ ahe yɛ sɛɛnamɔ waa diɛŋtsɛ yɛ bɔ ni etsɔɔ bɔ ni wɔɔfee wɔná blema nɔkwɛmɔnii kpakpai kɛ nɔ ni ehiii fɛɛ lɛ he sɛɛ lɛ. Woji heei ni ajieɔ lɛ kpo lɛ ji nɔ ko ni mikpáa gbɛ be fɛɛ be, ni mináa amɛkanemɔ he miishɛɛ beni mitee shia sɛɛ kwraa.”
6 Kpeei ji gbɛjianɔtoo ko ni he hiaa ni jɛ Yehowa ŋɔɔ yɛ nɛkɛ “jaramɔ bei” nɛɛ amli. (2 Tim. 3:1) Enɛɛmɛi yeɔ ebuaa wɔ koni wɔfee toiboo wɔha ŋaawoo ni jɛ mumɔŋ nɛɛ akɛ: “Nyɛbua, nyɛdamɔa shi shiŋŋ yɛ hemɔkɛyeli lɛ mli, nyɛfea hii, ni nyɛhe awaa!” (1 Kor. 16:13) No hewɔ lɛ, nyɛhaa wɔtswaa wɔfai shi akɛ wɔbaaya koni wɔyabo kpee lɛ mli nifeemɔi srɔtoi lɛ fɛɛ toi ni wɔná hewalɛwoo babaoo ni wɔkɛaawo wɔ fɛɛ wɔhe hewalɛ lɛ mli ŋɔɔmɔ yɛ wɔ “Maŋtsɛyeli Jajelɔi ni Yɔɔ Ekãa” Kpokpaa Wulu nɔ Kpee lɛ shishi!
[Caption on page 3]
Too Gbɛjianɔ ni Oya Gbii Etɛ lɛ Fɛɛ
■ Bi koni aŋmɛ bo gbɛ ni okaya nitsumɔ.
■ Too gbɛjianɔ koni mɛi FƐƐ ni yɔɔ oweku lɛ mli lɛ aya eko.
■ Too tsɔne ni oootá mli kɛya kpee lɛ he gbɛjianɔ.