Okɛ Mumɔŋ Otii Amamɔ Ohiɛ
1 Mɛɛ hegbɛ ni yɔɔ nyam po eeeji nɛkɛ akɛ wɔɔjie Yehowa yi yɛ naanɔi fɛɛ mli! Bɔni afee ni eye ebua wɔ ni wɔnine ashɛ oti nɛɛ nɔ lɛ, wɔbaanyɛ ni wɔkɛ mumɔŋ otii ni he hiaa bianɛ lɛ amamɔ wɔhiɛ ni wɔbɔ mɔdɛŋ wɔtsu he nii koni wɔnine ashɛ nɔ. Enɛ yeɔ ebuaa wɔ koni wɔkɛ wɔhewalɛ atsu nii yɛ nilee mli. (1 Kor. 9:26) Mɛɛ otii baanyɛ afee nɔ ni onine baanyɛ ashɛ nɔ?
2 Biblia Kasemɔ: Ani osáa ohe kɛhaa asafoŋ kpee fɛɛ kpee? Kɛji nakai ni lɛ, ani otoɔ be kɛhaa saji amlipɛimɔ kɛ sane nɔjwɛŋmɔ kɛji akɛ ookase nii? Ákɛ nɔkwɛmɔnɔ lɛ, kɛji akɛ oosaa ohe kɛha daa otsi Buu-Mɔɔ Nikasemɔ kɛ Asafo Woloŋ Nikasemɔ lɛ, ani ofolɔɔ hetooi lɛ ashishi kɛkɛ aloo ogbeleɔ ŋmalɛi ni átsɛ lɛ, ni ojwɛŋɔ yiŋtoi ahewɔ ni atsɔɔ mli nakai lɛ ahe? Ani obaanyɛ okɛfee oti ni ma ohiɛ akɛ ooopɛi saji otii fioo komɛi ni yɔɔ Teokrase Sɔɔmɔ Skul lɛ mli Biblia kanemɔ ni ákɛha lɛ amli daa otsi? Mumɔŋ saji amlipɛimɔ ni tamɔ nɛkɛ biɔ be kɛ mɔdɛŋbɔɔ, shi ekɛ mumɔŋ nyɔmɔwoi babaoo baa.—Abɛi 2:4, 5.
3 Asafoŋ Kpeei: Oti kroko ji ni oya asafoŋ kpeei enumɔ lɛ fɛɛ be fɛɛ be. Jɛmɛ ni oooshɛ mra koni okɛ nanemɛi heyelilɔi abɔ, koni oná shishijee lala kɛ sɔlemɔ lɛ mli gbɛfaŋnɔ lɛ yeɔ ebuaa ni etswaa mumɔ ni yɔɔ asafo lɛ mli lɛ emaa shi. Esa kɛ wɔbɔ mɔdɛŋ ni wɔha saji ahetoo yɛ kpee fɛɛ kpee shishi koni wɔha bɔ ni wɔhaa saji ahetoo lɛ aya hiɛ. Ekolɛ obaanyɛ otsɔɔ bɔ ni ŋmalɛ ko ni yɔɔ kuku lɛ mli lɛ kɔɔ sane lɛ he ehaa, loo bɔ ni abaanyɛ ni akɛ sane lɛ ato daa gbi shihilɛ mli saji ahe aha.—Heb. 10:24, 25.
4 Shiɛmɔ Nitsumɔ: Wɔ sɔɔmɔ lɛ yaa hiɛ babaoo kɛji akɛ wɔkɛ otii mamɔ wɔhiɛ. Ani oyɛ ŋmɛlɛtswai oti ko ni ma ohiɛ ni oto he gbɛjianɔ akɛ okɛbaatsu nii yɛ sɔɔmɔ lɛ mli daa nyɔŋ nɔ? Mɛi komɛi naa akɛ enɛ yeɔ ebuaa. Aloo ekolɛ obaanyɛ oha osɔɔmɔ lɛ fã ko aya hiɛ, tamɔ Biblia lɛ ni okɛaatsu nii yɛ shia-kɛ-shia nitsumɔ lɛ mli, sɛɛsaramɔi ni sɛɛnamɔ yɔɔ he ni ooofee, mɔdɛŋ ni ooobɔ akɛ oooje Biblia mli nikasemɔ shishi, aloo onitsɔɔmɔi ni oooha emɔ shi jogbaŋŋ?
5 Fɔlɔi, ani nyɛmiiwo nyɛbii lɛ hewalɛ ni amɛkɛ otii amamɔ amɛhiɛ yɛ Yehowa sɔɔmɔ mli? Nyɛyea nyɛbuaa amɛ ni amɛna akɛ ní amɛaasɔmɔ akɛ gbɛgbalɔ, maŋsɛɛ sanekpakpa shiɛlɔ, aloo Betel weku lɛ mlinyo lɛ ji gbɛ ni hi fe fɛɛ ni amɛkɛaatsɔɔ bɔ ni amɛ hiɛsɔɔ kɛha Yehowa lɛ mli kwɔ ha.—Jaj. 12:1.
6 Yɛ be mli ni wɔpɛiɔ wɔ nitsumɔi amli wɔkwɛɔ, ni wɔkɛ mumɔŋ otii mamɔɔ wɔhiɛ, koni wɔtsu he nii ni wɔnine ashɛ nɔ lɛ, ebaaha wɔná miishɛɛ babaoo yɛ wɔsɔɔmɔ lɛ mli ni wɔbaatsɔmɔ hewalɛwoo jɛɛhe wɔha mɛi krokomɛi.—Rom. 1:12.