Feemɔ Ohe Sanegbalɔ!
1 Bɔni afee ni wɔtsu wɔnitsumɔ akɛ wɔshiɛ ni wɔfee kaselɔi lɛ he nii lɛ, esa akɛ wɔgba mɛi krokomɛi saji. (Mat. 24:14; 28:19, 20) Sanegbaa baanyɛ afee nɔ ni wa yɛ nanemɛi ateŋ po. Mɛni baanyɛ aye abua wɔ koni wɔgba gbɔi sanekpakpa lɛ?
2 Gbɔ Batsɔ Naanyo: Bɔɔ mɔdɛŋ ni okɛ ohe awo mɛi ni oyaa amɛŋɔɔ yɛ sɔɔmɔ lɛ mli lɛ ashihilɛ mli. Bɔ ni je lɛ yɔɔ ŋmɛnɛ hewɔ lɛ, anuɔ shishi akɛ mɛi komɛi ayiŋ baafee amɛ kɔshikɔshi, amɛbaashe gbɔi agbeyei po. Enɛ baanyɛ atsĩ sanegbaa naa. Te ooofee tɛŋŋ oye shishijee gbeyei ni mɛi ni okɛ amɛ kpeɔ lɛ sheɔ bo lɛ nɔ kunim? Dani wɔɔje shishi wɔwie po lɛ, gbɛ kome ni wɔtsɔɔ nɔ wɔgbaa sane ji kɛtsɔ wɔ hiɛshikamɔ yɛ gbɔmɔtsoŋ hesaamɔ mli lɛ nɔ. Wɔ atade ni wɔwo lɛ fɛfɛo kɛ bulɛ ni yɔɔ wɔhe lɛ yeɔ ebuaa ni ebaa gbeyeishemɔ shi.—1 Tim. 2:9, 10.
3 Nɔ kroko ni yeɔ buaa sanegbaa ji miishɛɛ kɛ naanyobɔɔ su. Enɛ yeɔ ebuaa ni ehaa mɛi krokomɛi ahe jɔɔ amɛ ni ehaa amɛfeɔ mɛi ni sumɔɔ akɛ amɛaabo sane lɛ toi. Hesaamɔ kpakpa he miihia yɛ enɛ gbɛfaŋ. Kɛji akɛ wɔle nɔ ni wɔbaawie lɛ fɛɛ jogbaŋŋ lɛ, ehaaa wɔshe gbeyei. Ni nɛkɛ wɔjwɛŋmɔŋ toiŋjɔlɛ nɛɛ baanyɛ agbala mɛi kɛba wɔ shɛɛ sane lɛ he. Yoo ko wie enɛ yɛ Odasefonyo ko saramɔ he, akɛ: “Nɔ ni mikaiɔ yɛ ehiɛ ŋmɔlɔŋmɔlɔ lɛ he ji toiŋjɔlɛ lɛ. Etée mimiishɛɛ shi.” Enɛ gbele gbɛ koni yoo lɛ abo sanekpakpa lɛ toi.
4 Sui ni Gbalaa Mɔ: Ehe miihia ni wɔfó mɛi krokomɛi anɔ mli diɛŋtsɛ. (Fil. 2:4) Gbɛ kome ji ni wɔ kome wɔkahe sanegbaa lɛ. Yɛ anɔkwale mli lɛ, sanegbaa kɔɔ toiboo hu he. Kɛji akɛ wɔfɔ̃ nine wɔtsɛ mɛi ni boɔ wɔ toi lɛ koni amɛtsɔɔ amɛjwɛŋmɔ ni wɔkɛ miishɛɛ bo nɔ ni amɛkɛɔ lɛ toi lɛ, amɛnuɔ he akɛ wɔsusuɔ amɛhe. No hewɔ lɛ, kɛji akɛ otoibolɔi lɛ wie lɛ, kaaye oyai ni otsɔ sanegbaa lɛ kɛtee oshiɛmɔ lɛ nɔ. Jiemɔ amɛyi kɛji akɛ ooonyɛ ofee nakai yɛ anɔkwayeli fɛɛ mli, koni obɔ mɔdɛŋ odamɔ nɔ ni amɛkɛɔ lɛ nɔ owie. Kɛji akɛ amɛwiemɔ jieɔ sane ko ni amɛnyaa he waa kpo lɛ, tsakemɔ osanegbaa lɛ mli koni ekɔ amɛhiamɔ nii lɛ he.
5 Hiɛshikamɔ kɛ heshibaa jwɛŋmɔ haa sanegbaa yaa nɔ jogbaŋŋ. (Abɛi 11:2; Bɔfoi lɛ Asaji 20:19) Gbɔmɛi ba Yesu ŋɔɔ ejaakɛ ‘ehe jɔ ni ebaa ehe shi kɛjɛɔ etsui mli.’ (Mat. 11:29) Yɛ gbɛ kroko nɔ lɛ, henɔwomɔ su shwieɔ mɛi kɛyaa sɛɛ. No hewɔ lɛ, eyɛ mli akɛ wɔyɛ nɔmimaa diɛŋtsɛ akɛ wɔhiɛ anɔkwale lɛ moŋ, shi wɔkɛ nilee kpooɔ wiemɔ ni bulɛ bɛ mli.
6 Shi, kɛji akɛ mɔ lɛ wiemɔ jieɔ hemɔkɛyelii ni kɛ nɔ ni Biblia lɛ tsɔɔ lɛ kpãaa gbee lɛ kpo hu? Ani gbɛnaa nii kã wɔnɔ akɛ wɔjaje lɛ? Hɛɛ, yɛ be ni sa mli, shi esaaa akɛ wɔbɔɔ mɔdɛŋ akɛ wɔɔfee nakai beni wɔtee jɛmɛ klɛŋklɛŋ kwraa lɛ. Bei pii lɛ sɛɛnamɔ yɛ he akɛ wɔɔwie saji ni wɔkɛ wɔ toibolɔ lɛ kpãa gbee yɛ he lɛ ahe dani wɔkɛ Biblia mli tsɔɔmɔi ni eeewa kɛha lɛ akɛ eeekpɛlɛ nɔ lɛ aha lɛ. Enɛ biɔ tsuishitoo kɛ ŋaalee. Paulo to okadi kpakpa yɛ enɛ mli beni eyeɔ kojolɔi ni yɔɔ Areopago lɛ odase lɛ.—Bɔfoi lɛ Asaji 17:18, 22-31.
7 Nɔ ni fe fɛɛ lɛ, suɔmɔ ni pɛsɛmkunya bɛ mli baaye abua wɔ koni wɔfee sanegbalɔi kpakpai. Taakɛ Yesu ji lɛ, esa akɛ wɔnu he wɔha gbɔmɛi ni “etɔ amɛ ni amɛfee yuyaa tamɔ tooi ni bɛ kwɛlɔ lɛ.” (Mat. 9:36) Enɛ kanyaa wɔ koni wɔkɛ sanekpakpa lɛ ayaha amɛ koni wɔye wɔbua amɛ ni amɛnyiɛ gbɛ ni kɛ mɔ yaa wala mli lɛ nɔ. Wɔ nɔ̃ lɛ ji suɔmɔ shɛɛ sane, no hewɔ lɛ, nyɛhaa wɔyaa nɔ wɔwiea he yɛ suɔmɔ gbɛ nɔ. Kɛji akɛ wɔfee nakai lɛ, wɔkaseɔ Yehowa Nyɔŋmɔ kɛ Yesu Kristo—Sanegbalɔi ni fe fɛɛ yɛ jeŋ muu fɛɛ lɛ.