Maŋtsɛyeli Asa Tsumaa He Gbɛjianɔtoo lɛ Miiya Hiɛ
1 Yɛ afi 1983 yɛ “Maŋtsɛyeli Ekomefeemɔ” Kpokpaa Wulu nɔ Kpeei ni afee yɛ United States lɛ shishi lɛ mli lɛ, atswa adafi akɛ abaato fotro krɛdɛɛ ko he gbɛjianɔ koni akɛfi Maŋtsɛyeli Asai ni yɔɔ United States kɛ Canada lɛ amaamɔ kɛ amɛsaamɔ sɛɛ. No mli lɛ, wɔleee jɔɔmɔi ni baajɛ nibii bibii nɛɛ ashishijee mli aba. Wɔje shishi wɔyɔse nɔ ni Lala 92:5 lɛ tsɔɔ lɛ babaoo, akɛ: “Ejaakɛ bo, Yehowa, oha mimii eshɛ mihe yɛ onifeemɔ nii lɛ ahewɔ, ni mimli efili mi yɛ oninenaa nitsumɔi lɛ ahewɔ.”
2 Wɔmli filiɔ wɔ waa bianɛ yɛ nɔ ni ayaa nɔ atsuɔ lɛ hewɔ. Ŋmɛnɛ, jeŋ muu fɛɛ Maŋtsɛyeli Asa tsumaa he gbɛjianɔtoo miiya hiɛ kɛ foi. Wɔ fɛɛ wɔyɛ hegbɛ akɛ wɔnáa nɛkɛ nitsumɔ nɛɛ mli gbɛfaŋnɔ yɛ gbɛ kome loo gbɛ kroko nɔ. Wɔfeɔ nakai kɛtsɔɔ onia fioo loo nɔ̃ ni fá ni wɔtsuɔ koni wɔkɛye wɔbua ni akɛmamɔ jamɔhei babaoo yɛ jeŋ fɛɛ lɛ nɔ. Nyɛmimɛi babaoo hu jɛɔ amɛsuɔmɔ mli amɛkɛ amɛ tsumaa dadei, kɛ agbɛnɛ hu amɛbe, nyɛmɔi, kɛ hesaai woɔ nɛkɛ nitsumɔi nɛɛ amli. Omanye ni gbɛjianɔtoo muu nɛɛ fɛɛ eye lɛ jɛ Yehowa gbɛtsɔɔmɔ, sɛɛfimɔ, kɛ jɔɔmɔi babaoo ni eba wɔ mɔdɛŋbɔɔ yɛ ekomefeemɔ mli lɛ nɔ lɛ hewɔ.—Lala 127:1.
3 Nitsumɔhe niji babaoo enyiɛ nɔkwɛmɔnɔ ni ato he gbɛjianɔ aha asafoi ni yɔɔ United States lɛ sɛɛ. Ato adeka ko ama shi yɛ Maŋtsɛyeli Asai anɔ yɛ maji pii anɔ, ni shiɛlɔi kɛ onia ni amɛtsuɔ kɛha Maŋtsɛyeli Asa Onia lɛ woɔ mli. Yɛ United States lɛ, Wɔ Maŋtsɛyeli Sɔɔmɔ kɛha March 1997 lɛ tswa tsakemɔ ko yɛ nɛkɛ gbɛjianɔtoo nɛɛ mli lɛ he adafi. Ekɛɛ akɛ: ‘Kɛjɛ be mli ni ato Asafo Maŋtsɛyeli Asa Tsumaa Fotro lɛ he gbɛjianɔ yɛ afi 1983 kɛbaa nɛɛ, nyɛmimɛi lɛ ejɛ amɛsuɔmɔ mli amɛtsu onia babaoo amɛkɛye amɛbua, ni eha anyɛ akɛ shika efa kɛha Maŋtsɛyeli Asa tsumaa. Gbɛjianɔtoo nɛɛ he eba sɛɛnamɔ kɛha asafoi aaafee 2,700 momo yɛ maŋ nɛɛ mli. Kulɛ asafoi babaoo nyɛŋ amamɔ Maŋtsɛyeli Asai heei loo ni amɛaasaa nɔ ni sa saamɔ lɛ. Agbɛnɛ ehe ebahia ni akɛ shika ni akɛha nɛɛ eko afa asafoi ni ehia amɛ waa lɛ. Asafo lɛ kɛ asafoi ni nyɛ oniatsumɔ lɛ he baa sɛɛnamɔ kɛhaa amɛ lɛ ahiɛ sɔɔ sɛɛfimɔ ni nyɛkɛhaa gbɛjianɔtoo nɛɛ lɛ waa diɛŋtsɛ.”
4 Nakai adafitswaa lɛ fee tamɔ ninefɔɔ koni akɛ he awo Maŋtsɛyeli Asa tsumaa he gbɛjianɔtoo ni yaa nɔ oyayaayai lɛ mli. Abaalɛɛ Maŋtsɛyeli Asa Tsumaa Fotro lɛ mli koni ekɔ nyɛmimɛi ni yɔɔ maji krokomɛi anɔ lɛ ahiamɔ nii ahe, koni aya nɔ akɛ shika afa kɛha Maŋtsɛyeli Asa tsumaa yɛ United States. Sane ni nyiɛ sɛɛ ni aŋma yɛ August 1997 Wɔ Maŋtsɛyeli Sɔɔmɔ kɛha United States lɛ mli lɛ jaje akɛ: “Bɔ ni Maŋtsɛyeli Asa tsumaa he hiaa ha lɛ miiya nɔ yɛ jeŋ fɛɛ. Ato asafoi heei 3,288 yɛ nyɛsɛɛ sɔɔmɔ afi ni ho lɛ mli. Asafoi nɛɛ babaoo yɛ Afrika, Asia, Amerika Teŋgbɛ kɛ Wuoyigbɛ, kɛ Europa Bokagbɛ.”
5 Mɛni ejɛ mli kɛba kɛjɛ nakai be lɛ mli kɛbaa? Afi 2001 Yearbook lɛ bɔ amaniɛ akɛ: “Yɛ gbɛjianɔtoo nɛɛ hewɔ lɛ, ágbe Maŋtsɛyeli Asai 453 naa yɛ maji 30 mli, ni aama 727 krokomɛi. Áje gbɛ agbala jwɛŋmɔ kɛtee bɔ ni ehe hiaa ni aná Maŋtsɛyeli Asa tsũ henɔ kome kɛha maŋ fɛɛ maŋ ni kɛ maŋ lɛ mli tsumaa he nibii kɛ gbɛ̀i tsuɔ nii lɛ nɔ. Yɛ Kenya lɛ, akɛ tɛi ni áko tsuɔ nii; yɛ Togo lɛ, akɛ ŋtayaa loo brikishi tsuɔ nii; yɛ Cameroon lɛ akɛ blɔkii ni akɛ kɔŋkret fee, ni akɛ kɔŋkret lɛ nɔŋŋ eko kpaa he ní ehe gbɛi lɛ tsuɔ nii. Nyɛmimɛi ni yɔɔ maŋ lɛ mli lɛ ahe saa oya yɛ nitsumɔ he ŋaalee nɛɛ mli, ni amɛnyɛɔ amɛtsuɔ gbɛnaa nii ni he hiaa ni akɛwoɔ amɛdɛŋ yɛ maŋ lɛ gbɛjianɔtoo naa lɛ he nii.”
6 Abaanyɛ ana odaseyeli ni tsɔɔ akɛ Yehowa jɔɔmɔ yɛ gbɛjianɔtoo nɛɛ nɔ lɛ yɛ Afrika shikpɔŋ wulu lɛ nɔ. Yɛ be mli ni okwɛɔ Maŋtsɛyeli Asai ni ámamɔ lɛ ekomɛi ahe mfonirii lɛ, susumɔ hewalɛ ni nɛkɛ tsumaa nɛɛ ená yɛ Yehowa Odasefoi anitsumɔ lɛ nɔ lɛ he okwɛ! Enɛ ji anɔkwale yɛ hei srɔtoi etɛ ni jeɔ kpo faŋŋ—ekomefeemɔ ni yɔɔ wɔ jeŋ muu fɛɛ nyɛmifeemɔ lɛ teŋ, bɔ ni esaa maŋbii lɛ ahe ehaa, kɛ yifalɛ ni yaa hiɛ ni baa asafoŋ kpeei ashishi lɛ. Yɛ be mli ni nɔ ni aŋma ahɔ mli nɛɛ maa Maŋtsɛyeli Asai ni amamɔ yɛ Afrika lɛ anɔ mi lɛ, Wɔ Maŋtsɛyeli Sɔɔmɔ ni baaba wɔsɛɛ lɛ baagbala jwɛŋmɔ kɛya bɔ ni Maŋtsɛyeli Asa tsumaa gbɛjianɔtoo lɛ yaa hiɛ yɛ je lɛŋ maji krokomɛi anɔ lɛ nɔ.
[Caption on page 3]
CENTRAL AFRICAN REPUBLIC
Bimbo, Bangui
Begoua, Bangui
[Caption on page 4]
Ukonga, Tanzania
Accra, Ghana
Salala, Liberia
Allada, Benin—tsutsu Maŋtsɛyeli Asa
Allada, Benin—Maŋtsɛyeli Asa hee
Karoi, Zimbabwe
[Caption on page 5]
Kpeme, Togo
Sokodé, Togo
Fidjrosse, Benin
[Caption on page 6]
Lyenga, Zambia—tsutsu Maŋtsɛyeli Asa
Lyenga, Zambia—Maŋtsɛyeli Asa hee
Kinshasa, Congo
Musambira, Rwanda