Hewalɛwoo ni Jɛ Suɔmɔ Mli Koni Abo Kɔkɔbɔɔ He Nɔkwɛmɔnii Kɛha Wɔbe Nɛɛ Toi
Wɔ fɛɛ wɔbaanyɛ wɔwaje wɔfaishitswaa akɛ wɔbaahiɛ wɔ emuuyeli lɛ mli kɛtsɔ nii ni wɔkase yɛ Biblia drama ni ajie yɛ Warning Examples for Our Day (Kɔkɔbɔɔ He Nɔkwɛmɔnɔ Kɛha Wɔbe Nɛɛ) vidio lɛ mli lɛ toi ni wɔɔbo lɛ nɔ. Dani obaakwɛ lɛ, ofainɛ kanemɔ 4 Mose yitso 25 lɛ kɛ saji ni kɔɔ he ni yɔɔ Insight on the Scriptures wolo lɛ Kpo 2, baafa 419, kukuji 3-5 lɛ. No sɛɛ lɛ ha sanebimɔi nɛɛ ahetoo: Namɛi ji Moabbii lɛ, ni mɛni hewɔ Yehowa kɛɛ Mose koni ekawuu ta eshi amɛ lɛ? (5 Mose 2:9) Yɛ mɛɛ gbɛ nɔ Bileam tsɔ̃ ŋaa koni ekɛ Moabbii lɛ atsu nii kɛkpata Israel maŋ lɛ hiɛ? Mɛni hewɔ esaaa akɛ wɔhiɛ kpaa nɔ akɛ Israelbii lɛ ateŋ mɛi babaoo nyɛɛɛ adamɔ kaa ko ni he hiaa waa lɛ naa beni eshwɛ fioo ni amɛaabote Shiwoo Shikpɔŋ lɛ nɔ lɛ?—1 Kor. 10:11, 12.
Beni okwɛɔ Warning Examples vidio lɛ, susumɔ shihilɛ mli hei ejwɛ ni esa akɛ wɔgbala wɔjwɛŋmɔ kɛya nɔ waa yɛ ŋmɛnɛŋmɛnɛ beaŋ, kɛji akɛ wɔbaaye Nyɔŋmɔ anɔkwa ni wɔná ehiɛ duromɔ lɛ he. (1) Su: Israelbii komɛi jie su fɔŋ kpo amɛtsɔɔ yɛ Yehowa kɛ egbɛjianɔtoo lɛ he yɛ mɛɛ gbɛ nɔ? Yɛ no najiaŋ lɛ, mɛɛ su esa akɛ wɔbɔ mɔdɛŋ ni wɔjie lɛ kpo? (2) Naanyobɔɔi: Mɛni hewɔ Yehowa sumɔɔɔ akɛ Israelbii lɛ kɛ Moabbii lɛ bɔɔ naanyo lɛ? (2 Mose 34:12; Abɛi 13:20) Mɛni hewɔ esa akɛ wɔkɛ nilee ahala wɔnanemɛi lɛ? (3) Jeŋbai: Mɛɛ esha ni hiɛdɔɔ yɔɔ mli naanyobɔɔ fɔŋ ha Israelbii aaafee 23,000 kɛ amɛhe wo mli lɛ? (1 Kor. 10:8) Ŋmɛnɛ, mɛni etsɔ̃ Nyɔŋmɔ webii komɛi tsɔne ni amɛkɛ amɛhe eyawo bɔlɛnamɔ mli jeŋba shara mli, shi mɛɛ gbɛ nɔ wɔɔtsɔ wɔbu wɔhe? (4) Jamɔ: Mɛɛ gbɛ nɔ aka Israelbii lɛ yɛ bɔ ni amɛjamɔ lɛ he tse ha lɛ he yɛ? Mɛɛ wɔŋjamɔ henɔ ko ni yɔɔ nigii ekolɛ mɛi komɛi baaŋmɛɛ amɛhe amɛha ŋmɛnɛ, shi mɛɛ gbɛ nɔ wɔɔtsɔ wɔkpoo?—Kol. 3:5.
Yɛ drama lɛ mli lɛ, mɛɛ gbɛ nɔ atsɔ awo Yamin jeŋba kpakpa mlihiɛmɔ lɛ he nyɔmɔ yɛ? Mɛɛ hewalɛwoo ni jɛ suɔmɔ mli Nɔyeli Kuu lɛ kɛhaa anɔkwa Kristofoi fɛɛ kɛtsɔ vidio nɛɛ nɔ? Kɛ́ oji weku yitso lɛ, mɛni hewɔ osusuɔ akɛ ebaafee nɔ ni nilee yɔɔ mli akɛ okɛ oshiabii lɛ aaakwɛ vidio nɛɛ be kɛ beaŋ lɛ?