Bɔ ni Asafo Woloŋ Nikasemɔ Nɔkwɛlɔi Jieɔ Mɔ Hesusumɔ Kpo
1 Ato Asafo Woloŋ Nikasemɔ lɛ he gbɛjianɔ koni eha “anyɛ agbala jwɛŋmɔ kɛya mɛi aŋkroaŋkroi ni yɔɔ mli lɛ fɛɛ amumɔŋ hiɛyaa nɔ. . . . Wɔnaa Yehowa suɔmɔ kɛ mlihilɛ kɛ mlijɔlɛ ni ekɛkwɛɔ ewebii lɛ yɛ enɛ mli.” (om bf. 75; Yes. 40:11) Asafo woloŋ nikasemɔ nɔkwɛlɔ (overseer) lɛ tsuɔ gbɛfaŋnɔ ko ni he hiaa yɛ jwɛŋmɔ ni agbalaa kɛyaa mɛi anɔ nɛɛ mli lɛ he nii.
2 Yɛ Asafo Woloŋ Nikasemɔhe Lɛ: Akɛni aje gbɛ afee asafo woloŋ nikasemɔ kui lɛ bibii hewɔ lɛ, asafo woloŋ nikasemɔ nɔkwɛlɔ lɛ nyɛɔ eleɔ ekuu lɛ mli bii lɛ jogbaŋŋ. (Abɛi 27:23) Be pii lɛ, enáa hegbɛ akɛ ekɛ mɛi agba sane dani nikasemɔ lɛ aje shishi loo yɛ no sɛɛ daa otsi. Yɛ nyɔɔŋ kome mli lɛ, ekolɛ ebaanyɛ ekɛ kɛ hoo lɛ mɛi ni yɔɔ ekuu lɛ mli lɛ ateŋ mɔ fɛɛ mɔ agba sane. Enɛ yeɔ ebuaa asafo woloŋ nikasemɔ lɛ mli bii lɛ ni amɛnáa miishɛɛ akɛ amɛaabɛŋkɛ lɛ kɛji amɛkɛ kaai miikpe loo kɛ́ hewalɛwoo he miihia amɛ.—Yes. 32:2.
3 Asafo woloŋ nikasemɔ nɔkwɛlɔ lɛ bɔɔ mɔdɛŋ koni ewo mɛi fɛɛ ni yɔɔ kuu lɛ mli lɛ hewalɛ koni amɛkɛ amɛhe awo nikasemɔ lɛ mli. Gbɛ kome ni etsɔɔ nɔ efeɔ enɛ ji, kɛtsɔ nikasemɔ lɛ nɔ ni ekwɛɔ yɛ mlihilɛ kɛ mlijɔlɛ gbɛ nɔ lɛ nɔ. (1 Tes. 2:7, 8) Ebɔɔ mɔdɛŋ koni eha mɛi fɛɛ kɛ amɛhe awo nikasemɔ lɛ mli, ni gbekɛbii lɛ hu fata he. Kɛ́ efeɔ mɛi komɛi hiɛgbele akɛ amɛaaha sane hetoo lɛ, ebaanyɛ eye ebua amɛ yɛ teemɔŋ kɛtsɔ gbɛjianɔ ni eeetsɔ hiɛ eto eha amɛ koni amɛkane ŋmalɛ ko loo ni eha amɛha kuku pɔtɛɛ ko hetoo lɛ nɔ. Aloo ekolɛ ebaatsɔɔ amɛ bɔ ni amɛaafee amɛha hetoo yɛ amɛ diɛŋtsɛ amɛwiemɔi amli.
4 Kɛ́ asafo woloŋ nikasemɔ nɔkwɛlɔ sɛɛkwɛlɔ lɛ ji asafoŋ sɔɔlɔ lɛ, nɔkwɛlɔ lɛ toɔ gbɛjianɔ ehaa lɛ koni ekwɛ nikasemɔ lɛ nɔ shikome yɛ daa nyɔji enyɔ mli. Enɛ yeɔ ebuaa nɔkwɛlɔ lɛ koni eyɔse sɛɛkwɛlɔ lɛ koni ekɛ ŋaawoi ni yeɔ ebuaa aha lɛ. Mɛɛ gbɛjianɔtoo kpakpa ni baaye abua nyɛmimɛi koni eha amɛnitsɔɔmɔ he ŋaai aya hiɛ po enɛ ji nɛkɛ!—Tito 1:9.
5 Yɛ Shiɛmɔ Nitsumɔ lɛ Mli: Asafo woloŋ nikasemɔ nɔkwɛlɔ lɛ gbɛnaa nii titrii ni kã enɔ lɛ ateŋ ekome ji ni enyiɛ hiɛ yɛ sanekpakpa jajemɔ nitsumɔ lɛ mli. (4 Mose 27:16, 17) Etoɔ gbɛjianɔ ni anyɛɔ atsuɔ he nii kɛha shia kɛ shia odaseyeli, ni ebɔɔ mɔdɛŋ koni eye ebua mɛi fɛɛ ni yɔɔ kuu lɛ mli lɛ koni amɛná miishɛɛ yɛ amɛsɔɔmɔ nitsumɔ lɛ mli. (Efe. 4:11, 12) Bɔni afee ni enyɛ etsu enɛ he nii lɛ, ekɛfeɔ oti ni ma ehiɛ akɛ ekɛ kuu lɛ mli bii lɛ ateŋ mɔ fɛɛ mɔ baaya shiɛmɔ. Ekɛ sɔɔmɔ nitsumɔ nɔkwɛlɔ feɔ ekome kɛtoɔ gbɛjianɔ hu koni shiɛlɔi ni yɔɔ niiashikpamɔ waa lɛ aye abua mɛi ni baasumɔ ni amɛná hiɛyaa yɛ amɛsɔɔmɔ nitsumɔ lɛ fãi komɛi amli lɛ.
6 Ákɛ Nɔkwɛlɔ ni Yɔɔ Suɔmɔ: Asafo woloŋ nikasemɔ nɔkwɛlɔ lɛ náa mɛi ni yɛ amɛshihilɛi ahewɔ lɛ, gbɛfaŋnɔ fioo pɛ amɛnáa yɛ shiɛmɔ nitsumɔ lɛ mli lɛ ahe miishɛɛ. Ekwɛɔ akɛ mɛi ni amɛhewalɛ eba shi kwraa yɛ gbɔlɛ loo hela ni eha amɛka tsuŋ hewɔ, kɛ mɛi ni hela ni mli wa loo pilamɔ eha amɛhewalɛ eba shi yɛ be kukuoo mli lɛ ale gbɛjianɔ ni ŋmɛɔ amɛ gbɛ koni amɛnyɛ amɛbu kɛjɛ minitii 15 kɛyaa he akɔntaa akɛ be ni amɛye yɛ shiɛmɔ nitsumɔ lɛ mli, kɛ́ amɛnyɛɛɛ amɛná ŋmɛlɛtswaa muu lɛ. (Asafoŋ Sɔɔmɔ Ajinafoi Akuu lɛ tsɔɔ mɔ ni he saa kɛha gbɛjianɔtoo nɛɛ.) Ejwɛŋɔ mɛi ni yɔɔ kuu lɛ mli ni ekolɛ amɛkpa shiɛmɔyaa lɛ ahe, ni ebɔɔ mɔdɛŋ koni eye ebua amɛ ni amɛbɔi asafo lɛ kɛ bɔɔ ekoŋŋ.—Luka 15: 4-7.
7 Kwɛ bɔ ni wɔdaa shi yɛ bɔ ni asafo woloŋ nikasemɔ nɔkwɛlɔi jɛɔ suɔmɔ mli amɛjieɔ mɔ hesusumɔ kpo lɛ he wɔhaa! Jwɛŋmɔ ni amɛgbalaa kɛyaa mɛi anɔ lɛ yeɔ ebuaa ni ‘wɔ fɛɛ wɔfeɔ ekome yɛ hemɔkɛyeli lɛ mli, ni wɔfeɔ nuu ni eye emuu yɛ Kristo dalɛ muu lɛ susumɔ naa.’—Efe. 4:13.