Bɔ ni Asafo Woloŋ Nikasemɔ lɛ Yeɔ Kɛbuaa Wɔ
1. Mɛɛ gbɛ nɔ kpeei enumɔ ni wɔyaa daa otsi lɛ yeɔ kɛbuaa wɔ?
1 Esoro bɔ ni afeɔ asafoŋ kpeei enumɔ ni wɔfeɔ lɛ ateŋ eko fɛɛ eko kɛ yiŋtoo hewɔ ni afeɔ. Ni kɛlɛ, fɛɛ yeɔ amɛbuaa wɔ ni ‘wɔyɔseyɔseɔ wɔhe, koni wɔhiɛ adɔ suɔmɔ kɛ nitsumɔi kpakpai ahe.’ (Heb. 10:24, 25) Mɛni haa esoroɔ Asafo Woloŋ Nikasemɔ gbɛjianɔtoo lɛ, ni mɛni ji sɛɛnamɔi ni wɔnáa kɛjɛɔ mli lɛ ekomɛi?
2. Akɛni mɛi ni yaa woloŋ nikasemɔ lɛ ayi faaa hewɔ lɛ, mɛɛ sɛɛnamɔi anáa kɛjɛɔ mli?
2 Eyeɔ Kɛbuaa Wɔ Koni Wɔya Hiɛ yɛ Mumɔŋ: Mɛi ayibɔ ni yaa woloŋ nikasemɔ lɛ faaa kwraa kɛ́ akɛto mɛi ayibɔ ni baa asafoŋ kpeei krokomɛi lɛ he. Enɛ haa efeɔ mlɛo kɛhaa wɔ akɛ wɔkɛ mɛi krokomɛi aaabɔ naanyo ní no aye abua wɔ yɛ mumɔŋ. (Abɛi 18:24) Ani obɔ mɔdɛŋ akɛ ooole mɛi fɛɛ ni yɔɔ woloŋ nikasemɔ kuu mli ní oyɔɔ lɛ, ni ekolɛ obi ni amɛteŋ mɔ fɛɛ mɔ kɛ bo aya shiɛmɔ? Woloŋ nikasemɔ gbɛjianɔtoo lɛ yeɔ ebuaa woloŋ nikasemɔ nɔkwɛlɔ lɛ ni eleɔ shihilɛ pɔtɛɛ mli ni mɛi ni yɔɔ ekuu lɛ mli lɛ yɔɔ, ni ekɛ hewalɛwoo haa amɛteŋ mɔ fɛɛ mɔ.—Abɛi 27:23.
3. Mɛɛ gbɛ nɔ woloŋ nikasemɔ lɛ haa Biblia mli nikaselɔi baa kpee lɛ ni amɛhaa sane hetoo hu?
3 Ani okɛɛ o-Biblia mli nikaselɔi lɛ koni amɛfata ohe kɛya woloŋ nikasemɔ lɛ? Mɛi ni yɔɔ wiemɔ lɛ he miishɛɛ ni shashaoɔ shi akɛ amɛbaaba asafoŋ kpeei lɛ baaná lɛ mlɛo akɛ amɛaaya kpee ní mɛi fioo pɛ yaa, titri lɛ kɛ́ afee yɛ mɔ ko shĩa. Naanyobɔɔ su ni yɔɔ jɛmɛ lɛ haa gbekɛbii kɛ mɛi heei fɛɛ náa lɛ mlɛo akɛ amɛaaha sane hetoo. Ni akɛni kuu lɛ mli bii ayi faaa hewɔ lɛ, ehaa wɔnáa hegbɛi babaoo kɛhaa sane hetoo ni wɔjieɔ Yehowa yi.—Lala 111:1.
4. Mɛɛ gbɛ̀i anɔ woloŋ nikasemɔ lɛ baanyɛ afee nɔ ni sa kɛha wɔ?
4 Bei pii lɛ afeɔ woloŋ nikasemɔi lɛ yɛ shikpɔŋkuku lɛ mli hei ni baahi aha shiɛlɔi lɛ. Eyɛ mli akɛ anyɛŋ akɛ mɛi fɛɛ awo kuu ko ni bɛŋkɛ amɛ fe fɛɛ lɛ mli moŋ, shi ekolɛ kɛ́ wɔtee woloŋ nikasemɔ kuu mli ni akɛwɔ ewo lɛ, ehaŋ wɔya shɔŋŋ tamɔ wɔsafoŋ kpeei krokomɛi lɛ. He ni afeɔ woloŋ nikasemɔ lɛ yɛ lɛ hu baanyɛ afee he ni sa ní abaanyɛ akpe yɛ jɛmɛ kɛya shiɛmɔ.
5. Mɛɛ gbɛ nɔ woloŋ nikasemɔ nɔkwɛlɔ lɛ baanyɛ aye abua wɔ yɛ shiɛmɔ nitsumɔ lɛ mli?
5 Yelikɛbuamɔ Kɛha Shiɛmɔ Nitsumɔ Lɛ: Woloŋ nikasemɔ nɔkwɛlɔ lɛ yɛ he miishɛɛ akɛ eeeye ebua ekuu lɛ mli bii lɛ fɛɛ ni amɛkɛ amɛhe awo shiɛmɔ nitsumɔ lɛ mli jogbaŋŋ kɛ miishɛɛ, ní amɛfee nakai daa. No hewɔ lɛ, ebɔɔ mɔdɛŋ akɛ ekɛ ekuu lɛ mli bii ateŋ mɔ fɛɛ mɔ aya shiɛmɔ, ni eyeɔ ebuaa amɛ yɛ shiɛmɔ nitsumɔ lɛ fãi srɔtoi lɛ fɛɛ amli. Kɛ́ ona akɛ shiɛmɔ nitsumɔ lɛ fã pɔtɛɛ ko, tamɔ sɛɛkuu-kɛsaramɔ feemɔ wa kɛha bo lɛ, ha owoloŋ nikasemɔ nɔkwɛlɔ lɛ ale. Ekolɛ ebaanyɛ eto gbɛjianɔ koni okɛ shiɛlɔ ko ni he esa ni yɔɔ nyɛkuu lɛ mli lɛ aya shiɛmɔ. Kɛ́ okwɛ nitsɔɔmɔ gbɛ̀i kpakpai ni woloŋ nikasemɔ nɔkwɛlɔ lɛ tsɔɔ nɔ etsɔɔ nii beni ekwɛɔ woloŋ nikasemɔ lɛ nɔ lɛ, ohe baasa kɛ Biblia mli nikasemɔi afeemɔ.—1 Kor. 4:17.
6. Mɛni hewɔ esa akɛ wɔbɔ mɔdɛŋ koni wɔná woloŋ nikasemɔ lɛ he sɛɛ jogbaŋŋ kɛmɔ shi lɛ?
6 Yɛ anɔkwale mli lɛ, Asafo Woloŋ Nikasemɔ lɛ he yɛ sɛɛnamɔ waa! Gbɛjianɔ ni Yehowa ejɛ suɔmɔ mli eto nɛɛ yeɔ ebuaa wɔ ni wɔfiɔ shi shiŋŋ yɛ mumɔŋ yɛ nɛkɛ bei ní mli wa ni wɔyɔɔ mli nɛɛ mli.—Lala 26:12.