Jajemɔ Maŋtsɛyeli Shɛɛ Sane Lɛ
1 “Esa akɛ miyajajeɔ Nyɔŋmɔ maŋtsɛyeli lɛ he sanekpakpa lɛ mitsɔɔ . . . ejaakɛ no hewɔ atsu mi.” (Luka 4:43) Yesu kɛ nakai wiemɔi lɛ tsɔɔ nɔ ni esɔɔmɔ nitsumɔ lɛ yitso ji—Nyɔŋmɔ Maŋtsɛyeli lɛ. Shɛɛ sane ni wɔjajeɔ ŋmɛnɛ lɛ hu damɔ Maŋtsɛyeli lɛ nɔ, taakɛ aŋma afɔ̃ shi yɛ Mateo 24:14 lɛ akɛ: “Aaashiɛ maŋtsɛyeli lɛ he sanekpakpa nɛɛ atsɔɔ je nɛŋ fɛɛ, ní akɛye jeŋmaji lɛ fɛɛ odase; ni no dani naagbee lɛ aaaba.” Mɛɛ anɔkwale ni kɔɔ Nyɔŋmɔ Maŋtsɛyeli lɛ he ehe hiaa ni mɛi anu?
2 Nyɔŋmɔ Maŋtsɛyeli lɛ miiye nɔ kɛmiijɛ ŋwɛi amrɔ nɛɛ ni etsɛŋ ni ebaaye adesai anɔyelii fɛɛ najiaŋ. Áshwie Abonsam kɛjɛ ŋwɛi momo, ni ŋmɛnɛŋmɛnɛ nibii agbɛjianɔtoo fɔŋ nɛɛ eshɛ enaagbee gbii lɛ amli. (Kpoj. 12:10, 12) Abaakpata Satan yiwalɛ gbɛjianɔtoo momo lɛ hiɛ kwraa kɛmɔ shi, shi ahosoŋ Nyɔŋmɔ Maŋtsɛyeli lɛ. Ebaahi shi kɛya naanɔ.—Dan. 2:44; Heb. 12:28.
3 Maŋtsɛyeli lɛ baatsu adesai fɛɛ ni feɔ toiboo lɛ ataomɔ nii ni sa lɛ ahe nii. Ebaaha aye he kɛjɛ piŋmɔi ni jɛɔ ta, awuiyeli, nɔnyɛɛ, kɛ ohia mli kɛbaa lɛ mli. (Lala 46:9, 10; 72:12-14) Niyenii baaba babaoo aha mɛi fɛɛ. (Lala 72:16; Yes. 25:6) Helai kɛ gbɔmɔtsoŋ fatɔɔi baafee nibii ni akaiŋ dɔŋŋ. (Yes. 33:24; 35:5, 6) Beni adesai daraa kɛyaa emuuyeli mli lɛ, shikpɔŋ lɛ baatsɔ paradeiso, ni gbɔmɛi baahi shi yɛ ekomefeemɔ mli.—Yes. 11:6-9.
4 Wɔtsɔɔ akɛ wɔmiisumɔ ni wɔtsɔmɔ Nyɔŋmɔ Maŋtsɛyeli lɛ shishibii kɛtsɔ gbɛ ni wɔtsɔɔ nɔ wɔhiɔ shi bianɛ lɛ nɔ. Esa akɛ Maŋtsɛyeli shɛɛ sane lɛ asa wɔshihilɛ gbɛi srɔtoi fɛɛ he, ní otii ni wɔkɛmamɔɔ wɔhiɛ kɛ nibii ni wɔkɛyeɔ klɛŋklɛŋ gbɛhe lɛ fata he. Ákɛ nɔkwɛmɔnɔ lɛ, eyɛ mli akɛ eji sɔ ni kã wɔnɔ akɛ wɔha wɔ-shiabii lɛ amɛ hiamɔ nii moŋ, shi wɔnyɛŋ wɔŋmɛ gbɛ koni heloonaa nibii ahe susumɔi atsĩ Maŋtsɛyeli lɛ he nibii anaa. (Mat. 13:22; 1 Tim. 5:8) Yɛ no najiaŋ lɛ, esa akɛ wɔbo Yesu ŋaawoo lɛ toi akɛ: “Nyɛtaoa Nyɔŋmɔ maŋtsɛyeli lɛ kɛ ejalɛ lɛ tsutsu, ni akɛ nii nɛɛ fɛɛ [shihilɛ mli heloonaa hiamɔ nii] aaafata he aha nyɛ.”—Mat. 6:33.
5 Ehe ebahia ni mɛi anu Maŋtsɛyeli shɛɛ sane lɛ ní amɛfee he nɔ ko beni be yɔɔ lolo lɛ. Eba akɛ wɔɔye wɔbua amɛ ni amɛfee nakai kɛtsɔ ‘Nyɔŋmɔ Maŋtsɛyeli lɛ he saji lɛ ni wɔkɛaatsɔ amɛyiŋ’ lɛ nɔ.—Bɔfoi lɛ Asaji 19:8.