Kutuu Odaseyeli Kɛ Miishɛɛ Baa
1 Beni Yesu tsuɔ kaselɔi 70 ni amɛyashiɛ lɛ, etsɔɔ amɛ nɔ ni amɛkɛɛ, ni eto amɛhe gbɛjianɔ ewo kui ni mɛi enyɔ yɔɔ mli lɛ mli, ni etsɔɔ amɛ shikpɔŋkuku ni esa akɛ amɛtsu mli nii. Enɛ ha amɛná miishɛɛ. (Luka 10:1-17) Nakai nɔŋŋ hu ŋmɛnɛ, kutuu odaseyeli yeɔ ebuaa kɛwulaa Nyɔŋmɔ webii lɛ, etoɔ amɛhe gbɛjianɔ ni ewoɔ amɛ hewalɛ kɛhaa shiɛmɔ nitsumɔ lɛ.
2 Onukpai Nyiɛɔ Hiɛ: Onukpai lɛ tsuɔ nɔ ko ni he hiaa waa he nii yɛ mɛi fɛɛ ni amɛyeɔ amɛbuaa amɛ koni amɛkɛ amɛhe awo shiɛmɔ nitsumɔ lɛ mli be fɛɛ be lɛ mli. Sɔɔmɔ nitsumɔ nɔkwɛlɔ lɛ nyiɛɔ hiɛ kɛtoɔ gbɛjianɔ kɛhaa otsi teŋ shiɛmɔ nitsumɔ lɛ. Woloŋ nikasemɔ nɔkwɛlɔ fɛɛ nɔkwɛlɔ ji mɔ ni gbɛnaa nii kã enɔ akɛ eto gbɛjianɔ kɛha ekuu lɛ, titri lɛ yɛ otsi lɛ naagbee mli. Yɛ bei komɛi amli, beni asafo muu lɛ fɛɛ kpeɔ kɛhaa shiɛmɔ nitsumɔ lɛ, esa akɛ woloŋ nikasemɔ nɔkwɛlɔ fɛɛ nɔkwɛlɔ ato gbɛjianɔ kɛha lɛ diɛŋtsɛ ekuu lɛ mli bii ni ekɛtsu amɛhiamɔ nii lɛ ahe nii.
3 “Bɔ ni Yɔɔ Fɛo kɛ Gbɛnaa Gbɛnaa”: Esa akɛ mɔ ni ato akɛ ekwɛ kpee kɛha shiɛmɔyaa lɛ nɔ lɛ aje shishi yɛ be naa pɛpɛɛpɛ koni kpee lɛ aye minitii 10 loo 15 pɛ. Efeɔ nɔ ni hi jogbaŋŋ kɛ́ etsɔ hiɛ eto kui ni baaya shiɛmɔ lɛ ahe gbɛjianɔ ni eha amɛ shikpɔŋkuku hu (ja ekolɛ woloŋ nikasemɔ nɔkwɛlɔi lɛ baatsu enɛ he nii taakɛ awie he kɛtsɔ hiɛ lɛ) dani ekɛ sɔlemɔ amu naa. Enɛ haŋ shiɛlɔi lɛ abua amɛhe naa babaoo yɛ shikpɔŋkuku lɛ mli, nɔ ko ni haŋ bulɛ aba wɔnitsumɔ lɛ he lɛ. Ekɛ Paulo ŋaawoo nɛɛ hu kpãa gbee akɛ: “Afee nii fɛɛ bɔ ni yɔɔ fɛo kɛ gbɛnaa gbɛnaa.” (1 Kor. 14:40) Esa akɛ mɛi fɛɛ ni baa kpee nɛɛ shishi lɛ aye abua koni eye omanye kɛtsɔ jɛmɛ ni amɛaashɛ mra yɛ be naa, ní amɛkɛ mɔ ni nyiɛɔ hiɛ lɛ afee ekome, ní amɛshi jɛmɛ oya kɛya shikpɔŋkuku lɛ mli kɛ́ aja amɛ agbe naa nɔŋŋ.
4 Agbala Amɛ Kutuu yɛ Ekomefeemɔ Mli: Gbɛjianɔi ni atoɔ kɛhaa kutuu odaseyeli lɛ haa wɔnáa hegbɛ ni nɔ bɛ koni wɔkɛle mɛi krokomɛi ni yɔɔ asafo lɛ mli lɛ. Yɛ be mli ni ateee shi awooo gbɛjianɔ ni aaato kɛtsɔ hiɛ ákɛ akɛ mɔ ko pɔtɛɛ baatsu nii lɛ, sɛɛnamɔ hu baa gbɛjianɔ ni ato kɛha shiɛmɔyaa lɛ shishi ni wɔyaa lɛ he kɛji akɛ wɔtsɔko hiɛ wɔkɛ mɔ ko etoko gbɛjianɔ momo. Ekolɛ abaaha ni wɔkɛ mɔ ko ni wɔnako wɔle lɛ jogbaŋŋ lɛ atsu nii, ni ebaaye ebua wɔ koni ‘wɔlɛɛ’ wɔsuɔmɔ lɛ ‘mli.’—2 Kor. 6:11-13.
5 Kutuu odaseyeli woɔ wɔ hewalɛ ni egbalaa wɔ efeɔ wɔ ekome akɛ “anɔkwale lɛ he nanemɛi nitsulɔi.” (3 Yoh. 8) Eba akɛ wɔkɛ wɔhe baawo mli kwraa kɛmɔ shi!