Ye Obua Mɛi ni “Ajie Ato” Lɛ
1. Namɛi Yehowa buaa amɛnaa kɛbaa eŋɔɔ yɛ wɔgbii nɛɛ amli lɛ?
1 Mɔ fɛɛ mɔ yɛ su ko ni ehé shi waa yɛ efonirifeemɔŋ tsui lɛ mli. (Mat. 12:35) Biblia lɛ wieɔ mɔ ko ni “ta yɛ etsui mli” lɛ he. (Lala 55:22) Mɛi komɛi ‘amli woɔ la.’ (Abɛi 29:22) Shi mɛi ni “ajie ato naanɔ wala” lɛ hu yɛ. (Bɔf. 13:48) Yehowa miibua nɛkɛ mɛi ni ajie ato nɛɛ anaa kɛmiiba eŋɔɔ yɛ wɔgbii nɛɛ amli. (Hag. 2:7) Te wɔɔfee tɛŋŋ wɔye wɔbua amɛ koni amɛbatsɔmɔ Yehowa jálɔi?
2. Mɛni fata nitsumɔ ni akɛwo wɔdɛŋ akɛ wɔfee kaselɔi lɛ he nii ni wɔɔtsu lɛ he?
2 Okɛ Jwɛŋmɔ ni Ja Afee Sɛɛsaramɔ: Jwɛŋmɔ ni ja ni wɔɔná yɛ sɛɛsaramɔi afeemɔ he lɛ he miihia bɔni afee ni wɔnyɛ wɔtsu nitsumɔ ni akɛwo wɔdɛŋ akɛ wɔfee kaselɔi lɛ he nii. (Mat. 28:19, 20) Ani wɔhe feɔ oya kɛyatsuɔ miishɛɛ ni ajie lɛ kpo lɛ he nii? Ani wɔkuɔ sɛɛ wɔyasaraa mɛi fɛɛ ni ŋɔ woji loo amɛjie miishɛɛ kpo yɛ sanekpakpa lɛ he lɛ ekoŋŋ? Ani wɔyaa nɔ yɛ wɔmɔdɛŋbɔɔ akɛ wɔɔye wɔbua amɛ koni amɛdara yɛ mumɔŋ lɛ mli? Akɛni wala he yɛ sane lɛ mli hewɔ lɛ, esa akɛ wɔbɔ mɔdɛŋ ni wɔtsu miishɛɛ fɛɛ ni ajie lɛ kpo lɛ he nii.
3. Mɛni esa akɛ wɔfee beni wɔkɛ mɔ ko egba sane yɛ shiɛmɔ nitsumɔ lɛ mli sɛɛ?
3 Be mli ni okaiɔ sane ko ni okɛ mɔ ko ni yɔɔ wiemɔ lɛ he miishɛɛ gba lɛ lolo lɛ, ŋɔɔ be fioo koni okɛŋma egbɛi kɛ adrɛs. Ŋmalamɔ sane ni nyɛsusu he lɛ, ŋmalɛi fɛɛ ni akane, kɛ wolo ni okɛha lɛ oshwie shi. No sɛɛ lɛ, ha efee oti ni ma ohiɛ akɛ obaaku sɛɛ oyasara lɛ oya nɔŋŋ.
4. Te wɔɔfee tɛŋŋ wɔfee sɛɛsaramɔi ni mɔɔ shi jogbaŋŋ lɛ?
4 Bɔ ni Afeɔ Sɛɛsaramɔ Ahaa: Kɛji akɛ oofee sɛɛsaramɔ lɛ, sɛɛnamɔ yɛ he akɛ ooofee mɔ ni dɔɔ mɔ he ni jieɔ naanyobɔɔ su kpo, ni oná oshiatsɛ lɛ he anɔkwa miishɛɛ. Ha sanegbaa lɛ afee mlɛo ni ekɔ Ŋmalɛ mli sane ko he. Saamɔ Biblia mli sane ko ni yɔɔ miishɛɛ koni nyɛsusu he, ni beni saramɔ lɛ eba naagbee lɛ, bi sane ko ni abaanyɛ aha hetoo yɛ saramɔ ni baanyiɛ sɛɛ lɛ mli. Ehi jogbaŋŋ akɛ abaatsi he kɛjɛ susumɔi ni damɔɔɔ ŋmalɛ nɔ ni ekolɛ shiatsɛ lɛ baajie lɛ kpo lɛ he ŋwanejee he. Bɔɔ mɔdɛŋ ni odamɔ nibii ni nyɛkpãa gbee yɛ mli lɛ nɔ otsɔɔ nii babaoo.—Kol. 4:6.
5. Mɛɛ mɔdɛŋbɔɔ gbɛgbalɔ ko jie lɛ kpo, ni mɛni jɛ mli ba?
5 Sɛɛsaramɔi afeemɔ biɔ mɔdɛŋbɔɔ, shi jɔɔmɔi ni jɛɔ mli baa lɛ haa mɔ tsui nyɔɔ emli. Gbɛgbalɔ ko ni yɔɔ Japan lɛ kɛ oti ko ma ehiɛ akɛ ebaafee sɛɛsaramɔi babaoo daa nyɔŋ nɔ. Ebɔi mɛi fɛɛ ni ekɛkpeɔ yɛ shia kɛ shia nitsumɔ lɛ mli lɛ ahe nibii ŋmalamɔ kɛ shishwiemɔ, no sɛɛ lɛ, ekuɔ esɛɛ eyasaraa amɛ ekoŋŋ yɛ gbii kpawo mli. Esáa ehe yɛ nɔ ni ebaawie lɛ mli jogbaŋŋ ni etsuɔ esɔɔmɔ nitsumɔ lɛ he nii akɛ mɔ ni yɔɔ hekɛnɔfɔɔ diɛŋtsɛ yɛ shɛɛ sane ni ehiɛ lɛ mli. Yɛ esɛɛsaramɔi lɛ ekome mli lɛ, enyɛ ekɛ mɔ ko je nikasemɔ shishi, mɔ ni kɛɛ akɛ: “Mishwieɔ nyɛwebii lɛ be fɛɛ be. Enɛ ji klɛŋklɛŋ kwraa ni miboɔ toi.” Gbɛgbalɔ lɛ suɔmɔ mɔdɛŋbɔɔ lɛ wo yibii. Beni nyɔŋ lɛ ba naagbee lɛ, ebu Biblia mli nikasemɔi nyɔŋma he akɔntaa.
6. Mɛni hewɔ esa akɛ wɔkã he wɔfee sɛɛsaramɔi lɛ?
6 Gbɔmɛi ashihilɛi miiya nɔ eetsake daa. (1 Kor. 7:31) Ebiɔ kaa-kɛ-kwɛmɔ shii abɔ dani nine anyɛ ashɛ mɛi ni yɔɔ wiemɔ lɛ he miishɛɛ lɛ anɔ ekoŋŋ yɛ shia. Kɛtsɔ jwɛŋmɔ ni ja ni wɔkɛaatsu nii yɛ sɛɛsaramɔi afeemɔ mli nɔ lɛ, wɔbaanyɛ wɔye wɔbua mɛi ni ajie ato lɛ koni amɛbanyiɛ gbɛ ni kɛ mɔ yaa naanɔ wala mli lɛ nɔ.—Mat. 7:13, 14.