Hesaamɔ—Nɔ̃ Titri ni Haa Sɛɛkuu-kɛsaramɔ Mɔ̃ɔ Shi
1. Mɛɛ gbɛ nɔ Yesu kɛɛ abaatsɔ alɛɛ mra be mli Kristofoi asɔɔmɔ nitsumɔ lɛ mli?
1 Yesu saa ekaselɔi lɛ jogbaŋŋ koni amɛfee “maŋtsɛyeli lɛ he sanekpakpa” shiɛlɔi ni he esa. (Mat. 4:23; 9:35) Palestina ji heni Yesu tsɔse amɛ yɛ. Shi dani Yesu baakwɔ kɛya ŋwɛi lɛ, eha ale akɛ abaalɛɛ Kristofoi asɔɔmɔ nitsumɔ lɛ mli bɔni afee ni ‘akɛfee jeŋmaji fɛɛ ekaselɔi.’—Mat. 28:19, 20.
2. Mɛni Yesu fãmɔ akɛ ‘afee kaselɔi’ lɛ biɔ ni afee?
2 Nakai nitsumɔ lɛ baabi ni akũ sɛɛ ayasara mɛi ni ná Nyɔŋmɔ Maŋtsɛyeli lɛ he sanekpakpa lɛ he miishɛɛ lɛ, ni atsɔɔ amɛ ni amɛye nii fiaa ni Kristo kɛɛ lɛ nɔ. Bɔni afee ni wɔfee sɛɛkuu-kɛsaramɔ ni mɔ̃ɔ shi jogbaŋŋ lɛ, esa akɛ wɔsaa wɔhe jogbaŋŋ.
3. Te ooofee tɛŋŋ ogbele gbɛ kɛha sɛɛkuu-kɛsaramɔ yɛ oklɛŋklɛŋ saramɔ lɛ mli po lɛ?
3 Tsɔ Hiɛ Oto Gbɛjianɔ: Shiɛlɔi komɛi bɔɔ mɔdɛŋ akɛ gbi klɛŋklɛŋ kwraa kɛ́ amɛkɛ shiatsɛ ko gba sane amɛgbe naa lɛ, amɛbaashi sanebimɔ ko amɛha lɛ, kɛkɛ lɛ amɛwo lɛ shi akɛ amɛbaaku amɛsɛɛ amɛkɛ lɛ abasusu hetoo lɛ he. Amɛyɔse akɛ Biblia lɛ Tsɔɔ wolo lɛ mli saji ni amɛkɛtsuɔ nii yɛ sɛɛkuu-kɛsaramɔ mli lɛ yeɔ ebuaa amɛ ni amɛjeɔ Biblia mli nikasemɔ shishi amrɔ nɔŋŋ.
4. Mɛni hewɔ esaaa akɛ wɔbaamɛ kɛyashi wɔnine baashɛ woji tɛtrɛbii heei anɔ dani wɔyafee sɛɛkuu-kɛsaramɔ lɛ?
4 Kɛ́ woji tɛtrɛbii ni wɔkɛbaaha yɛ nyɔɔŋ ko nɔ lɛ pɛ wɔhiɛ po lɛ, no etsɔɔɔ akɛ wɔmɛ kɛyashi wɔnine baashɛ nyɔɔŋ ni baanyiɛ sɛɛ lɛ nɔ̃ lɛ nɔ dani wɔyafee sɛɛkuu-kɛsaramɔ. Wɔbaanyɛ wɔha miishɛɛ ni mɔ lɛ ná lɛ aya hiɛ kɛtsɔ saji ni yɔɔ wolo tɛtrɛɛ ni wɔkɛha lɛ momo lɛ mli lɛ ni wɔkɛ lɛ baasusu he lɛ nɔ.
5. Mɛɛ sɛɛnamɔ yɔɔ he akɛ okɛ oti ko aaama ohiɛ beni ofeɔ sɛɛkuu-kɛsaramɔ lɛ?
5 Okɛ Oti ko Amã Ohiɛ: Dani obaaku osɛɛ oya lɛ, okɛ minitii fioo ko akwɛ nibii ni oŋmala oshwie shi lɛ mli koni ona oti ni obaasumɔ ni oshɛ he. Ákɛ nɔkwɛmɔnɔ lɛ, obaasumɔ ni okɛ mɔ lɛ asusu sane ko ni yɔɔ wolo ní okɛha lɛ be ko ni eho lɛ mli lɛ he. Aloo okɛ wolo ko ni wieɔ sane ko ni okɛ lɛ susu he be ko ni eho lɛ he lɛ baaha lɛ. Kɛ́ oshi sanebimɔ ko yɛ saramɔ ni tsɔ hiɛ lɛ mli lɛ, belɛ ekã shi faŋŋ akɛ obaasumɔ ni oha nakai sanebimɔ lɛ hu hetoo. Kɛ́ oowie ŋmalɛ ko ní kɔɔ oti ni nyɛwieɔ he lɛ he lɛ, bɔɔ mɔdɛŋ ni okane lɛ tɛ̃ɛ kɛjɛ Biblia lɛ mli.
6. Mɛni ji oti ni mã wɔhiɛ yɛ sɛɛkuu-kɛsaramɔ ni wɔfeɔ lɛ mli?
6 Oti ni Mã Wɔhiɛ: Yɛ anɔkwale mli lɛ, oti ni mã wɔhiɛ ji ní wɔje Biblia mli nikasemɔ shishi. Beni nyɛmi nuu ko kɛɛ nuu ko ni eku esɛɛ eyaasara lɛ lɛ akɛ ekɛ lɛ baakase Biblia lɛ, nuu lɛ ekpɛlɛɛɛ. Sɛɛ mli lɛ, nyɛmi nuu lɛ kɛ woji tɛtrɛbii heei ni enine eshɛ nɔ lɛ eko tee koni ekɛyaha nuu lɛ, kɛkɛ ni ekɛɛ nuu lɛ akɛ, “Ŋmɛnɛ, wɔmiiha mɛi Biblia mli sanebimɔi ni amɛyɔɔ lɛ ekome hetoo.” Beni nyɛmi nuu lɛ bo nuu lɛ toi sɛɛ lɛ, ekane ŋmalɛ ko, kɛkɛ ni ekane wolo ko ni akɛfeɔ Biblia mli nikasemɔ lɛ mli kuku ko ni kɔɔ sane lɛ he eha nuu lɛ. Enɛ ha amɛbɔi Biblia lɛ kasemɔ ni amɛfooo mli.
7. Mɛɛ gbɛ nɔ ohe ni osaa jogbaŋŋ kɛha sɛɛkuu-kɛsaramɔ lɛ eye ebua bo ni onyɛ oje Biblia mli nikasemɔ shishi?
7 Kɛ́ wɔhe be kɛsaa wɔhe kɛha sɛɛkuu-kɛsaramɔ lɛ, ehe baa sɛɛnamɔ waa. Wɔmiishɛɛ lɛ baafa, ni ekolɛ wɔbaaná hegbɛ akɛ wɔɔye wɔbua “mɛi ni ajie ato” lɛ koni amɛnyiɛ wala gbɛ lɛ nɔ.—Bɔf. 13:48.