Yaa nɔ Ojaje Yehowa Naakpɛɛ Nitsumɔi Lɛ
1. Mɛni ji Yehowa naakpɛɛ nitsumɔi ni ohiɛ sɔɔ titri lɛ ekomɛi?
1 Mɔ ko mɔ ko nyɛŋ atamɔ wɔ-Nyɔŋmɔ kpeteŋkpele, ni ji Yehowa lɛ! David ŋma akɛ: “Yehowa, mi-Nyɔŋmɔ, onaakpɛɛ nii ni otsuɔ kɛ ojwɛŋmɔi ni ojwɛŋɔ yɛ wɔhe lɛ fa naakpa. Nɔ ko bɛ ni aaanyɛ aŋɔto ohe!” (Lala 40:6) Nɔ ni fata Yehowa naakpɛɛ nitsumɔi lɛ ahe ji jeŋ muu lɛ fɛɛ ni ebɔ, Mesia Maŋtsɛyeli lɛ, mlihilɛ kpo ni ejieɔ etsɔɔ ewebii lɛ, kɛ jeŋ muu fɛɛ shiɛmɔ he tafaa lɛ. (Lala 17:7, 8; 139:14; Dan. 2:44; Mat. 24:14) Suɔmɔ ni wɔyɔɔ kɛha Yehowa kɛ hiɛsɔɔ ni wɔyɔɔ kɛha nibii fɛɛ ni efee eha wɔ lɛ tsirɛɔ wɔ koni wɔgba mɛi krokomɛi ehe sane. (Lala 145:5-7) Wɔbaaná hegbɛ ni wɔkɛfee enɛ babaoo kɛmɔ shi yɛ March, April, kɛ May mli.
2. Wɔ diɛŋtsɛ wɔnaa gbɛgbalɔi awamɔ nitsumɔ lɛ he sɛɛ yɛ mɛɛ gbɛ nɔ?
2 Ákɛ Gbɛgbalɔi Awalɔ: Ani obaanyɛ oto obe he gbɛjianɔ koni okɛ ŋmɛlɛtswai 50 atsu nii yɛ shiɛmɔ nitsumɔ lɛ mli yɛ nyɔji kɛha nitsumɔ krɛdɛɛ nɛɛ ateŋ ekome loo nɔ ni fe nakai mli? Eka shi faŋŋ akɛ, kɛ́ ofee tsakemɔi yɛ nifeemɔ gbɛ ni okɛfɔɔ nitsumɔ lɛ mli lɛ, sɛɛnamɔ baaba he. (Efe. 5:16) Mɛi babaoo ena akɛ gbɛgbalɔi awamɔ nitsumɔ lɛ yeɔ ebuaa amɛ ni amɛyaa hiɛ yɛ bɔ ni amɛtsuɔ shiɛmɔ nitsumɔ lɛ amɛhaa lɛ mli. Amɛwieɔ yɛ shinaai anaa ni ŋmiŋmi ko kwraa mɔɔɔ amɛ, ni amɛnyɛɔ amɛkɛ Biblia lɛ tsuɔ nii babaoo. Be babaoo ni amɛkɛtsuɔ nii yɛ shiɛmɔ nitsumɔ lɛ mli lɛ haa amɛnyɛɔ amɛkuɔ amɛsɛɛ amɛyasaraa mɛi ni jie miishɛɛ kpo lɛ, ni mɛi komɛi ni tsutsu ko lɛ, amɛfeee Biblia mli nikasemɔ lɛ eje eko shishi yɛ be mli ni amɛbɔi gbɛgbalɔi awamɔ nitsumɔ lɛ. Akɛni gbɛgbalɔi awamɔ nitsumɔ lɛ biɔ ni wɔbɔ mɔdɛŋ ni wɔye wɔbua mɛi krokomɛi hewɔ lɛ, eji nitsumɔ ni yɔɔ miishɛɛ.—Bɔf. 20:35.
3. Mɛɛ gbɛ nɔ mɛi komɛi enyɛ amɛtsu gbɛgbalɔi awamɔ nitsumɔ lɛ yɛ shihilɛi ni mli wawai po amli yɛ?
3 Kaamu sane naa oya nɔŋŋ akɛ oshihilɛ haaa onyɛ oná mli gbɛfaŋnɔ. Onukpa ko ni kɛ ehe wo gbɛgbalɔi awamɔ nitsumɔ lɛ mli nyɛsɛɛ afi lɛ yɛ bii enyɔ, ni etsuɔ be-fɛɛ nitsumɔ. Te nyɛmi nuu ni bɛ dekã nɛɛ tsu lɛ eha tɛŋŋ? Akɛni etsuɔ nii yɛ otsi lɛ mli hewɔ lɛ, ekɛ be babaoo tsuɔ nii yɛ otsii anaagbeei amli, ni ekɛ gbɛjegbɛi anɔ odaseyeli jeɔ shishi daa Hɔɔ leebi ŋmɛji 7. Mɛi babaoo ni yɔɔ asafo lɛ mli ni shihilɛ tamɔ nakai nɔŋŋ lɛ hu tsu gbɛgbamɔ nitsumɔ lɛ, ni amɛye amɛbua amɛhe ni amɛwowoo amɛhe hewalɛ. Yɛ asafo kroko mli lɛ, nyɛmiyoo ko ni eye afii 99 lɛ kpɛ eyiŋ akɛ ebaatsu gbɛgbamɔ nitsumɔ lɛ yɛ May mli yɛ be mli ni ebiyoo fɔ̃ lɛ nine koni ebafata ehe kɛtsu lɛ sɛɛ. Mɛi krokomɛi ni yɔɔ asafo lɛ mli lɛ ye amɛbua nyɛmiyoo onukpa lɛ yɛ shia kɛ shia nitsumɔ lɛ kɛ Biblia mli nikasemɔi afeemɔ mli kɛtsɔ shwiili ni etaa mli ni amɛtsi lɛ nɔ. Nyɛmiyoo lɛ kɛ ehe wo tɛlifoŋ nɔ odaseyeli, gbɛjegbɛ nɔ odaseyeli, kɛ odaseyeli kɛtsɔ woloŋmaa nɔ hu mli. Nyɛmiyoo lɛ ná nɔmimaa akɛ efeee enɛ yɛ lɛ diɛŋtsɛ ehewalɛ mli, shi moŋ yɛ Yehowa yelikɛbuamɔ naa.—Yes. 40:29-31.
4. Mɛɛ nibii wɔbaanyɛ wɔsusu he beni wɔtoɔ gbɛjianɔ koni wɔtsu gbɛgbalɔi awamɔ nitsumɔ lɛ?
4 Bɔɔ mɔdɛŋ ni oto gbɛjianɔ ni hi jogbaŋŋ kɛha oshihilɛi. Be he gbɛjianɔtoo he nɔkwɛmɔnɔ ni akɛha yɛ nikasemɔ nɛɛ mli lɛ baanyɛ aye abua bo. Ani otsuɔ be-fɛɛ nitsumɔ loo oyaa skul? Gbɛjianɔtoo ni abaanyɛ akɛtsu nii yɛ otsii anaagbeei amli titri lɛ baahi waa kɛha bo. Kɛ́ oyɛ hela mli naagbai ni ohewalɛ eŋmɛɛɛ bo gbɛ koni okɛ be kakadaŋŋ atsu shiɛmɔ nitsumɔ lɛ, no lɛ gbɛjianɔtoo kɛha be fioo kɛ nitsumɔ daa gbi lɛ baanyɛ ahi fe fɛɛ. Okɛ mɛi krokomɛi agba bɔ ni osumɔɔ ni otsu gbɛgbamɔ nitsumɔ lɛ oha lɛ he sane. Ekolɛ, amɛ hu amɛkɛ no baafee oti ni ma amɛhiɛ.
5. Mɛɛ otii oblahii kɛ oblayei baanyɛ amɛkɛmamɔ amɛhiɛ yɛ March, April, kɛ May mli?
5 Gbɛ̀i ni Oblahii kɛ Oblayei Baanyɛ Atsɔ nɔ ni Amɛkɛ Amɛhe Awo Mli: Yehowa náa miishɛɛ kɛji akɛ oblahii kɛ oblayei wie enaakpɛɛ nitsumɔi lɛ ahe. (Lala 71:17; Mat. 21:16) Kɛ́ oji oblanyo loo oblayoo ni abaptisi bo lɛ, ekolɛ obaanyɛ otsu gbɛgbamɔ nitsumɔ lɛ yɛ nyɔŋ ni fata skul gbɛhamɔ lɛ he lɛ mli. Kɛ́ onyɛŋ osɔmɔ akɛ gbɛgbalɔi awalɔ lɛ, ani obaanyɛ okɛ otii pɔtɛɛ komɛi amamɔ ohiɛ koni oha be ni okɛwoɔ sɔɔmɔ nitsumɔ lɛ mli kɛ bɔ ni otsuɔ lɛ ohaa lɛ aya hiɛ yɛ nyɔji nɛɛ amli? Kɛ́ ofataa ofɔlɔi ahe yɛ shiɛmɔ nitsumɔ lɛ mli, shi oji shiɛlɔ ni abaptisiko lɛ lolo lɛ, no lɛ amrɔ nɛɛ ji be ni hi jogbaŋŋ ni okɛaabɔ mɔdɛŋ koni ohe asa. Ehe ehiaaa ni onu he akɛ esa akɛ ofee mɔ ni he esa kɛ Biblia mli sanebimɔi ahetoo hamɔ loo ákɛ esa akɛ ole nibii babaoo tamɔ mɛi ni edara ni abaptisi amɛ lɛ. Ani onuɔ shishijee Biblia tsɔɔmɔi ashishi? Ani okpɛtɛɔ Biblia mli shishitoo mlai ni kɔɔ jeŋba he lɛ ahe? Ani oosumɔ ni ale bo akɛ Yehowa Odasefoi lɛ ateŋ mɔ kome? No lɛ, okɛ ofɔlɔi agba enɛ he sane. Amɛbaanyɛ amɛto gbɛjianɔ koni amɛkɛ bo ayana onukpai lɛ koni amɛkwɛ kɛji akɛ oshɛɔ taomɔnii lɛ ahe lo.—Kwɛmɔ Our Ministry wolo lɛ, baafa 98-99.
6. Wɔbaanyɛ wɔye wɔbua Biblia mli nikaselɔi koni amɛbatsɔmɔ sanekpakpa lɛ shiɛlɔi yɛ mɛɛ gbɛ nɔ?
6 Ní Aaaye Abua Mɛi Krokomɛi ni Amɛshiɛ: Ekolɛ, Biblia mli nikaselɔi ahe baasa koni amɛfata wɔhe akɛ shiɛlɔi yɛ nyɔji kɛha nitsumɔ krɛdɛɛ ni baa nɛɛ amli. Kɛ́ oyɛ Biblia mli nikaselɔ ko ni eeya ehiɛ jogbaŋŋ lɛ, taomɔ yelikɛbuamɔ kɛjɛ osafo woloŋ nikasemɔ nɔkwɛlɔ lɛ loo sɔɔmɔ nitsumɔ nɔkwɛlɔ lɛ ŋɔɔ. Amɛteŋ mɔ kome baanyɛ afata ohe yɛ nikasemɔ lɛ mli koni ekɛkwɛ nikaselɔ lɛ hiɛyaa lɛ. Kɛ́ nikaselɔ lɛ shɛɔ taomɔnii lɛ ahe, ni eesumɔ ni etsɔ shiɛlɔ lɛ, no lɛ onukpai asɛinɔtalɔ lɛ baanyɛ ato gbɛjianɔ koni onukpai enyɔ afata ohe ni akɛ nikaselɔ lɛ akpe. (Kwɛmɔ The Watchtower, November 15, 1988, baafa 17.) Kɛ́ akpɛlɛ nikaselɔ lɛ nɔ lɛ, jee shishi amrɔ nɔŋŋ ni obɔi lɛ tsɔsemɔ yɛ sɔɔmɔ nitsumɔ lɛ mli.
7. Mɛɛ gbɛ nɔ abaanyɛ atsɔ aye abua mɛi ni ekpa shiɛmɔyaa kwraa loo amɛfo shiɛmɔyaa mli nyɔŋ muu fɛɛ lɛ?
7 Esa akɛ woloŋ nikasemɔ nɔkwɛlɔi agbala jwɛŋmɔ krɛdɛɛ kɛba mɔ fɛɛ mɔ ni ekpa shiɛmɔyaa kwraa loo efo shiɛmɔyaa mli nyɔŋ muu fɛɛ, ni yɔɔ amɛkuu lɛ mli lɛ anɔ. Fɔ̃ɔ amɛnine ni amɛbafata ohe ni okɛ amɛ atsu nii yɛ sɔɔmɔ nitsumɔ lɛ mli. Kɛ́ amɛkpa shiɛmɔyaa be kpalaŋŋ lɛ, no lɛ nilee yɛ mli akɛ onukpai enyɔ kɛ amɛ baagba sane klɛŋklɛŋ koni amɛkwɛ kɛji akɛ amɛshɛɔ taomɔnii lɛ ahe lo. (Kwɛmɔ November 2000 Wɔ Maŋtsɛyeli Sɔɔmɔ Sanebimɔ He.) Ekãa ni asafo lɛ baajie lɛ kpo yɛ nɛkɛ nyɔji kɛha nitsumɔ krɛdɛɛ nɛɛ amli lɛ baanyɛ akanya amɛ koni amɛkɛ amɛhe awo sɔɔmɔ nitsumɔ lɛ mli daa ekoŋŋ.
8, 9. Mɛni onukpai lɛ baanyɛ afee koni amɛkɛkanya mɛi kɛha nitsumɔ krɛdɛɛ lɛ?
8 Saamɔ Ohe Bianɛ Kɛha Nitsumɔ Babaoo: Onukpai, nyɛjea shishi bianɛ ni nyɛwoa asafo lɛ hewalɛ kɛha gbɛgbalɔi awamɔ nitsumɔ lɛ. Nyɛbaanyɛ babaoo nyɛfee kɛtsɔ nyɛhewalɛwoo wiemɔi kɛ nɔkwɛmɔnɔ kpakpa nɔ. (1 Pet. 5:3) Mɛni ji asafo lɛ gbɛgbalɔi awalɔi yibɔ ni fe fɛɛ yɛ be ni eho lɛ mli? Ani abaanyɛ ateke nɔ afi nɛɛ? Esa akɛ woloŋ nikasemɔ nɔkwɛlɔi kɛ amɛsɛɛkwɛlɔi atao gbɛi ni amɛaatsɔ nɔ amɛwo mɛi fɛɛ ni yɔɔ kuu lɛ mli lɛ hewalɛ koni amɛha amɛnitsumɔ lɛ aya hiɛ. Sɔɔmɔ nitsumɔ nɔkwɛlɔi baanyɛ ato kpeei krokomɛi kɛha shiɛmɔyaa he gbɛjianɔ. Nyɛhaa asafo lɛ alea gbɛjianɔ ni ato lɛ kɛtsɔ hiɛ. Nyɛkwɛa ni akɛ nitsumɔ awo shiɛlɔi ni he esa lɛ adɛŋ koni amɛnyiɛ hiɛ, ni ákɛ aje kpeei kɛha shiɛmɔyaa lɛ shishi yɛ be naa ni akpa yɛ be naa. (Kwɛmɔ September 2001 Wɔ Maŋtsɛyeli Sɔɔmɔ Sanebimɔ He.) Esa akɛ sɔɔmɔ nitsumɔ nɔkwɛlɔ lɛ hu ato gbɛjianɔ kɛha shikpɔŋkuku, woji tɛtrɛbii, kɛ woji wuji ni fa bɔ ni sa.
9 Nyɛsɛɛ afi lɛ, onukpai ni yɔɔ asafo ko mli lɛ je shishi kɛ ekãa, ni amɛtsɔ hiɛ amɛwo hewalɛ koni akɛ he awo gbɛgbalɔi awamɔ nitsumɔ lɛ mli, ni amɛteŋ mɛi babaoo kɛ amɛgbɛbimɔ woji ha. Amɛto kpeei krokomɛi ahe gbɛjianɔ kɛha shiɛmɔyaa—ekome leebi ŋmɛji 5:30 kɛha gbɛjegbɛ nɔ odaseyeli, kɛ ekroko hu shwane ŋmɛji 3:00 kɛha mɛi ni ekpa skul, kɛ nɔ ni ji etɛ lɛ gbɛkɛ ŋmɛji 6:00 kɛha mɛi ni ekpa nitsumɔ. Kɛfata he lɛ, ato kpeei etɛ kɛha shiɛmɔyaa he gbɛjianɔ kɛha daa Hɔɔ. Asafo lɛ here nɔ kɛtsɔ mɛi 66 ni kɛ amɛhe ha akɛ gbɛgbalɔi awalɔi yɛ April mli lɛ nɔ!
10. Wekui baanyɛ ato gbɛjianɔ koni amɛha amɛnitsumɔ lɛ aya hiɛ yɛ mɛɛ gbɛ nɔ?
10 Mɛni hewɔ nyɛtooo gbɛjianɔ yɛ nyɛweku nikasemɔ ni nyiɛ sɛɛ lɛ mli koni nyɛkɛ otii pɔtɛɛ komɛi amamɔ nyɛhiɛ kɛha nyɔji ni baa lɛ? Kɛtsɔ ekomefeemɔ kɛ gbɛjianɔtoo kpakpa nɔ lɛ, weku lɛ mli bii komɛi loo amɛfɛɛ amɛbaanyɛ amɛtsu gbɛgbalɔi awamɔ nitsumɔ lɛ. Kɛ́ nyɛnyɛɛɛ nyɛfee nakai lɛ, nyɛkɛ otii amamɔa nyɛhiɛ akɛ nyɛbaaha nyɛnitsumɔ lɛ aya hiɛ kɛtsɔ be ni nyɛkɛwoɔ sɔɔmɔ nitsumɔ lɛ mli ni nyɛaha efa lɛ nɔ loo kɛtsɔ shiɛmɔ ni nyɛashiɛ yɛ bei krokomɛi amli lɛ nɔ. Nyɛsɔlea yɛ sane nɛɛ he akɛ weku. Nyɛbaanyɛ nyɛná nɔmimaa akɛ Yehowa baajɔɔ nyɛmɔdɛŋbɔi lɛ anɔ.—1 Yoh. 3:22.
11. (a) Mɛɛ nibii ni yɔɔ naakpɛɛ Kristo afɔleshaa lɛ tsu? (b) Mɛɛ be, ni nɛgbɛ abaaye Kaimɔ lɛ yɛ, yɛ he ni oyɔɔ lɛ?
11 Nyɔŋmɔ Nitsumɔ ni Yɔɔ Naakpɛɛ Fe Fɛɛ: Yehowa suɔmɔ kpojiemɔ ni fe fɛɛ lɛ ji e-Bi ni ekɛha akɛ kpɔmɔ nɔ̃ yɛ wɔ hewɔ lɛ. (1 Yoh. 4:9, 10) Kpɔmɔ afɔleshaa lɛ feɔ mla naa shishitoo nɔ̃ ni akɛkpɔ̃ɔ adesai kɛjɛɔ esha kɛ gbele mli. (Rom. 3:23, 24) Yesu lá ni afɔse ashwie shi lɛ ha kpaŋmɔ hee lɛ ye emuu, ni eha anyɛ aŋɔ adesai ni yeee emuu lɛ akɛ Nyɔŋmɔ bii ni hiɛ gbɛkpamɔi akɛ amɛbaaye nɔ yɛ ŋwɛi Maŋtsɛyeli lɛ mli. (Yer. 31:31-34; Mar. 14:24) Nɔ ni he hiaa fe fɛɛ lɛ, Yesu toiboo gbɛ ni yeɔ emuu lɛ tse Yehowa gbɛi lɛ he. (5 Mose 32:4; Abɛi 27:11) Yɛ Hɔgbaa, April 4, beni hulu enyɔ shi sɛɛ lɛ, abaaye Kristo gbele lɛ Kaimɔ lɛ yɛ jeŋ fɛɛ.
12. Nuŋtsɔ lɛ Gbɛkɛnaashi Niyenii lɛ yeli shishi ni mɛi ni yɔɔ wiemɔ lɛ he miishɛɛ lɛ aaaba lɛ he baaba sɛɛnamɔ aha amɛ yɛ mɛɛ gbɛ nɔ?
12 Nuŋtsɔ lɛ Gbɛkɛnaashi Niyenii lɛ yeli lɛ wóɔ Yehowa naakpɛɛ nitsumɔi lɛ anɔ gojoo. Wiemɔ ni ahaa lɛ tswaa hiɛsɔɔ ni wɔyɔɔ kɛha nɔ ni Yehowa fee kɛtsɔ kpɔmɔ ni ekɛha lɛ nɔ lɛ emaa shi. Mɛi ni yɔɔ wiemɔ lɛ he miishɛɛ ni baaba shishi lɛ baana Nyɔŋmɔ naakpɛɛ nitsumɔi krokomɛi. Amɛbaana ekomefeemɔ kɛ suɔmɔ ni hedɔɔ yɔɔ mli ni Yehowa etsɔɔ ewebii ni amɛjieɔ lɛ kpo lɛ faŋŋ. (Efe. 4:16, 22-24; Yak. 3:17, 18) Ba ni aaaba nifeemɔ ni he hiaa nɛɛ shishi lɛ baanyɛ aná hewalɛ diɛŋtsɛ yɛ mɔ susumɔ nɔ, no hewɔ lɛ, wɔmiisumɔ ni mɛi ni fa bɔ ni sa aba.—2 Kor. 5:14, 15.
13, 14. Namɛi esa akɛ wɔfɔ̃ amɛ nine kɛba Kaimɔ lɛ, ni mɛɛ gbɛ nɔ wɔɔtsɔ wɔfee enɛ?
13 Ní Aaafɔ̃ Mɛi Krokomɛi Anine ni Amɛba: Jee shishi amrɔ nɛɛ ni oŋmala mɛi ni obaafɔ̃ amɛnine lɛ agbɛi. Esa akɛ weku mlibii ni heee yeee, akutsoŋbii, mɛi ni ole yɛ nitsumɔhe loo skul, tsutsu Biblia mli nikaselɔi kɛ mɛi ni okɛ kaseɔ nii bianɛ, kɛ mɛi fɛɛ ni obaaku osɛɛ oyasramɔ amɛ lɛ, afata mɛi ni obaaŋmala amɛgbɛi lɛ ahe. Esa akɛ shiɛlɔi ni ekpa shiɛmɔyaa kwraa lɛ agbɛi afata gbɛi ni woloŋ nikasemɔ nɔkwɛlɔi lɛ baaŋmala lɛ ahe.
14 Okɛ Kaimɔ he ninefɔ̃ɔ woji ni akala lɛ atsu nii, ni oŋmala be kɛ he ni abaafee Kaimɔ lɛ yɛ lɛ yɛ nɔ fɛfɛo. Aloo ekolɛ, obaasumɔ ni okɛ ninefɔ̃ɔ ni jeɔ kpo yɛ March 15, 2004, Buu-Mɔɔ loo March 22, 2004, Awake! wolo lɛ sɛɛgbɛ lɛ atsu nii. Be mli ni April 4 lɛ bɛŋkɛɔ lɛ, kaimɔ mɛi ni oŋmala amɛgbɛi lɛ, kɛtsɔ ya ni oooya amɛŋɔɔ bo diɛŋtsɛ loo kɛtsɔ tɛlifoŋtswaa nɔ.
15. Wɔbaanyɛ wɔjie gbɔfeemɔ su kpo yɛ Kaimɔ gbi gbɛkɛ lɛ nɔ yɛ mɛɛ gbɛ nɔ?
15 Yɛ Kaimɔ lɛ Shishi: Bɔɔ mɔdɛŋ ni oyashɛ Kaimɔ lɛ shishi yɛ nakai gbi gbɛkɛ lɛ mra. Jiemɔ gbɔfeemɔ su kpo kɛtsɔ suɔmɔ mli ni ooojɛ ni oŋa mɛi heei lɛ nɔ. (Rom. 12:13) Gbɛnaanii krɛdɛɛ ko kã onɔ yɛ gbɔi ni ofɔ̃ amɛ nine kɛba lɛ ahe. Heremɔ amɛ hiɛmɛɛ, ni okɛ amɛ aŋa mɛi krokomɛi yɛ asafo lɛ mli. Ekolɛ, obaanyɛ oha amɛta omasɛi. Ni kɛ́ amɛteŋ mɔ ko ehiɛɛɛ Biblia loo lala wolo lɛ, okɛ amɛ akwɛ onɔ lɛ mli loo ha amɛkwɛ mɔ kroko nɔ mli. Yɛ nifeemɔ lɛ sɛɛ lɛ, ha amɛna bo ni oha sanebimɔi fɛɛ ni ekolɛ amɛyɔɔ lɛ ahetoo. Kɛ́ no ji klɛŋklɛŋ kwraa ni mɛi komɛi baa jɛmɛ lɛ, no lɛ bi amɛ kɛji akɛ amɛbaasumɔ ni amɛkase Nyɔŋmɔ Wiemɔ lɛ kɛ eyiŋtoo he nii babaoo lo. Kɛɛmɔ akɛ obaasumɔ ni okɛ amɛ afee shia Biblia mli nikasemɔ.
16. Mɛni abaanyɛ afee ni akɛye abua mɛi ni ba Kaimɔ lɛ koni amɛya amɛhiɛ yɛ mumɔŋ?
16 Yaa nɔ ni Oye Obua Mɛi ni Ba Lɛ: Yɛ otsii ni nyiɛ Kaimɔ lɛ sɛɛ lɛ, ekolɛ, yelikɛbuamɔ he baahia mɛi ni ba lɛ lolo. Mɛi ni fata he ji mɛi ni tsutsu lɛ amɛbaa kpeei daa, shi amrɔ nɛɛ amɛkɛ asafo lɛ ebɔɔɔ tsɔ lɛ. Onukpai lɛ baakwɛ koni akaku hiɛ ashwie nakai gbɔmɛi lɛ anɔ, ni amɛbaabɔ mɔdɛŋ koni amɛle nɔ hewɔ ni nakai mɛi lɛ eyaaa amɛhiɛ yɛ mumɔŋ dɔŋŋ lɛ. Nyɛhaa amɛlea hiamɔ ni yɔɔ wɔbei nɛɛ ahe lɛ. (1 Pet. 4:7) Nyɛyea nyɛbuaa mɛi fɛɛ ni amɛna sɛɛnamɔ ni yɔɔ toiboo ni aaafee aha Ŋmalɛ naa ŋaawoo ákɛ akɛ Nyɔŋmɔ webii akpe kutuu daa lɛ he.—Heb. 10:24, 25.
17. Mɛni hewɔ esa akɛ wɔya nɔ wɔjaje Yehowa naakpɛɛ nitsumɔi wɔtsɔɔ lɛ?
17 Yehowa nitsumɔi lɛ yɛ naakpɛɛ aahu akɛ wɔnyɛŋ wɔnu fɛɛ shishi kɛmɔ shi kɛji akɛ wɔhi shi kɛtee naanɔ po. (Hiob 42:2, 3; Jaj. 3:11) No hewɔ lɛ, wɔbaaná nibii ni wɔɔdamɔ wɔjie eyi be fɛɛ be. Yɛ Kaimɔ be nɛɛ mli lɛ, wɔbaanyɛ wɔtsɔɔ hiɛsɔɔ ni wɔyɔɔ kɛha Yehowa naakpɛɛ nitsumɔi lɛ kɛtsɔ mɔdɛŋ krɛdɛɛ ni wɔɔbɔ koni wɔkɛlɛɛ wɔsɔɔmɔ nitsumɔ lɛ mli lɛ nɔ.
[Akrabatsa ni yɔɔ baafa 5]
Ani Obaanyɛ Okɛ Be He Gbɛjianɔtoo Nɛɛ Eko Atsu Nii Kɛha Gbɛgbalɔi Awamɔ Nitsumɔ Lɛ?
March Hɔgbaa Ju* Jufɔ* Shɔ* Soo Sohaa Hɔɔ Nyɔŋ Fɛɛ
Daa Gbi 2 1 1 1 1 1 5 51
Gbii Enyɔ 0 5 0 5 0 0 0 50
Otsii Anaagbee Pɛ 5 0 0 0 0 0 8 52
Otsii Anaagbee kɛ
Nitsumɔ Gbii Enyɔ 2 0 0 2 0 2 6 50
April Hɔgbaa Ju Jufɔ Shɔ Soo* Sohaa* Hɔɔ Nyɔŋ Fɛɛ
Daa Gbi 2 1 1 1 1 1 5 50
Gbii Enyɔ 0 0 0 0 5 5 0 50
Otsii Anaagbee Pɛ 5 0 0 0 0 0 8 52
Otsii Anaagbee kɛ
Nitsumɔ Gbii Enyɔ 2 0 0 2 0 2 6 50
May Hɔgbaa* Ju* Jufɔ Shɔ Soo Sohaa Hɔɔ* Nyɔŋ Fɛɛ
Daa Gbi 2 1 1 1 1 1 4 51
Gbii Enyɔ 0 5 0 0 0 0 5 50
Otsii Anaagbee Pɛ 3 0 0 0 0 0 7 50
Otsii Anaagbee kɛ
Nitsumɔ Gbii Enyɔ 2 0 0 2 0 2 5 51
* Enumɔ yɛ nyɔŋ lɛ mli