Kasemɔ Yesu Jwɛŋmɔŋ Su Lɛ
1. Mɛɛ jwɛŋmɔŋ su Yesu jie lɛ kpo?
1 Eyɛ mli akɛ wɔnako Nyɔŋmɔ Bi lɛ pɛŋ moŋ, shi kɛtsɔ Yesu shihilɛ kɛ esɔɔmɔ nitsumɔ lɛ he saji ni aŋmala ashwie shi lɛ anɔ lɛ, wɔbasumɔ lɛ diɛŋtsɛ. (1 Pet. 1:8) Akɛni efeɔ toiboo kɛha e-Tsɛ lɛ suɔmɔnaa nii hewɔ lɛ, eshi eŋwɛi gbɛhe ni awo nɔ lɛ, ni eba shikpɔŋ lɛ nɔ. Ákɛ gbɔmɔ lɛ, esɔmɔ mɛi krokomɛi ni pɛsɛmkunya bɛ mli, ni no sɛɛ lɛ ekɛ ewala ha yɛ adesai ahewɔ. (Mat. 20:28) Nyɔŋmɔ Wiemɔ lɛ woɔ hewalɛ akɛ: “Nɔ ni Kristo Yesu hu jwɛŋ lɛ, no nɔŋŋ nyɛjwɛŋa yɛ nyɛmli.” Te wɔɔfee tɛŋŋ wɔkase he-kɛ-afɔleshaa mumɔ ni eyɔɔ lɛ?—Fil. 2:5-8.
2. Mɛɛ kaa Kristofoi babaoo kɛkpeɔ, ni mɛni baanyɛ aye abua amɛ ni amɛye nɔ kunim?
2 Beni Onuɔ He Akɛ Etɔ Bo: Eyɛ mli akɛ Yesu eye emuu moŋ, shi etɔɔ lɛ. Be ko beni “gbɛnyiɛmɔ lɛ etɔ” lɛ lɛ, eye Samariayoo ko odase jogbaŋŋ. (Yoh. 4:6) Kristofoi babaoo kɛ nakai kaa lɛ nɔŋŋ kpeɔ. Beni okɛ otsi muu fɛɛ etsu nii ni etɔ bo lɛ, ebaanyɛ ewa akɛ ooná hewalɛ koni okɛ ohe awo shiɛmɔ nitsumɔ lɛ mli. Shi kɛlɛ, kɛ́ wɔfee nakai daa lɛ, wɔbaana akɛ Kristofoi asɔɔmɔ nitsumɔ lɛ woɔ wɔ hewalɛ yɛ mumɔŋ.—Yoh. 4:32-34.
3. Te wɔɔfee tɛŋŋ wɔkase suɔmɔ mli ni Yesu jɛ etsɔɔ nii lɛ?
3 Yɛ be kroko mli lɛ, Yesu kɛ ekaselɔi lɛ yi mli kɛmiiya he ko banee koni amɛyajɔɔ amɛhe fioo. Shi kɛlɛ, asafo babaoo ko nu he, ni amɛjo foi kɛtsɔ Yesu kɛ ekaselɔi lɛ ahiɛ koni amɛkɛ amɛ ayakpe. Yɛ nɔ najiaŋ ni Yesu mli aaafu lɛ, “emusuŋ tsɔ̃ lɛ yɛ amɛhewɔ” ni ebɔi “amɛ nibii pii tsɔɔmɔ.” (Mar. 6:30-34) Biblia mli nikasemɔi ashishijee kɛ amɛnɔ tsamɔ biɔ ni aná nakai su lɛ nɔŋŋ. Ebiɔ ni akɛ mɔdɛŋbɔɔ amia hiɛ ni aná anɔkwa suɔmɔ aha gbɔmɛi lɛ. Kɛ́ amrɔ nɛɛ lɛ, ofeee Biblia mli nikasemɔ lɛ, kaaha onijiaŋ miije wui yɛ mɔdɛŋ ni obɔɔ koni oná eko lɛ mli.
4. Gbɛgbalɔi awamɔ nitsumɔ lɛ baanyɛ aye abua wɔ koni wɔkase Kristo jwɛŋmɔŋ su lɛ yɛ mɛɛ gbɛ nɔ?
4 Okɛ Mumɔŋ Nibii Aye Klɛŋklɛŋ Gbɛhe: Gbɛgbalɔi awamɔ nitsumɔ lɛ baanyɛ aye abua wɔ koni wɔkɛ wɔjwɛŋmɔ ama mumɔŋ nibii anɔ babaoo. Nyɛmiyoo fioo ko ŋma akɛ: “Minanemɛi lɛ ateŋ mɔ kome nyɛ wo wɔyi enyɔ lɛ fɛɛ hewalɛ koni wɔkɛ wɔhe awo gbɛgbalɔi awamɔ nitsumɔ lɛ mli ni wɔfata ehe kɛtsu nyɔŋ kome. Eŋɔɔ mináa waa akɛ wɔfata ehe. Miná miishɛɛ akɛ mibale nyɛmimɛi hii kɛ yei lɛ jogbaŋŋ, ni etsɛɛɛ ni amɛbatsɔmɔ tamɔ miwekumɛi. Miná miishɛɛ hu akɛ miná hegbɛi babaoo mikɛwie Yehowa he mitsɔɔ mɛi krokomɛi, ni mitsɔɔ amɛ Maŋtsɛyeli lɛ mli anɔkwalei ni yɔɔ naakpɛɛ lɛ. Enɛɛmɛi fɛɛ ha minu he akɛ mibɛŋkɛ Yehowa kɛ egbɛjianɔtoo lɛ he gbagbalii.”—Lala 34:9.
5. Mɛni hewɔ esa akɛ wɔya nɔ wɔbɔ mɔdɛŋ koni wɔkase Yesu jwɛŋmɔŋ su lɛ?
5 Wɔ fɛɛ wɔkɛ mpleshii ni kã wɔheloo ni yeee emuu lɛ kɛ shwelɛ ni wɔyɔɔ akɛ wɔsa Yehowa hiɛ lɛ teŋ lɛ kpeɔ. (Rom. 7:21-23) Esa akɛ wɔtsi wɔhe kɛjɛ nitsumɔ ni atsuɔ lɛ jabejabe su ni yɔɔ je lɛ mli lɛ he. (Mat. 16:22, 23) Yehowa baanyɛ aye abua wɔ koni wɔye omanye yɛ enɛ mli kɛtsɔ emumɔ krɔŋkrɔŋ lɛ nɔ. (Gal. 5:16, 17) Yɛ be mli ni wɔmɛɔ wɔkpɔmɔ kɛmiibote Nyɔŋmɔ jalɛ jeŋ hee lɛ mli lɛ, eba akɛ wɔɔkase Yesu jwɛŋmɔŋ su lɛ kɛtsɔ Maŋtsɛyeli lɛ he nibii lɛ kɛ mɛi krokomɛi ahe miishɛɛ ni wɔɔná lɛ ni wɔkɛaaye wɔ diɛŋtsɛ wɔsuɔmɔnaa nibii lɛ ahiɛ lɛ nɔ.—Mat. 6:33; Rom. 15:1-3.