Bɔ ni Ashiɛɔ yɛ Shikpɔŋkuku ni Nitsumɔhei Yɔɔ Mli lɛ Mli Ahaa
1. Mɛni ji sɛɛnamɔi komɛi ni yɔɔ odase ni ayeɔ yɛ shikpɔŋkuku ni nitsumɔhei yɔɔ mli lɛ amli?
1 Ani obaasumɔ ni oshiɛ yɛ shikpɔŋkuku ni mɛi fɔɔ gbɔi heremɔ ni amɛyɛ shia be fɛɛ be lɛ mli? Obaanyɛ ofee nakai yɛ bo diɛŋtsɛ osafo lɛ shikpɔŋkuku lɛ mli. Yɛ mɛɛ gbɛ nɔ? Kɛtsɔ shwapoi ni yɔɔ jɛmɛ lɛ amli ni oooya lɛ nɔ. Shiɛlɔi ni yeɔ odase yɛ shwapoi amli lɛ fɔɔ yibiiwoo kpakpai námɔ.
2. Mɛɛ gbɛ nɔ abaanyɛ atsɔ ato odaseyeli yɛ nitsumɔhei ahe gbɛjianɔ?
2 Nitsumɔhei yɛ shikpɔŋkuku ni akɛwo asafoi komɛi adɛŋ lɛ mli. Nyɛminuu ni kwɛɔ shikpɔŋkuku lɛ nɔ lɛ baanyɛ afee shikpɔŋ he mfonirii krɛdɛɛ yɛ wolo nɔ kɛha hei ni nitsumɔhei fa waa yɛ mli nɛɛ. Esa akɛ atsɔɔ faŋŋ yɛ shikpɔŋkukuji ahe mfoniri woji fɛɛ ni shiai yɔɔ nɔ, ni nitsumɔhei hu yɔɔ mli lɛ anɔ akɛ esa akɛ átsu shiai ni yɔɔ mli lɛ pɛ amli nii. Yɛ shikpɔŋkukuji krokomɛi amli lɛ, abaanyɛ atsu nii yɛ nitsumɔhei lɛ kɛ shiai lɛ amli yɛ be kometoo lɛ nɔŋŋ mli. Kɛ́ oyeko odase yɛ nitsumɔhe pɛŋ lɛ, bɔɔ mɔdɛŋ ni okɛ shwapoi bibii fioo ko aje shishi.
3. Mɛni baaye abua wɔ koni wɔnitsumɔ lɛ amɔ shi beni wɔyeɔ odase yɛ shwapoi anaa lɛ?
3 Okɛ Gbɛ ni Yɔɔ Mlɛo Atsu Nii: Kɛ́ ooye odase yɛ shwapoi anaa lɛ, ehe miihia ni osaa ohe tamɔ bɔ ni osaa ohe kɛyaa kpee yɛ Maŋtsɛyeli Asa lɛ nɔ lɛ. Ehi hu akɛ oooya jɛmɛ yɛ be mli ni ayɛ dekã yɛ shwapo lɛ mli. Kɛ́ eeehi lɛ, yaa jɛmɛ beni mɛi ni baahe nii bɛ jɛmɛ. Bi ni aha okɛ nitsumɔ nɔkwɛlɔ lɛ, loo mɔ ni akɛ nitsumɔ lɛ ewo edɛŋ lɛ awie. Ha owiemɔ lɛ afee kuku kɛ nɔ ni yɔɔ tɛ̃ɛ. Mɛni obaanyɛ owie he?
4-6. Mɛni wɔbaanyɛ wɔwie beni wɔyeɔ mɔ ko ni akɛ shwapo ewo edɛŋ loo enɔkwɛlɔ lɛ odase lɛ?
4 Kɛ́ okɛ mɔ ko ni akɛ shwapo ewo edɛŋ loo nɔkwɛlɔ lɛ miiwie lɛ, obaanyɛ okɛɛ nɔ ko tamɔ enɛ: “Akɛni nitsumɔtsɛmɛi bɛ dekã kwraa, ni wɔfɔɔɔ amɛ namɔ yɛ shia hewɔ lɛ, wɔba ni wɔbasara bo yɛ onitsumɔhe lɛ. Wɔwoji tɛtrɛbii lɛ kɛ saji ni yaa nɔ amrɔ nɛɛ ni kɔɔ jeŋ muu lɛ fɛɛ he lɛ haa.” No sɛɛ lɛ wiemɔ wolo tɛtrɛɛ lɛ eko mli sane oti ko he kuku.
5 Loo obaanyɛ oka gbɛ ni yɔɔ mlɛo nɛɛ: “Mɛi babaoo baasumɔ ni amɛle Biblia lɛ mli saji babaoo, shi be fioo pɛ amɛyɔɔ. Dɛhiɛmɔ wolo nɛɛ tsɔɔ nikasemɔ he gbɛjianɔtoo ko ni yɔɔ ni baaye abua bo koni oná hetoo kɛha o-Biblia mli sanebimɔi lɛ.” No sɛɛ lɛ wiemɔ dɛhiɛmɔ wolo ni ji Ani Obaasumɔ ni Ole Biblia lɛ Mli Saji Babaoo? lɛ baafa 4-5 lɛ he.
6 Kɛ́ etamɔ nɔ ni shwapo nɔkwɛlɔ lɛ bɛ dekã lɛ, obaanyɛ okɛ dɛhiɛmɔ wolo ko aha lɛ kɛkɛ ni okɛɛ akɛ: “Maku misɛɛ maba ekoŋŋ beni oyɔɔ dekã. Masumɔ ni male nɔ ni osusuɔ yɛ dɛhiɛmɔ wolo nɛɛ he kɛ́ miba.”
7. Te wɔɔfee tɛŋŋ wɔtsu wiemɔ lɛ he miishɛɛ ni anáa yɛ shikpɔŋkuku ni nitsumɔhei yɔɔ mli lɛ ahe nii?
7 Miishɛɛ ni Ajie lɛ Kpo lɛ He Nitsumɔ: Obaanyɛ ofee Biblia mli nikasemɔ po yɛ shikpɔŋkuku ni nitsumɔhei yɔɔ mli lɛ amli. Gbɛgbalɔ krɛdɛɛ ko fɔɔ nitsumɔtsɛ ko woji tɛtrɛbii lɛ hamɔ. Beni nuu lɛ ná nɔ ni ekaneɔ lɛ he miishɛɛ lɛ, gbɛgbalɔ lɛ kɛ Taoɔ wolo bibioo lɛ tsu nii ni ekɛtsɔɔ lɛ Biblia mli nikasemɔ he gbɛjianɔtoo lɛ. Ato nikasemɔ shishi nɔŋŋ yɛ nuu lɛ nitsumɔhe lɛ. Shihilɛ ni yɔɔ jɛmɛ lɛ hewɔ lɛ, gbɛgbalɔ lɛ haa akɛ minitii 10 loo 15 feɔ nikasemɔ lɛ be fɛɛ be. Eba akɛ wɔ hu wɔɔya nɔ wɔtao mɛi ni sa lɛ kɛtsɔ odase ni wɔɔye yɛ shikpɔŋkuku ni nitsumɔhei yɔɔ mli lɛ amli.