Sanekpakpa Lɛ Kɛhamɔ—Kɛ Ekaa kɛ Ŋaa
1 Ehe miihia ni Yehowa webii ana ekaa. Akɛ nakai anɔkwa saji lɛ kai blema Yoshua yɛ be mli ni ebaye gbalɔ Mose sɛɛ akɛ Israel hiɛnyiɛlɔ lɛ. Yehowa Nyɔŋmɔ diɛŋtsɛ wo Yoshua ekaa kɛ nɛkɛ wiemɔi nɛɛ: “Wajemɔ ohe ni ofee ekaa; . . . wajemɔ ohe ni ofee jogbaŋŋ kɛkɛ, ni ojwɛŋ nɔ oye mla lɛ ni mitsulɔ Mose woo lɛ fɛɛ nɔ; kaaje he kɛmiiya ninejurɔ loo abɛku, bɔni afee ni ohiɛ aka shi yɛ nɔ fɛɛ nɔ ni ofeɔ lɛ mli.” (Yos. 1:6, 7) Hɛɛ, bɔni afee ni wɔna ekaa lɛ, ehe miihia ni wɔkɛ wɔhe akpɛtɛ Yehowa mla lɛ he gbagbalii.
2 Anɔkwa Kristofoi kɛ je nɛɛ mlifu baakpe yɛ be mli ni amɛbɔɔ mɔdɛŋ ni “amɛbo Nyɔŋmɔ moŋ toi akɛ nɔyelɔ fe gbɔmɛi” lɛ. (Bɔfoi lɛ Asaji 5:29, New World Translation) Yɛ nɔ fɛɛ nɔ ni gbɛjianɔtoo nɛɛ baafee wɔ lɛ mli lɛ, wɔyɛ wɔ ŋwɛi Tsɛ lɛ akɛ mɔ ni baafi wɔsɛɛ. Ebaaya nɔ ni ewo wɔ hewalɛ yɛ be mli ni wɔkɛ wɔhe fɔɔ enɔ lɛ.—Luka 22:42, 43.
3 2 Timoteo 3:12 bɔɔ kɔkɔ ni tɔmɔ ko kwraa bɛ he akɛ: “Shi mɛi fɛɛ hu ni taoɔ akɛ amɛaahi shi yɛ Nyɔŋmɔ jamɔ naa yɛ Kristo Yesu mli lɛ, aaawa amɛ yi.” Mɔ fɛɛ mɔ ni ‘taoɔ akɛ ehi shi yɛ Nyɔŋmɔ jamɔ naa yɛ Kristo Yesu mli’ lɛ ji gbɔmɔ kpakpa. Esa akɛ asumɔ lɛ, ni esa akɛ hiɛ asɔ Nyɔŋmɔ gbeyeishemɔ sui kpakpai ni tamɔ nɛkɛ. Belɛ mɛni hewɔ je lɛ baanyɛ lɛ lɛ? Ejaakɛ eenyiɛ Yesu Kristo nanemaa hei asɛɛ, ni ani Kristo tsɔɔɔ hiɛ ebɔɔɔ kɔkɔ akɛ: “Nyɛhiɛ ahia wiemɔ ni mi nɔŋŋ mikɛɛ nyɛ lɛ nɔ, akɛ: ‘Nyɔŋ efeee enuŋtsɔ. Kɛ amɛwa mi yi lɛ, amɛaawa nyɛ hu yi; kɛ amɛye miwiemɔ nɔ lɛ, amɛaaye nyɛ hu nyɛnɔ nɔ’”?—Yohane 15:20.
4 Paulo tsɔɔ yɛ 2 Timoteo 3:11 akɛ awa lɛ yi ni etsɔ ‘yiwalɛi amli . . . yɛ Antiokia, Ikonium, kɛ Listra.’ Mɛni efɔŋ Paulo fee ni no hewɔ ni awa eyi kɛjɛ maŋ kome nɔ kɛtee ekroko nɔ lɛ? Mɛɛ efɔŋ Yesu fee ni asɛŋ lɛ yɛ sɛŋmɔtso nɔ lɛ? Mɛɛ efɔŋ Yehowa Odasefoi efee yɛ nɛkɛ maŋ nɛɛ mli ni atsiɔ amɛnaa nɛkɛ? Hetoo lɛ ekome ni: Paulo kɛ Yesu efeee efɔŋ ko. Nakai nɔŋŋ eji yɛ Yehowa Odasefoi ni yɔɔ maŋ nɛɛ mli lɛ gbɛfaŋ. Wɔyaa nɔ wɔtswaa wɔfai shi akɛ wɔbaadamɔ Yehowa jeŋ muu fɛɛ maŋtsɛyeli lɛ masɛi.
5 Ani esa akɛ gbeyeishemɔ amɔmɔ wɔ ni wɔhe akpokpo yɛ shitee-kɛ-woo ni baa wɔnɔ yɛ anɔkwa jamɔ ni wɔhiɛ mli lɛ hewɔ? Biɛ ji heni esa akɛ wɔna ekaa yɛ. ejaakɛ 2 Maŋtsɛmɛi 6:16 maa nɔ mi kɛhaa wɔ yɛ mɛi ni teɔ shi woɔ wɔ lɛ ahe akɛ: “Mɛi ni kɛ wɔ yɔɔ lɛ fa fe mɛi ni kɛ amɛ yɔɔ lɛ. Kɛfata he lɛ, mɛi ni kɛ wɔ yɔɔ lɛ, Yehowa Nyɔŋmɔ kɛ e-Bi, Yesu Kristo he wa kwraa fe mɛi ni yɔɔ mɛi ni teɔ shi woɔ wɔ lɛ afa lɛ.” No hewɔ lɛ, “namɔ jio ni osheɔ adesa ni baagbo, aloo gbɔmɔ bi ni tamɔ jwɛi lɛ gbeyei? Ni ohiɛ kpaa Yehowa mɔ ni feeo lɛ, mɔ ni lɛɛ ŋwɛi mli ni eto shikpɔŋ lɛ shishi lɛ nɔ? Ni ohe kpokpoɔ daa jenamɔ yɛ haolɔ lɛ grimɔ lɛ hewɔ, kɛ eesaa ehe ni ebaafite lɛ? Shi nɛgbɛ haolɔ grimɔ lɛ yɔɔ po?”—Yesaia 51:12, 13.
6 Eji wɔfaishitswaa akɛ wɔkɛ ekomefeemɔ baaya nɔ ni wɔya wɔhiɛ yɛ ekaa naa yɛ Maŋtsɛyeli sɔɔmɔ lɛ mli ni wɔŋmɛŋ gbɛ ni wɔfite Biblia mli shidaamɔ ni wɔkɔ lɛ yɛ gbɛ ko nɔ. Enɛ saa Yehowa hiɛ jogbaŋŋ.
7 Yɛ be mli ni wɔkɛ ekaa yaa wɔhiɛ lɛ, wɔnyɛŋ ni wɔhiɛ akpa Yesu Kristo ŋaawoo ni yɔɔ Mateo 10:16 lɛ nɔ shikome po: “Naa, miitsu nyɛ tamɔ too gwantɛŋi yɛ klaji ateŋ; no hewɔ lɛ nyɛhiɛ atɛa tamɔ onufui, ni nyɛfea kpoo tamɔ okpoi.” No hewɔ lɛ ehe miihia ni wɔkɛ teokrase ŋaalee atsu nii yɛ naatsii ni yɔɔ amrɔ nɛɛ lɛ hewɔ. Yɛ enɛ hewɔ lɛ, yɛ be mli ni wɔkwɛɔ shihilɛ mli ni wɔyɔɔ lɛ jogbaŋŋ lɛ, nɛgbɛ ni mɛɛ shihilɛi amli bo diɛŋtsɛ lɛ onaa akɛ ehe hiaa ni okɛ ŋaa atsu nii koni sane ko akaba sɔɔmɔ krɔŋkrɔŋ lɛ nɔ ni okaŋmɛɛ sɔɔmɔ nitsumɔ lɛ he yɛ?
8 Hegbɛi pii miigbele kɛmiiha trukaa odaseyeli. Ani oŋɔɔ hegbɛ nɛɛ okɛtsuɔ nii? Wɔyaaa akɛ wɔkɛ mɔ ko miiya ayaje ŋwane. No hewɔ lɛ, yɛ shihilɛ fɛɛ shihilɛ mli lɛ, kɛ ŋoo yɛ wɔlilɛi loo wɔwiemɔi mli lɛ, mɛi ni boɔ toi lɛ baale diɛŋtsɛ akɛ wɔ wɔyɔɔ Biblia mli anɔkwale lɛ. Enɛ baaha Nyɔŋmɔ Wiemɔ lɛ akpɛlɛ kaŋkaŋ ni egbala mɛi ni yɔɔ tsuijurɔ lɛ kɛba anɔkwale lɛ he.—Kol. 4:6; 1 Pet. 3:15
9 Amanehulu fɛɛ amanehulu ni baaba wɔnɔ bianɛ yɛ anɔkwale lɛ hewɔ lɛ ji nɔ ko ni sɛɛ etsɛŋ. Shihilɛ lɛ eyaŋ nɔ kɛyaŋ naanɔ. Yesu Kristo wiemɔi nɛɛ baanyɛ ama enɛ nɔ mi aha bo: “Mikɛɛ nyɛ nii nɛɛ, koni nyɛwo nyɛtsui yɛ nyɛmli. Je lɛŋ lɛ, hejaramɔ nyɛnaa, shi kɛlɛ nyɛtsui anyɔa nyɛmli: Miye je lɛ nɔ kunim.” (Yohane 16:33) No hewɔ lɛ, yaa nɔ ni okɛ sanekpakpa lɛ aha yɛ ekaa kɛ ŋaalee mli.