Jiemɔ Gbɛgbamɔ Mumɔ lɛ Kpo Otsɔɔ
1. Te obaatsɔɔ gbɛgbamɔ mumɔ lɛ mli oha tɛŋŋ?
1 Maŋtsɛyeli shiɛlɔi fɛɛ baanyɛ ajie gbɛgbamɔ mumɔ lɛ kpo amɛtsɔɔ kɛji akɛ amɛbaanyɛ amɛsɔmɔ akɛ gbɛgbalɔi amrɔ nɛɛ loo amɛnyɛŋ amɛfee nakai. Yɛ anɔkwale mli lɛ, amɛmiisumɔ ni amɛbo famɔ akɛ amɛshiɛ ni amɛfee kaselɔi lɛ toi. (Mat. 28:19, 20; Bɔf. 18:5) Amɛsusuɔ gbɔmɛi ahe ni amɛkɛ amɛhe shãa afɔle bɔni afee ni amɛnyɛ amɛtsu amɛsɔɔmɔ nitsumɔ lɛ he nii. (Mat. 9:36; Bɔf. 20:24) Yehowa tsuji miisumɔ ni amɛfee nɔ fɛɛ nɔ ni he hiaa koni amɛkɛye amɛbua mɛi krokomɛi koni amɛkase anɔkwale lɛ. (1 Kor. 9:19-23) Nyɛhaa wɔsusua nɔkwɛmɔnɔ ni Filipo, ni ji sanekpakpa jajelɔ ni jie mumɔ ni tamɔ nɛkɛ kpo etsɔɔ lɛ fee efɔ shi lɛ he wɔkwɛa.
2. Asafoŋ Onukpai kɛ sɔɔlɔi baanyɛ amɛkase ekãa ni Filipo yɔɔ yɛ sɔɔmɔ nitsumɔ lɛ mli lɛ yɛ mɛɛ gbɛ nɔ?
2 Shiɛmɔ kɛ Nitsɔɔmɔ: Filipo tsu gbɛnaa nii ni tsii ahe nii yɛ asafo ni hi shi yɛ klɛŋklɛŋ afii 100 lɛ mli lɛ mli. (Bɔf. 6:1-6) Shi kɛlɛ, ale lɛ titri akɛ sanekpakpa shiɛlɔ ni yɔɔ ekãa. (Bɔf. 8:40) No hewɔ lɛ, ŋmɛnɛ, be mli ni asafoŋ onukpai kɛ sɔɔlɔi tsuɔ gbɛnaa nii ni akɛwo amɛdɛŋ lɛ ahe nii lɛ, amɛbaanyɛ amɛjie gbɛgbamɔ mumɔ lɛ kpo amɛtsɔɔ kɛtsɔ ekãa ni amɛkɛaanyiɛ sɔɔmɔ nitsumɔ lɛ hiɛ lɛ nɔ. Kwɛ bɔ ni enɛ woɔ mumɔ ni yɔɔ asafo lɛ mli lɛ hewalɛ ha!—Rom. 12:11.
3. Mɛɛ gbɛ nɔ wɔbaanyɛ wɔjie gbɛgbamɔ mumɔ lɛ kpo wɔtsɔɔ kɛ́ wɔkɛ kaai kpe?
3 Yiwaa ni naa wa ni te shi trukaa yɛ Stefano gbele sɛɛ lɛ kɛ naagba kpele ba kaselɔi lɛ ashihilɛ mli. Shi kɛlɛ, Filipo tee nɔ eshiɛ, ni etsu gbɛfaŋnɔ ni he hiaa waa he nii yɛ shiɛmɔ nitsumɔ lɛ ni akɛtee Samariabii lɛ aŋɔɔ lɛ mli. (Bɔf. 8:1, 4-6, 12, 14-17) Wɔbaanyɛ wɔkase nɔkwɛmɔnɔ ni efee efɔ shi lɛ kɛtsɔ sanekpakpa lɛ ni wɔɔya nɔ wɔha mɛi ale kɛ́ wɔkɛ kaai kpe, kɛ agbɛnɛ kɛtsɔ shiɛmɔ ni wɔɔshiɛ wɔha mɛi fɛɛ ni wɔkɛkpeɔ lɛ ni wɔkwɛɛɛ hiɛaŋ lɛ nɔ.—Yoh. 4:9.
4. Ákɛ tsɔɔlɔ lɛ, mɛɛ nɔkwɛmɔnɔ Filipo fee efɔ shi?
4 Hesaa ni Filipo yɔɔ akɛ Nyɔŋmɔ Wiemɔ lɛ tsɔɔlɔ lɛ jeɔ kpo yɛ sane ni kɔɔ Etiopia piafonyo lɛ tsakemɔ lɛ he lɛ mli. (Bɔf. 8:26-38) Gbɛ kroko hu ni wɔɔtsɔ nɔ wɔjie gbɛgbamɔ mumɔ lɛ kpo wɔtsɔɔ ji kɛtsɔ bɔ ni wɔnyɛɔ wɔkɛ Biblia lɛ tsuɔ nii wɔhaa lɛ kɛ bɔ ni wɔkɛ mɛi ‘susuɔ nibii ahe kɛjɛɔ Ŋmalɛi lɛ amli’ lɛ ni wɔɔha eya hiɛ lɛ nɔ. (Bɔf. 17:2, 3) Taakɛ Filipo fee lɛ, wɔbɔɔ mɔdɛŋ ni wɔshiɛ sanekpakpa lɛ yɛ he fɛɛ he ni gbɔmɛi yɔɔ kɛ shihilɛ fɛɛ shihilɛ ni sa mli.
5. Mɛni baanyɛ aye abua fɔlɔi ni ji Kristofoi lɛ koni amɛdu gbɛgbamɔ mumɔ lɛ amɛwo amɛbii lɛ amli?
5 Weku kɛ Asafo: Ŋwanejee ko bɛ he akɛ su ni Filipo yɔɔ kɛ nɔkwɛmɔnɔ ni efee lɛ ná ebiyei lɛ anɔ hewalɛ kpakpa. (Bɔf. 21:9) Nakai nɔŋŋ fɔlɔi ni ji Kristofoi ni kɛ Maŋtsɛyeli nibii yeɔ klɛŋklɛŋ gbɛhe yɛ amɛshihilɛ mli lɛ woɔ amɛbii lɛ ahewalɛ koni amɛ hu amɛfee nakai nɔŋŋ. Eyɛ mli akɛ ebaanyɛ etɔ fɔlɔi yɛ otsii anaagbee mli moŋ, shi hiɛmiamɔ ni fɔlɔ ko kɛaashiɛ etsɔɔ mɛi krokomɛi lɛ baanyɛ afee nɔ ni gbekɛ ko hiɛ kpaŋ nɔ kɔkɔɔkɔ.—Abɛi 22:6.
6. Mɛɛ gbɛ nɔ wɔɔtsɔ wɔjie hiɛsɔɔ kpo wɔtsɔɔ gbɛgbalɔi ni yɔɔ wɔ asafo lɛ mli lɛ?
6 Filipo jie gbɔfeemɔ su kpo etsɔɔ Paulo kɛ Luka ni ji Kristofoi ni tsuɔ nii waa yɛ Yehowa sɔɔmɔ mli lɛ. (Bɔf. 21:8, 10) Mɛɛ gbɛ nɔ wɔɔtsɔ wɔjie hiɛsɔɔ kɛ sɛɛfimɔ ni wɔyɔɔ kɛha mɛi ni yɔɔ ekãa lɛ kpo wɔtsɔɔ ŋmɛnɛ? Ekolɛ wɔbaanyɛ wɔkɛ gbɛgbalɔi lɛ atsu nii leebi loo shwane yɛ gbi ni mɛi fioo pɛ kɛ amɛhe woɔ shiɛmɔ nitsumɔ lɛ mli lɛ nɔ. (Fil. 2:4) Wɔbaanyɛ wɔfɔ̃ nine wɔtsɛ amɛ kɛba wɔshiai amli hu koni wɔkɛ amɛ aná naanyobɔɔ ni tswaa mɔ emaa shi mli ŋɔɔmɔ. Eba akɛ wɔ fɛɛ wɔɔbɔ mɔdɛŋ ni wɔjie gbɛgbamɔ mumɔ lɛ kpo wɔtsɔɔ, ekɔɔɔ he eko nɔ shihilɛ mli ni wɔyɔɔ.