Tafãa Krɛdɛɛ Kɛha Wolo Hee Bibioo lɛ Jaa
1 Je lɛŋ shihilɛi gbaa mɛi babaoo anaa ŋmɛnɛ, shi kɛlɛ mɛi fioo ko pɛ le nɔ hewɔ ni nibii yaa nɔ nakai, nɔ ni baaba wɔsɛɛ, kɛ nɔ ni esa akɛ amɛfee koni amɛná yibaamɔ yɛ kojomɔ ni baa lɛ mli. (Ezek. 9:4) Bɔni afee ni aye abua amɛ ni amɛhiɛ ahi nɔ ni wɔbei nɛɛ tsɔɔ lɛ nɔ lɛ, abaaje tafãa krɛdɛɛ kɛha wolo hee bibioo ni ji Nyɛyaa nɔ Nyɛshia Kpe! lɛ jaa shishi kɛjɛ Ju, February 21 kɛyashi Hɔgbaa, March 20 lɛ.
2 Abaanyɛ akɛ wolo bibioo lɛ aha yɛ shia-kɛ-shia shiɛmɔ nitsumɔ lɛ mli, kɛ́ aafee sɛɛkuu-kɛsaramɔ, kɛ́ aaye trukaa odase, loo kɛ́ aashiɛ yɛ hei ni mɛi pii yɔɔ. Shi kɛlɛ, esaaa akɛ ajaa Nyɛyaa nɔ Nyɛshia Kpe! wolo bibioo lɛ ahaa mɔ fɛɛ mɔ kɛkɛ. Yɛ no najiaŋ lɛ, akɛ wolo bibioo lɛ baaha mɛi ni jieɔ miishɛɛ kpo yɛ nɔ ni Biblia kɛɔ yɛ nɔ ni nibii ni yaa nɔ yɛ je lɛ mli lɛ tsɔɔ lɛ he lɛ pɛ. Abaanyɛ akɛ dɛhiɛmɔ wolo aha mɛi ni jieɔ miishɛɛ fioo ko pɛ kpo yɛ shɛɛ sane lɛ he lɛ yɛ no najiaŋ.
3 Obaanyɛ otee mɔ ko miishɛɛ shi kɛ́ okɛɛ akɛ:
◼ “Naagbai ni hiɛdɔɔ yɔɔ mli kɛ nifeemɔi gbohii ní egbɛ eshwa he fɛɛ he ŋmɛnɛ lɛ gbáa mɛi babaoo anaa. [Tsĩi nɔkwɛmɔnɔ ko ni ale yɛ he ni oyɔɔ lɛ tã.] Ani ole akɛ agba nibii nɛɛ ahe sane afɔ̃ shi yɛ Biblia lɛ mli? [Ŋmɛɛ gbɛ ni eha hetoo. No sɛɛ lɛ kanemɔ ŋmalɛ ko ni kɔɔ nɔkwɛmɔnɔ ni otsĩ tã lɛ he, tamɔ Mateo 24:3, 7, 8; Luka 21:7, 10, 11; loo 2 Timoteo 3:1-5.] Biblia lɛ jieɔ nɔ ni wɔgbii nɛɛ tsɔɔ kɛ nɔ ni kã adesai ahiɛ lɛ kpo. Ani obaasumɔ ni ole babaoo? [Ŋmɛɛ gbɛ ni eha hetoo. Kɛ́ mɔ lɛ jie anɔkwa miishɛɛ kpo lɛ, okɛ wolo bibioo lɛ aha lɛ.] Ahɔ̃ɔɔ wolo bibioo nɛɛ. Kɛ́ oosumɔ ni otsu onia ni sa kɛha wɔjeŋ muu nitsumɔ lɛ, wɔyɛ he miishɛɛ akɛ wɔɔhe.”
4 Ekolɛ shiɛmɔ wiemɔ nɛɛ baanyɛ afee nɔ mi mɔɔ shi kɛha bo:
◼ “Ŋmɛnɛ, nifeemɔi gbohii loo oshara ni baa mɔ nɔ lɛ haoɔ mɛi babaoo. Mɛi komɛi susuɔ nɔ hewɔ ni Nyɔŋmɔ kɛ ehe wooo mli koni ekɛtsĩ nibii nɛɛ anaa lɛ he. Biblia lɛ maa nɔ mi ehaa wɔ akɛ etsɛŋ ni Nyɔŋmɔ baafee he nɔ ko koni ekɛjie adesai apiŋmɔ. Kadimɔ jɔɔmɔi ni Nyɔŋmɔ kɛbaaha adesai lɛ. [Kanemɔ Lala 37:10, 11.] Ani obaasumɔ ni ole babaoo?” Muu osane lɛ naa taakɛ afee yɛ yiteŋgbɛ lɛ.
5 Bɔɔ mɔdɛŋ ni ohé mɛi fɛɛ ni heɔ wolo bibioo lɛ eko lɛ agbɛi kɛ adrɛs, ni oto gbɛjianɔ koni oyatsu miishɛɛ ni ajieɔ lɛ kpo lɛ he nii. Gbɛtsɔɔmɔi ni tsɔɔ bɔ ni abaanyɛ afee enɛ aha lɛ baaje kpo yɛ March 2005 Wɔ Maŋtsɛyeli Sɔɔmɔ lɛ mli. Kɛ́ mɔ ko jie miishɛɛ kpo yɛ klɛŋklɛŋ saramɔ lɛ mli lɛ, obaanyɛ okɛ Nyɛyaa nɔ Nyɛshia Kpe! wolo bibioo lɛ, loo wolo kroko tamɔ Taoɔ wolo bibioo lɛ atsu nii kɛje Biblia mli nikasemɔ shishi amrɔ nɔŋŋ.
6 Nine baanyɛ ashɛ wolo hee bibioo lɛ ekomɛi anɔ yɛ Sɔɔmɔ Kpee ni akɛsusuɔ sane nɛɛ he lɛ sɛɛ nɔŋŋ. Aawo shiɛlɔi kɛ gbɛgbalɔi aŋaa akɛ, amɛkɔlɔ nɔ ni he baahia amɛ yɛ tafãa lɛ shishijee gbii lɛ amli pɛ. Eba akɛ Yehowa baajɔɔ nifeemɔ krɛdɛɛ nɛɛ nɔ kɛwo ehiɛ nyam, koni ehe aba sɛɛnamɔ aha mɛi ni hiɛ tsui kpakpa lɛ yɛ he fɛɛ he.—Lala 90:17.