Yaa Nɔ Ojie Hehiamɔ Henumɔ Kpo!
1 Yesu le akɛ be ní eyɔɔ ni ekɛaagbe e-Tsɛ nitsumɔ lɛ naa yɛ shikpɔŋ lɛ nɔ lɛ faaa. (Yoh. 9:4) No hewɔ lɛ, ekɛ hehiamɔ henumɔ tsu esɔɔmɔ nitsumɔ lɛ, ni etsɔse ekaselɔi lɛ ni amɛfee nakai nɔŋŋ. (Luka 4:42-44; 8:1; 10:2-4) Ekɛ heloonaa nibii ni baaha ená ogbɔjɔ shihilɛ lɛ ye gbɛhe ni ji enyɔ. (Mat. 8:20) Enɛ hewɔ lɛ, enyɛ egbe nitsumɔ ní Yehowa kɛwo edɛŋ akɛ etsu lɛ naa.—Yoh. 17:4.
2 Be lɛ Faaa: Be ni akɛaashiɛ sanekpakpa lɛ yɛ “jeŋ nɛŋ fɛɛ” lɛ hu faaa. (Mat. 24:14) Biblia mli gbalɛ tsɔɔ akɛ wɔbote naagbee gbii lɛ amli vii. Etsɛŋ ni “mɛi ni leee Nyɔŋmɔ kɛ mɛi ni booo wɔ-Nuŋtsɔ Yesu Kristo sanekpakpa lɛ toi lɛ . . . aaana nyɔmɔwoo ni ji naanɔ hiɛkpatamɔ.” (2 Tes. 1:6-9) Nakai kojomɔ lɛ baaba trukaa diɛŋtsɛ. (Luka 21:34, 35; 1 Tes. 5:2, 3) Ehe miihia ni gbɔmɛi ale shihilɛ ni yɔɔ oshara ni amɛyɔɔ mli lɛ. Eji sɔ̃ ni kã wɔnɔ akɛ wɔye wɔbua amɛ ni amɛtao Yehowa hiɛ duromɔ be ni be yɔɔ lolo nɛɛ.—Zef. 2:2, 3.
3 Ni Wɔɔfee Bɔ Fɛɛ Bɔ ni Wɔɔnyɛ: Akɛni Nyɔŋmɔ tsuji yɔseɔ akɛ “be lɛ faaa dɔŋŋ” hewɔ lɛ, amɛkɛ shiɛmɔ nitsumɔ lɛ yeɔ klɛŋklɛŋ gbɛhe. (1 Kor. 7:29-31; Mat. 6:33) Amɛteŋ mɛi komɛi ekpoo hegbɛi ni baaha amɛná heloonaa nibii loo nibii krokomɛi ni amɛtiuɔ sɛɛ lɛ bɔni afee ni amɛnyɛ amɛtsu babaoo yɛ sɔɔmɔ nitsumɔ lɛ mli. (Mar. 10:29, 30) Mɛi krokomɛi yaa nɔ ‘amɛtekeɔ nɔ yɛ Nuŋtsɔ lɛ nitsumɔ lɛ mli,’ yɛ kaai ni yaa nɔ ebaa amɛnɔ lɛ fɛɛ sɛɛ. (1 Kor. 15:58) Mɛi babaoo kɛ afii nyɔŋmai abɔ etee nɔ amɛjaje sanekpakpa lɛ yɛ faŋŋ mli ni amɛgbugbãaa. (Heb. 10:23) Yehowa hiɛ sɔɔ afɔleshaai ni akɛfiɔ Maŋtsɛyeli nitsumɔi asɛɛ nɛɛ lɛ waa diɛŋtsɛ.—Heb. 6:10.
4 Wɔshihilɛi ni wɔhaa edamɔɔ Yehowa jamɔ, ní shiɛmɔ nitsumɔ lɛ fata he lɛ nɔ lɛ yeɔ kɛbuaa wɔ koni wɔha Yehowa gbi lɛ ahi wɔjwɛŋmɔ mli be fɛɛ be. Ebuɔ wɔhe koni Satan je lɛ akagbala wɔjwɛŋmɔ, ni ewoɔ wɔfai shi ni wɔtswa akɛ wɔbaahiɛ jeŋba ni yɔɔ krɔŋŋ mli lɛ mli hewalɛ. (2 Pet. 3:11-14) Yɛ anɔkwale mli lɛ, hehiamɔ henumɔ ni wɔkɛaatsu wɔsɔɔmɔ nitsumɔ lɛ he nii lɛ baanyɛ ahere wɔ diɛŋtsɛ kɛ mɛi ni boɔ wɔ toi lɛ yiwala.—1 Tim. 4:16.