Weku Be He Gbɛjianɔtoo—Weku lɛ Shiɛmɔyaa

¹ Yehowa náa he miishɛɛ akɛ eeena akɛ gbekɛbii miijie egbɛi lɛ yi. (Lala 148:12, 13) Yɛ Yesu gbii lɛ amli lɛ, “abifabii kɛ fufɔbii” po ‘kɛ yijiemɔ’ ha Nyɔŋmɔ. (Mat. 21:15, 16) Nakai nɔŋŋ eji ŋmɛnɛ. Fɔlɔi, te nyɛaafee tɛŋŋ nyɛye nyɛbua nyɛbii lɛ koni amɛbatsɔmɔ Yehowa yijielɔi ni yɔɔ ekãa yɛ Kristofoi asɔɔmɔ nitsumɔ lɛ mli? Shikome ekoŋŋ lɛ, taakɛ sane ni aŋma kɛtsɔ hiɛ ni kɔɔ asafoŋ kpeei ahe lɛ ma nɔ mi lɛ, nɔ ni he hiaa titri ji nɔkwɛmɔnɔ ni nyɛbaafee nyɛfɔ̃ shi. Tsɛ ko wie nɔ ni fɔlɔi ni yɔɔ he fɛɛ he lɛ eyɔse, beni ekɛɛ akɛ: “Gbekɛbii kwɛɔ nɔ ni ofeɔ lɛ ni amɛkaseɔ; shi jeee nɔ ni okɛ onaabu folo wieɔ lɛ!”

² Nyɛmi yoo ko ni fɔlɔi ni sheɔ Nyɔŋmɔ gbeyei tsɔse lɛ lɛ kɛɛ akɛ: “Hɔɔ leebi ko bɛ ni wɔteɔ shi wɔyabiɔ akɛ wɔbaaya shiɛmɔ lo. Wɔle akɛ wɔbaaya.” Nakai nɔŋŋ obaanyɛ odũ bɔ ni ehe hiaa ni akɛ he awo shiɛmɔ nitsumɔ lɛ mli lɛ owo obii lɛ amli kɛtsɔ daa otsi shiɛmɔyaa ni tsaraa nɔ ni nyɛkɛ nyɛhe aaawo mli lɛ he gbɛjianɔtoo ni nyɛaafee nyɛfɔ̃ shi lɛ nɔ. Jeee akɛ enɛ haa nyɛbii lɛ kaseɔ nii kɛjɛɔ nɔ ni amɛnaa akɛ nyɛfeɔ lɛ mli kɛkɛ, shi moŋ ehaa nyɛnaa amɛjeŋba, amɛsu kɛ hesaai ni haa amɛyaa hiɛ lɛ hu.

³ Tsɔsemɔ ni Akɛhaa Fiofio: Bɔni afee ni gbekɛbii aná miishɛɛ yɛ shiɛmɔ nitsumɔ lɛ mli lɛ, ehe miihia ni aye abua amɛ koni amɛkɛ amɛhe awo mli jogbaŋŋ kɛmɔ shi. Nyɛmi yoo ni atsɛ ewiemɔ sɛɛ kɛtsɔ hiɛ lɛ kɛɛ hu akɛ: “Wɔjeee mɛi ni nyiɛɔ wɔfɔlɔi asɛɛ kɛkɛ yɛ amɛshiɛmɔ nitsumɔ lɛ mli. Wɔle akɛ wɔkɛ wɔhe woɔ mli, kɛ́ ebiɔ koni wɔtswa shinaa naa ŋmɛlɛ kɛkɛ ni wɔshi dɛhiɛmɔ wolo ko po. Akɛni wɔsaa wɔhe jogbaŋŋ dani wɔkɛ wɔhe woɔ daa otsi naagbee nifeemɔi amli hewɔ lɛ, ehaa wɔleɔ nɔ ni wɔbaayakɛɛ.” Nyɛbaanyɛ nyɛkɛ minitii fioo ko atsɔse nyɛbii lɛ daa otsi kɛha shiɛmɔ nitsumɔ lɛ yɛ weku nikasemɔ lɛ mli loo yɛ be kroko mli.

⁴ Ekome ni nyɛaafee kɛshiɛ akɛ weku lɛ baaha nyɛná hegbɛ kroko hu ni nyɛkɛaadũ anɔkwale lɛ nyɛwo nyɛbii lɛ amli. Kristofonyo ko ni ji tsɛ lɛ kɛ ebiyoo fataa ehe kɛnyiɛɔ kilomitai nyɔŋma kɛyaa kɛbaa koni amɛyajara dɛhiɛmɔ woji amɛha mɛi ni yɔɔ akrowa ni tsa amɛnɔ, ní yɔɔ jɔɔ mli lɛ mli. Ebiyoo lɛ kɛ miishɛɛ wie akɛ: “Mitsɛ tsɔ nyiɛmɔi ni tamɔ nɛkɛ nɔ edũ anɔkwale lɛ ewo mitsui mli.” (5 Mose 6:7) Eba akɛ abaajɔɔ nyɛ nakai nɔŋŋ kɛ́ nyɛkɛ shiɛmɔyaa fata nyɛdaa otsi weku be he gbɛjianɔtoo lɛ he lɛ.