Ní Aaaye Odase ni Emɔ Shi yɛ Hei ni Mɛi Pii Yɔɔ
1 Taakɛ Yesu mra be mli kaselɔi lɛ ji lɛ, Kristofoi ni yɔɔ ŋmɛnɛ lɛ bɔɔ mɔdɛŋ ni amɛkɛ mɛi agba sanekpakpa lɛ yɛ he fɛɛ he ni amɛbaanyɛ amɛna amɛ yɛ. (Bɔfoi lɛ Asaji 16:13; 17:17; 20:20, 21) Nɔ ni ejɛ mɔdɛŋ ni amɛbɔɔ koni amɛye odase yɛ hei ni mɛi pii yɔɔ lɛ mli eba ji akɛ, amɛnine miishɛ mɛi ni yɔɔ wiemɔ lɛ he mii- shɛɛ ni kulɛ ekolɛ nine shɛŋ amɛnɔ yɛ shia-kɛ-shia shiɛmɔ nitsumɔ lɛ mli lɛ anɔ.
2 Ehe miihia ni wɔkɛ sɛɛyoomɔ atsu nii kɛji akɛ wɔmiiye odase yɛ hei ni mɛi pii yɔɔ lɛ. Bei pii lɛ, nɔ ni hi fe fɛɛ ji ní wɔtsu nii yɛ gbɛ ní haŋ mɛi agbala amɛjwɛŋmɔ kɛba wɔnɔ lɛ nɔ. Akɛ nɔkwɛmɔnɔ lɛ, kɛji akɛ shiɛlɔi babaoo ye odase yɛ hekome too lɛ nɔŋŋ loo amɛyasara nitsumɔhe kome too lɛ nɔŋŋ lɛ, ekolɛ ebaaha mɛi komɛi anu he akɛ aasu amɛtsui. Enɛ baa bulɛ ni yɔɔ wɔnitsumɔ lɛ he lɛ shi, ni ekolɛ ebaaba bɔ ni wɔnitsumɔ lɛ mɔɔ shi ehaa lɛ hu shi. Asafoi komɛi ni yɔɔ hei babaoo ni abaanyɛ atsu maŋ odaseyeli ni- tsumɔ lɛ yɛ mli lɛ ena akɛ ehi akɛ amɛaajara shikpɔŋkukuji nɛɛ amli amɛha aŋkroaŋkroi (1 Kor. 14:40) Kɛfata he lɛ, wɔbaanyɛ wɔye wɔbua koni gbɛjianɔtoo kpakpa aya nɔ kɛ- tsɔ nii ní wɔɔtsu yɛ shikpɔŋkuku ni akɛha wɔsafo lɛ pɛ mli lɛ nɔ.—Kwɛmɔ January 1999 Wɔ Maŋtsɛgeli Sɔɔ- mɔ lɛ, bf. 5, kk. 18-19.
3 Ní Wɔɔbɛŋkɛ Mɛi Lɛ: Akɛni wɔkɛ Nyɔŋmɔ Wiemɔ lɛ yeee jara hewɔ lɛ, kaaha mɛi miiná jwɛŋmɔ akɛ wɔmiihɔɔ wɔwoji tɛtrɛbii lɛ. Enɛ hewɔ lɛ, yɛ nɔ najiaŋ ni wɔɔhiɛ woji tɛtrɛbii lɛ kɛdamɔ hekome ní mɛi abanina wɔ lɛ, ehe miihia moŋ ni wɔtsi wɔbɛŋkɛ mɛi lɛ yɛ hei ni mɛi pii yɔɔ lɛ. (km-GA 7/94 bf. 1, kk. 5.) Beni Yesu kɛ yoo ko wieɔ yɛ nubu ko he lɛ, ekɛ hiɛkpamɔ wiemɔ kuku ko je shishi, ni etee nɔ elɛɛ sanegbaa lɛ mli beni ena akɛ yoo lɛ yɛ sane lɛ he miishɛɛ lɛ. (Yohane 4:7-26) Ŋmɛnɛ, gbɛ ni tamɔ nɛkɛ kɛ nitsumɔ lɛ hu mɔɔ shi yɛ shihilɛi komɛi amli. Shiɛlɔi komɛi naa akɛ, kɛ́ aaanyɛ asaa mɛi lɛ ajwɛŋmɔ kɛha odaseyeli yɛ hei ni mɛi pii yɔɔ lɛ, no lɛ ehi akɛ aŋɔ be fioo ko ní akɛŋa mɛi lɛ ní ajie hiɛ- sɔɔ kpo atsɔɔ amɛ dani akɛ Maŋ- tsɛyeli shɛɛ sane lɛ aha amɛ. Amɛ- tsĩɔ saneyitso ko ni ayɔɔ he miishɛɛ yɛ akutso lɛ mli lɛ ta, ni bei pii lɛ enɛ teeɔ sanegbaa shi. Etsɛɛɛ nɔŋŋ ni amɛkɛ mɛi lɛ gbaa miishɛjemɔ ni jɛ Nyɔŋmɔ Wiemɔ lɛ mli lɛ he sane.—Rom. 15:4.
4 Ní Wɔɔtsu Miishɛɛ ni Ajie lɛ Kpo lɛ He Nii: Be fɛɛ be ni wɔkɛ mɛi aaagba sane ni amɛaana he mii- shɛɛ lɛ, esa akɛ wɔbɔ mɔdɛŋ koni wɔto gbɛjianɔi ni wɔyatsu miishɛɛ ni amɛjie lɛ kpo lɛ he nii. Te wɔbaafee tɛŋŋ wɔfee enɛ? Kɛ sanegbaa lɛ miiba enaagbee lɛ, obaanyɛ okɔ owolo ni oŋmaa nii yɛ mli lɛ ni okɛɛ akɛ: “Minya wɔsanegbaa lɛ he waa. Ani gbɛ ko yɛ ni wɔbaanyɛ wɔtsɔ nɔ wɔ- tsa nɔ be kroko?” Aloo kɛɛmɔ akɛ: “Masumɔ ni okane sane ko ni mi- yɔɔ nɔmimaa akɛ omii baashɛ he lɛ. Ani mikɛbaha bo yɛ oshia loo onitsumɔhe lɛ?” Shiɛlɔi komɛi biɔ tɛ̃ɛ akɛ: “Mɛɛ tɛlifoŋ nɔmba manyɛ mi- kɛtswa bo?” Bei pii lɛ, enɛ haa mɔ lɛ haa hetoo ni sa.
5 Mɛi ni akɛkpe klɛŋklɛŋ kwraa yɛ hei ni mɛi pii yɔɔ lɛ ateŋ mɛi babaoo ekpɛlɛ ní akɛ amɛ afee Biblia mli ni- kasemɔ. Abaanyɛ afee nikasemɔ nɛɛ yɛ mɔ lɛ shia, yɛ enitsumɔhe, yɛ hei ni mɛi pii yɔɔ ni sa, loo kɛtsɔ tɛlifoŋ nɔ. Eba akɛ wɔbaaha efee oti ni ma wɔhiɛ akɛ wɔbaaje Biblia mli nikasemɔ shishi be mli ni wɔyeɔ odase ni mɔɔ shi yɛ hei ni mɛi pii yɔɔ lɛ.
[Nikasemɔ lɛ he Sanebimɔi]
1. Yɛ klɛŋklɛŋ ani 100 Kristofoi lɛ kasemɔ mli lɛ, mɛɛ gbɛ nɔ Kristofoi ni yɔɔ ŋmɛnɛ lɛ yeɔ odase yɛ hei ni mɛi pii yɔɔ, ni mɛni ejɛ mli eba?
2. Mɛni hewɔ esa akɛ wɔkɛ sɛɛyoomɔ atsu nii kɛji akɛ wɔmiiye odase yɛ hei ni mɛi pii yɔɔ lɛ, ni mɛɛ gbɛ wɔbaanyɛ wɔtsɔ nɔ wɔye wɔbua koni akɛ gbɛjianɔtoo kpakpa atsu nii?
3. (a) Mɛni esaaa akɛ wɔfeɔ kɛ́ wɔ- miiye odase yɛ hei ni mɛi pii yɔɔ lɛ? (b) Mɛɛ gbɛ ko mɛi komɛi ena akɛ ekɛ nitsumɔ mɔɔ shi kɛ́ aaye odase yɛ hei ni mɛi pii yɔɔ lɛ?
4. Te wɔɔfee tɛŋŋ wɔtsu miishɛɛ ni mɛi jieɔ lɛ kpo lɛ he nii lɛ?
5. Mɛɛ oti esa akɛ wɔkɛma wɔhiɛ beni wɔyeɔ odase yɛ hei ni mɛi pii yɔɔ lɛ?