Gbɛi Hei Kɛha Maŋ Odaseyeli
1. Mɛɛ nɔkwɛmɔnɔ klɛŋklɛŋ afi 100 lɛ mli Kristofoi lɛ fee?
1 Klɛŋklɛŋ afi 100 lɛ mli Kristofoi lɛ eshiɛɛɛ yɛ shĩa kɛ shĩa pɛ kɛkɛ. Amɛshiɛ yɛ faŋŋ loo maŋ hu. (Bɔf. 20:20) Akɛ nɔkwɛmɔnɔ lɛ, amɛtee sɔlemɔwe lɛ he ni amɛle akɛ amɛbaana mɛi babaoo yɛ lɛ. (Bɔf. 5:42) Beni bɔfo Paulo yɔɔ Ateene lɛ, eshiɛ eha mɛi yɛ jara lɛ nɔ daa gbi. (Bɔf. 17:17) Ŋmɛnɛ lɛ, shĩa kɛ shĩa shiɛmɔ nitsumɔ lɛ kã he eji gbɛ titri ni wɔtsɔɔ nɔ wɔhaa mɛi leɔ sanekpakpa lɛ. Kɛlɛ, wɔyaa tsɔji amaamɔhei, nitsumɔhei, shwɛmɔhei, gbɛjegbɛi ni mɛi babaoo fɔɔ nɔ tsɔmɔ, kɛ hei krokomɛi wɔyashiɛɔ wɔhaa mɛi yɛ he fɛɛ he ni wɔbaana amɛ yɛ. Eyɛ mli akɛ awoɔ shiɛlɔi fɛɛ hewalɛ ni kɛ́ eeehi lɛ amɛye odase yɛ maŋ moŋ, shi mɛi babaoo baaná hegbɛ ni amɛkɛ amɛhe awo gbɛjianɔtoo hei enyɔ kɛha maŋ odaseyeli ni yɔɔ miishɛɛ lɛ amli.
2. Mɛɛ maŋ odaseyeli he gbɛjianɔtoo hee ko aka akwɛ yɛ November 2011 mli?
2 Maŋtiasei Wuji Amli Odaseyeli Krɛdɛɛ: Taakɛ abɔ he amaniɛ yɛ 2013 Yearbook lɛ baafa 16 kɛ 17 lɛ, aka maŋ odaseyeli he gbɛjianɔtoo hee ko akwɛ yɛ New York City yɛ November 2011 mli. Akɛ mfonirii fɛfɛji kpɛtɛ okpɔlɔi kɛ shwiilii henɔi komɛi ahe, ni ato woji ni yɔɔ wiemɔi srɔtoi amli awo nɔ, ni akɛmamɔ maŋ lɛ mli hei ni mɛi fɔɔ tsɔmɔ waa lɛ. Daa gbi lɛ, mɛi akpei abɔ batsɔɔ he kɛhoɔ, mɛi nɛɛ ateŋ mɛi komɛi yɛ shĩai ni Odasefoi nyɛɛɛ aya mli loo aŋmɛɛɛ amɛgbɛ ni amɛya mli lɛ amli, ni amɛteŋ mɛi komɛi hu efɔɔɔ shĩa hilɛ. Nɔ ni jɛ mli ba lɛ yɛ miishɛɛ waa. Nyɛsɛɛ nɛɛ, yɛ nyɔɔŋ kome ko pɛ mli lɛ, aha woji tɛtrɛbii 3,797 kɛ woji wuji 7,986. Mɛi ni tsɔ jɛmɛ kɛho lɛ ateŋ mɛi babaoo bi ni akɛ amɛ akase Biblia lɛ. Akɛni oti lɛ ji ni aje Biblia mli nikasemɔi ashishi hewɔ lɛ, akɛ mɛi ni jie miishɛɛ kpo lɛ ahe saji maje asafoi ni sa lɛ amrɔ nɔŋŋ koni anyɛ aya amɛŋɔɔ.
3. Mɛɛ gbɛ nɔ akpãa gbɛjianɔtoo nɛɛ mli?
3 Akɛni gbɛjianɔtoo nɛɛ ye omanye hewɔ lɛ, aakpã mli kɛmiiya maŋtiasei krokomɛi ni mɛi babaoo yɔɔ mli lɛ amli yɛ jeŋ fɛɛ. Nitsumɔhe nine lɛ baatsɔɔ maŋtiasei amli ni esa akɛ afee yɛ. Bei pii lɛ, tsɔji amaamɔhei loo nitsumɔhei loo shĩai babaoo yɛ maŋtiasei nɛɛ amli ni haa mɛi babaoo fɔɔ jɛmɛ tsɔmɔ. No sɛɛ lɛ, nitsumɔhe nine lɛ baaŋma asafoi ni baaná mli gbɛfaŋnɔ lɛ woji ni ekɛ gbɛtsɔɔmɔi krokomɛi baaha amɛ. Eyɛ mli akɛ yɛ hei komɛi lɛ gbɛgbalɔi awalɔi hu baanyɛ aná mli gbɛfaŋnɔ moŋ, shi daa gbɛgbalɔi kɛ gbɛgbalɔi krɛdɛɛi ji mɛi ni baafɔ tsumɔ.
4. Te atsuɔ maŋtiasei wuji amli odaseyeli krɛdɛɛ lɛ ahaa tɛŋŋ?
4 Bɔ ni Ayeɔ Odase lɛ Ahaa: Mɛi ni kɛ amɛhe woɔ maŋtiasei wuji amli odaseyeli krɛdɛɛ nɛɛ mli lɛ mɛɔ ni mɔ ko abɛŋkɛ okpɔlɔ lɛ loo shwiili lɛ he. Kɛ́ mɔ ko bɛŋkɛ lɛ, ahaa ekɔɔ woji lɛ ateŋ eko fɛɛ eko ni esumɔɔ. Gbɛgbalɔi lɛ kɛ miishɛɛ haa sanebimɔi fɛɛ ni mɔ lɛ baabi amɛ lɛ hetoo kɛjɛɔ Ŋmalɛ lɛ mli. Kɛ́ mɔ lɛ ŋɔ woji lɛ eko lɛ, gbɛgbalɔi lɛ etsĩii oniatsumɔ he gbɛjianɔtoo lɛ tã. Shi kɛ́ mɔ lɛ bi he ni wɔnáa shika yɛ kɛfĩɔ wɔnitsumɔ lɛ sɛɛ lɛ, amɛbaanyɛ amɛkɛɛ lɛ akɛ ebaanyɛ ekɛ onia amaje kɛtsɔ adrɛs ni yɔɔ wolo lɛ mli lɛ eko nɔ. Kɛ́ hegbɛ lɛ ba lɛ, amɛbiɔ mɔ lɛ akɛ: “Ani obaasumɔ ni mɔ ko abasara bo yɛ oshĩa?” loo “Ani ole akɛ kɛ́ oŋɔ wolo nɛɛ hegbɛ hu yɛ kɛha Biblia mli nikasemɔ ni aheee nɔ ko?”
5. Mɛɛ gbɛ nɔ wu kɛ ŋa ko ni kɛ amɛhe wo gbɛjianɔtoo hee nɛɛ mli lɛ ná he sɛɛ?
5 Mɛi ni kɛ amɛhe ewo gbɛjianɔtoo nɛɛ mli lɛ ená he sɛɛ babaoo. Wu kɛ ŋa ko ŋma akɛ: “Okpɔlɔ lɛ he ni wɔdamɔɔ daa ni wɔnaa mɛi akpei abɔ ni yaa kɛbaa lɛ eha wɔnu bɔ ni shiɛmɔ nitsumɔ ni atsuɔ yɛ jeŋ fɛɛ bɔni afee ni nine ashɛ mɛi babaoo anɔ lɛ da ha lɛ shishi. Kɛ́ wɔna mɛi babaoo nɛɛ, ni wɔjwɛŋ bɔ ni Yehowa susuɔ amɛteŋ mɔ fɛɛ mɔ he lɛ he lɛ, ehaa wɔfaishitswaa akɛ wɔbaaya nɔ wɔkɛ shiɛmɔ nitsumɔ lɛ aye klɛŋklɛŋ gbɛhe lɛ mli waa. Wɔfeɔ Yehowa he mfoniri ní eepɛi mɛi ni tsɔɔ okpɔlɔ lɛ he lɛ ateŋ mɔ fɛɛ mɔ tsuiŋ, ní eetao mɛi ni sa lɛ. Wɔnuɔ he akɛ wɔbɛŋkɛ bɔfoi lɛ ni ji wɔhefatalɔi nitsulɔi lɛ kpaakpa.”
6. (a) Mɛɛ gbɛ kroko ni atsɔɔ nɔ ayeɔ odase yɛ maŋ atoɔ he gbɛjianɔ yɛ asafoi babaoo amli, ni mɛɛ srɔtofeemɔ yɔɔ no kɛ maŋtiasei wuji amli odaseyeli krɛdɛɛ lɛ teŋ? (b) Mɛɛ gbɛ nɔ asafoi baanyɛ afee ekome kɛ́ amɛkɛ amɛhe miiwo maŋ odaseyeli mli?
6 Maŋ Odaseyeli ni Atoɔ He Gbɛjianɔ yɛ Asafoi Amli: Kɛfata maŋtiasei wuji amli odaseyeli krɛdɛɛ lɛ he lɛ, onukpai akui babaoo miito gbɛjianɔ hee kɛha odaseyeli yɛ amɛsafo lɛ shikpɔŋkuku lɛ mli. Yɛ gbɛjianɔtoo nɛɛ mli lɛ, shiɛlɔi lɛ kɛ okpɔlɔ loo nɔ ko tamɔ shwiili maa hei ní mɛi pii fɔɔ tsɔmɔ yɛ amɛsafo lɛ shikpɔŋkuku lɛ mli. Enɛ yɛ srɔto yɛ maŋtiasei wuji amli odaseyeli krɛdɛɛ lɛ ní mɛi ni kɛ amɛhe woɔ mli lɛ jɛ asafoi babaoo amli, ni amɛyashiɛɔ yɛ he kome too lɛ nɔŋŋ ní mɛi pii fɔɔ tsɔmɔ yɛ maŋtiasei ni nitsumɔhe nine lɛ ehala lɛ amli lɛ he.—Kwɛmɔ akrabatsa ni ji “Ekomefeemɔ He Miihia.”
7. Te esa akɛ onukpai lɛ ato maŋ odaseyeli he gbɛjianɔ aha tɛŋŋ, kɛ́ ebaahi nakai feemɔ yɛ shikpɔŋkuku lɛ mli?
7 Onukpai lɛ baakwɛ kɛ́ hei komɛi yɛ amɛsafo lɛ shikpɔŋkuku lɛ mli ni mɛi pii fɔɔ tsɔmɔ, koni amɛkpɛ yiŋ kɛji akɛ abaanyɛ ato maŋ odaseyeli he gbɛjianɔ yɛ jɛmɛ. Hei ni abaanyɛ akɛ okpɔlɔ loo shwiili lɛ ama lɛ ekomɛi ji, tsɔji amaamɔhei, maŋjaanɔ, shwɛmɔhei, gbɛjegbɛi ni mɛi pii fɔɔ nɔ tsɔmɔ, shopping malls amli, kɔlejii, kɔɔyɔŋ lɛjiadaamɔhei kɛ hei ni afeɔ henaabuamɔi yɛ daa afi. Ehi waa akɛ aaato okpɔlɔ lɛ yɛ he kome too lɛ nɔŋŋ, gbi kome too lɛ nɔŋŋ kɛ be kome too lɛ nɔŋŋ. Akpa shi ana akɛ okpɔlɔi ni akɛ mamɔɔ shopping malls amli lɛ woɔ yibii fe nɔ ni akɛmaa shwapo wulu kome naa lɛ, ejaakɛ mɛi ni baa shwapoi nɛɛ amli lɛ ajwɛŋmɔi yɛ nɔ tuuntu hewɔ ni amɛba jɛmɛ lɛ nɔ. Shwiilii bibii ni atoɔ woji yɛ nɔ lɛ hi waa kɛha hei tamɔ nyiɛmɔhei ni kamɔ gbɛjegbɛi ahe. Asafoŋ onukpai lɛ baanyɛ aná Buu-Mɔɔ kɛ Awake! woji tɛtrɛbii lɛ kɛ Biblia Tsɔɔ wolo lɛ ahe mfonirii komɛi ni aje gbɛ afee kɛha gbɛjianɔtoo nɛɛ kɛjɛ wɔ-Wɛb saiti lɛ nɔ. Aje gbɛ afee mfonirii nɛɛ ni akɛtsu nii yɛ maŋ odaseyeli he gbɛjianɔtoo nɛɛ mli. Mɛi ni kɛ amɛhe baawo gbɛjianɔtoo nɛɛ mli lɛ baatsu he nii tamɔ bɔ ni mɛi ni ahala kɛha maŋtiasei wuji amli odaseyeli krɛdɛɛ lɛ feɔ lɛ nɔŋŋ, ni esa akɛ amɛnyiɛ gbɛtsɔɔmɔ ni shiɛmɔ nitsumɔ nɔkwɛlɔ lɛ kɛbaaha amɛ lɛ sɛɛ pɛpɛɛpɛ. Kɛ́ mɔ ko ni yɔɔ wiemɔ lɛ he miishɛɛ ni bɛ amɛshikpɔŋkuku lɛ mli lɛ ha amɛ edrɛs lɛ, esa akɛ amɛŋma Please Follow Up (S-43) wolo lɛ nɔ nii amrɔ nɔŋŋ ni amɛkɛha woloŋmalɔ lɛ.
8. Kɛ́ atoko maŋ odaseyeli he gbɛjianɔ yɛ nyɛsafo lɛ mli lɛ, mɛɛ hegbɛi kɛha maŋ odaseyeli yɔɔ lolo kɛha nyɛ?
8 Maŋ Odaseyeli yɛ Bo Diɛŋtsɛ Oshiɛmɔ Nitsumɔ lɛ Mli: Yɛ asafoi komɛi ashikpɔŋkukuji amli lɛ, ekolɛ abɛ hei ni mɛi pii fɔɔ tsɔmɔ bɔ ni baaha ato okpɔlɔ loo shwiili ni atoɔ woji yɛ nɔ lɛ ahe gbɛjianɔ. Kɛlɛ, awoɔ shiɛlɔi ni yɔɔ asafoi ni tamɔ nakai lɛ amli lɛ hewalɛ ni amɛkɛ maŋ odaseyeli afata amɛshiɛmɔ nitsumɔ lɛ he. Ani jarayelihe, shwapoi ni tsara nɔ srɛnɛɛ, loo shwapo ko ni mɛi fɔɔ nihemɔ yɛ mli yɛ nyɛshikpɔŋkuku lɛ mli? Ani shwɛmɔhe loo henaabuamɔ he ko yɛ jɛmɛ? Ani he ko yɛ shikpɔŋkuku lɛ mli ni maŋbii lɛ fɔɔ amɛhenaabuamɔ yɛ jɛmɛ? Kɛ́ nakai ni lɛ, nyɛ hu nyɛbaanyɛ nyɛkɛ nyɛhe awo maŋ odaseyeli mli.
9. Mɛni hewɔ esa akɛ wɔbɔ mɔdɛŋ wɔshiɛ wɔha mɛi yɛ he fɛɛ he ni wɔbaana amɛ yɛ lɛ?
9 Yehowa sumɔɔ ni “ehere gbɔmɛi fɛɛ yiwala, koni amɛshɛ anɔkwale lɛ lee mli.” (1 Tim. 2:4) No hewɔ lɛ, wɔmiibɔ mɔdɛŋ ni wɔshiɛ Maŋtsɛyeli lɛ he sane lɛ wɔha mɛi fɛɛ dani naagbee lɛ aba. (Mat. 24:14) Yɛ hei babaoo lɛ ewa akɛ abaana mɛi yɛ shĩa. Kɛlɛ, wɔbaanyɛ wɔkɛ amɛ agba sane kɛ́ wɔkɛ amɛ kpe yɛ maŋ lɛ mli. Mɛi komɛi yɛ ni hegbɛ pɛ ni amɛbaaná kɛnu sanekpakpa lɛ ji kɛtsɔ maŋ odaseyeli nɔ. No hewɔ lɛ, nyɛhaa wɔshiɛa wɔhaa mɛi yɛ he fɛɛ he ni wɔbaana amɛ yɛ, koni wɔkɛgbe wɔsɔɔmɔ lɛ naa kwraa.—2 Tim. 4:5.
[Akrabatsa ni yɔɔ baafa 5
Ekomefeemɔ He Miihia
Amaniɛbɔɔ tsɔɔ akɛ bei komɛi lɛ, shiɛlɔi ni jɛ asafoi ni bɛŋkɛ lɛ amli lɛ kɛ amɛhe woɔ maŋ odaseyeli mli yɛ tsɔji amaamɔhe, nitsumɔhe, hei ni awoɔ tsɔne yɛ, loo yɛ gbɛjegbɛ kome too lɛ nɔŋŋ he. Shiɛlɔi ni jɛ asafoi srɔtoi amli eyaha woji yɛ asa loo tsũi ni amɛɔ yɛ mli, ni amɛyashiɛ yɛ nitsumɔhe kome too lɛ nɔŋŋ. Bei komɛi lɛ enɛ haa nitsulɔi kɛ akutsoŋbii lɛ nuɔ he akɛ aagba amɛnaa, kɛ́ shiɛlɔi lɛ baaa amɛŋɔɔ yɛ be kome too lɛ nɔŋŋ mli po. No hewɔ lɛ, bei pii lɛ, ehi akɛ wɔbaahi wɔsafo lɛ shikpɔŋkuku lɛ mli kɛ́ wɔmiiye odase yɛ maŋ.
Kɛ́ shiɛlɔi komɛi miitao amɛye maŋ odase yɛ asafo kroko ni bɛŋkɛ shikpɔŋkuku mli lɛ, esa akɛ amɛkɛɛ amɛshiɛmɔ nitsumɔ nɔkwɛlɔ lɛ. Lɛ hu ebaayana shiɛmɔ nitsumɔ nɔkwɛlɔ ni yɔɔ asafo kroko lɛ mli lɛ kɛbi gbɛ dani esafoŋbii lɛ ayashiɛ yɛ jɛmɛ. Yɛ hei ni asafoi ni wieɔ wiemɔi srɔtoi shiɛɔ yɛ shikpɔŋkuku kome lɛ nɔŋŋ mli lɛ, esa akɛ shiɛmɔ nitsumɔ nɔkwɛlɔi lɛ kɛ amɛhe agba sane koni akutsoŋbii lɛ akanu he akɛ aasũ amɛtsui. Kɛ́ amɛkɛ amɛhe gba sane jogbaŋŋ lɛ ebaaha nii fɛɛ aya nɔ “bɔ ni yɔɔ fɛo kɛ gbɛnaa gbɛnaa.”—1 Kor. 14:40.
[Mfoniri ni yɔɔ baafa 6]
[Mfoniri ni yɔɔ baafa 6]