Gbɛ Hee ni Nɔ Bɛ ni Atsɔɔ nɔ Ayeɔ Odase yɛ Maŋ
1. Mɛɛ hewalɛ awoɔ asafoi ni yɔɔ hei komɛi yɛ amɛshikpɔŋkuku lɛ mli ni mɛi fɔɔ jɛmɛ tsɔmɔ lɛ ni amɛfee?
1 Awo asafoi babaoo ni yɔɔ hei komɛi yɛ amɛshikpɔŋkuku lɛ mli ni mɛi fɔɔ jɛmɛ tsɔmɔ lɛ hewalɛ ni amɛto maŋ odaseyeli he gbɛjianɔ, kɛtsɔ okpɔlɔ kɛ shwiilii ni amɛaato yɛ hei nɛɛ nɔ. Kɛ́ shwiilii akɛtsuɔ nii lɛ, esa akɛ kɛ́ hooo kwraa lɛ shiɛlɔ kome adamɔ he loo eta sɛɛ. Shi kɛ́ okpɔlɔ akɛtsuɔ nii lɛ, no lɛ esa akɛ shiɛlɔi enyɔ akwɛ nɔ. Esa akɛ mɛi ni abaahã amɛyakwɛ nɔ lɛ afee mɛi ni jieɔ miishɛɛ kɛ naanyobɔɔ kpo, ní abaanyɛ abɛŋkɛ amɛ. Kɛ́ shiɛlɔi lɛ na akɛ mɔ ko miikwɛ woji ni ato lɛ, amɛteŋ mɔ kome baanyɛ ekɛ mɔ lɛ abɔi sanegbaa; ekolɛ ebaanyɛ ebi mɔ lɛ akɛ, “Ani osusu nɔ ni Biblia lɛ kɛɔ yɛ sane nɛɛ he lɛ he pɛŋ?” Shiɛlɔ kome loo enyɔ baanyɛ aye mɛi odase yɛ he ko ni bɛŋkɛ he ni ato woji lɛ yɛ lɛ; esaaa akɛ amɛyaa shɔŋŋ bɔ ni afee ni amɛna woji ni ato lɛ.
2. Gbaa niiashikpamɔ ko ni tsɔɔ sɛɛnamɔ ni yɔɔ maŋ odaseyeli he.
2 Shiɛmɔ gbɛ nɛɛ ehã akɛ mɛi babaoo ebɔi Biblia lɛ kasemɔ. Awula ko ni yaa kɔleji lɛ hala akɛ ebaapɛi saji ni kɔɔ Yehowa Odasefoi ahe lɛ mli ni eŋma wolo yɛ he, shi enaaa Maŋtsɛyeli Asa ko yɛ he ni eyɔɔ lɛ. Otsi sɛɛ lɛ, ena ni ato asafo lɛ woji lɛ eko ashwie okpɔlɔ ko nɔ yɛ skul lɛ mli. Akɛ lɛ je Biblia mli nikasemɔ shishi, ni amrɔ nɛɛ oblayoo nɛɛ ebatsɔ shiɛlɔ ni abaptisi lɛ, ni lɛ hu ekɛ ehe miiwo gbɛ ni atsɔɔ nɔ ayeɔ odase nɛɛ mli.
3. Mɛni shiɛlɔi komɛi ewie yɛ gbɛ nɛɛ ni atsɔɔ nɔ ayeɔ odase lɛ he?
3 Nyɛmi yoo ko ni kɛ ehe ewo maŋ odaseyeli nitsumɔ lɛ mli lɛ wie akɛ: “Mɛi komɛi baa okpɔlɔ loo shwiili lɛ he ni amɛbakɔlɔɔ woji tɛtrɛbii hei ni eba lɛ eko. Mɛi komɛi lé nɔ ko kwraa yɛ Yehowa Odasefoi ahe. Miina akɛ odaseyeli gbɛ nɛɛ baahã nine ashɛ mɛi babaoo anɔ.” Nyɛmi yoo kroko hu kɛɛ akɛ: “Enɛ ji gbɛ hee ni nɔ bɛ ni atsɔɔ nɔ ayeɔ odase, ejaakɛ mɛi lɛ baa oŋɔɔ, ni kɛ́ amɛbɛ wiemɔ lɛ he miishɛɛ po lɛ, amɛmiisumɔ ni amɛle nɔ ko.”
4. Mɛni hewɔ ehi jogbaŋŋ akɛ ákɛ shwiili loo okpɔlɔ ni akɛ woji lɛ shwieɔ nɔ lɛ baama hekome too lɛ nɔŋŋ, yɛ be kome too lɛ nɔŋŋ mli daa otsi lɛ?
4 Ehi jogbaŋŋ akɛ ákɛ okpɔlɔ loo shwiili lɛ baama shi yɛ he kome too lɛ nɔŋŋ, yɛ gbi kome too lɛ nɔŋŋ nɔ, kɛ agbɛnɛ hu yɛ bei kome too lɛ nɔŋŋ mli daa otsi. Kɛ́ afee lɛ nakai lɛ, ehãa mɛi fɔɔ woji lɛ namɔ, ni fiofio lɛ ebafeɔ mlɛo kɛhãa amɛ akɛ amɛaatsi amɛbɛŋkɛ koni amɛbi saji aloo amɛŋɔ woji lɛ eko. Ani nyɛsafo lɛ eto maŋ odaseyeli he gbɛjianɔ? Kɛ́ nakai lɛ, obaanyɛ okɛ ohe awo gbɛ ni yɔɔ miishɛɛ ni woɔ yibii nɛɛ ni atsɔɔ nɔ ‘ashiɛɔ Nyɔŋmɔ Maŋtsɛyeli lɛ’ mli.—Luka 9:60.