Ani Okɛ Woji ni Akɛfɔ̃ɔ Mɛi Anine lɛ Baatsu Nii?

Gbi ko lɛ, gbekɛ nuu ko ni eye afii 11 lɛ yana wolo ko ni akɛmiifɔ̃ mɛi anine koni amɛbabo maŋshiɛmɔ ko ni abaaha ni kɔɔ hɛl he lɛ toi. Ewie yɛ sɛɛ mli akɛ, “Miná wolo nɛɛ he miishɛɛ jogbaŋŋ, ejaakɛ etamɔ nɔ ni mifeɔ efɔŋ be fɛɛ be, ni enɛ haa mihaoɔ waa yɛ hɛl la ko ní akɛmi baawo mli kɛ́ migbo lɛ he.” Eyabo maŋshiɛmɔ lɛ toi, ni yɛ aaafee afi kome sɛɛ beni akɛ lɛ ekase Biblia lɛ shii abɔ lɛ, abaptisi lɛ. Bɔ ni fee ní Karl Klein, ní sɛɛ mli lɛ ekɛ afii babaoo sɔmɔ ákɛ Yehowa Odasefoi a-Nɔyeli Kuu lɛ mlinyo lɛ je Kristofoi ashiɛmɔ nitsumɔ ni etsu ewala gbii abɔ fɛɛ lɛ shishi nɛ. Woji ni akɛfɔ̃ɔ mɛi anine lɛ eko ni ye bua lɛ.

Woji ni akɛfɔ̃ɔ mɛi anine lɛ kã he eji dɛŋdade ni akɛyeɔ mɛi odase yɛ gbɛ ni mɔɔ shi nɔ yɛ je lɛŋ hei babaoo ŋmɛnɛ. Eŋɔɔ wɔnaa waa akɛ wɔkɛ woji ni akɛfɔ̃ɔ mɛi anine lɛ aaatsu nii ekoŋŋ yɛ Ghana. Shiɛlɔi babaoo baayɔse akɛ woji nɛɛ eko ni amɛkɛaaha mɛi lɛ ji gbɛ ni hi jogbaŋŋ ni amɛaatsɔ nɔ amɛha mɛi lɛ ale amɛ, ni no baaha amɛje sanegbaa shishi hu. Fɔlɔi baanyɛ aha amɛbii bibii lɛ hu aná shiɛmɔ nitsumɔ lɛ mli gbɛfaŋnɔ kɛtsɔ woji nɛɛ eko ni gbekɛbii lɛ kɛaaha yɛ shinaa ko naa lɛ nɔ. Shiɛlɔi ni ŋmalaa woji kɛmajeɔ mɛi kɛyeɔ amɛ odase lɛ baanyɛ amɛkɛ eko awo amɛwoji lɛ amli ní amɛkɛtswa kpeei lɛ ahe adafi. Ni yɛ anɔkwale mli lɛ, woji ni akɛfɔ̃ɔ mɛi anine lɛ baafee gbɛ ni hi jogbaŋŋ ni aaatsɔ nɔ afɔ̃ Biblia mli nikaselɔi kɛ mɛi ni yɔɔ wiemɔ lɛ he miishɛɛ lɛ anine kɛba wɔkpeei lɛ ashishi.

Atsɔɔ bɔ ni afeɔ asafoŋ kpeei lɛ eko fɛɛ eko ahaa lɛ mli kuku yɛ wolo ni akɛfɔ̃ɔ mɛi anine lɛ hiɛ. Akɛni atsɔko he ni Maŋtsɛyeli Asa lɛ yɔɔ kɛ bei ni akɛkpeɔ lɛ yɛ wolo nɛɛ nɔ hewɔ lɛ, ehe baahia ni oŋmala enɛɛmɛi yɛ nɔ dani okɛha. Kɛ́ aasumɔ lɛ, abaanyɛ aŋmala saji nɛɛ yɛ wolo lɛ nɔ tɛ̃ɛ loo akɛ saji nɛɛ awo stamp nɔ ní akɛshi wolo lɛ nɔ. Ani okɛ woji ni akɛfɔ̃ɔ mɛi anine lɛ baatsu nii jogbaŋŋ yɛ oshiɛmɔ nitsumɔ lɛ mli?