Ta ni Abaafã yɛ Jeŋ Fɛɛ Kɛtswa “Nyiɛmɔ Kristo lɛ Sɛɛ!” Kpokpaa Wulu nɔ Kpee lɛ He Adafi
Shiɛlɔi Baaku Sɛɛ Amɛja Ninefɔ̃ɔ Wolo Krɛdɛɛ ko Ekoŋŋ
1 Nyɛsɛɛ afi lɛ ta ni afã yɛ jeŋ fɛɛ kɛtswa “Kpɔ̃mɔ Ebɛŋkɛ!” Kpokpaa Wulu nɔ Kpee lɛ he adafi lɛ ná mɛi ni yɔɔ wiemɔ lɛ he miishɛɛ lɛ anɔ hewalɛ waa. Ebafee klɛŋklɛŋ be kɛha mɛi ni kpɛlɛ ninefɔ̃ɔ krɛdɛɛ lɛ nɔ ni amɛba kpee lɛ akɛ amɛkɛ Yehowa Odasefoi lɛ aaaná mumɔŋ okpɔlɔŋmɛɛ ko ni yɔɔ miishɛɛ mli ŋɔɔmɔ. (Yes. 65:13) Amɛná he miishɛɛ akɛ amɛkɛ wɔnyɛmimɛi Kristofoi ni kɛ miishɛɛ efee ekome lɛ aaabɔ. (Lala 133:1) Bɔni afee ni wɔnyɛ wɔye wɔbua mɛi babaoo koni amɛya “Nyiɛmɔ Kristo lɛ Sɛɛ!” Kpokpaa Wulu nɔ Kpee lɛ, wɔbaaku sɛɛ wɔja ninefɔ̃ɔ wolo krɛdɛɛ ko ekoŋŋ yɛ jeŋ fɛɛ.
2 Nɔ ni Anyɛ Atsu Nyɛsɛɛ Afi Lɛ: Amaniɛbɔɔ ni nine shɛ nɔ kɛjɛ je lɛŋ fɛɛ lɛ tsɔɔ akɛ, yibii kpakpai jɛ “Kpɔ̃mɔ Ebɛŋkɛ!” Kpokpaa Wulu nɔ Kpee lɛ he adafi ni atswa lɛ mli kɛba. Awie wɔhe ekpakpa yɛ hei pii. Ákɛ nɔkwɛmɔnɔ lɛ, yɛ maŋ ko nɔ lɛ, adafitswaa wolo ko bɔ tafãa lɛ he amaniɛ yɛ wolo lɛ hei ekpaa sɔŋŋ mli akɛ: “Bɔni afee ni Odasefoi lɛ anine ashɛ mɛi fɛɛ anɔ dani kpee be lɛ ashɛ lɛ, amɛkɛ hiɛdɔɔ miitsu nii yɛ akutsei lɛ amli—amɛkɛ bei pii miitsu nii, amɛmiiya hei ni jɛkɛ, ni amɛtsɛɛɛ yɛ mɔ ko he.” Yɛ maŋ kroko nɔ lɛ, adafitswaa nitsumɔhe ko ná bɔ ni ato ninefɔ̃ɔ wolo lɛ jaa lɛ he gbɛjianɔ aha lɛ he miishɛɛ, ni enɛ ha amɛwie he waa yɛ amɛ adafitswai amli. Kɛ́ hooo kwraa lɛ, adafitswaa woji etɛ kɛ miishɛɛ tswa wɔnifeemɔ lɛ he adafi dani kpee lɛ je shishi. Adafitswalɔ ko ŋmala saji babaoo ni hé nɔ ni fe baafai enyɔ ewo adafitswaa wolo ko Hɔgbaa nɔ̃ ni jeɔ kpo lɛ mli. Ewie wɔhemɔkɛyeli, wɔkɛ wɔnyɛmimɛi ateŋ naanyobɔɔ, ninefɔ̃ɔ wolo ni wɔjaa lɛ, kɛ wɔkpee lɛ he fitsofitso. Beni shiɛlɔ ko kɛ ninefɔ̃ɔ wolo lɛ haa shiatsɛ ko yɛ eshinaa naa lɛ, shiatsɛ lɛ fo wiemɔ lɛ mli ni ekɛɛ: “Hɛɛ. No he sane po mikaneɔ yɛ adafitswaa wolo lɛ mli lɛ!” Shiatsɛ kroko hu kɛɛ akɛ: “Nyɛhe sane mikaneɔ bianɛ nɔŋŋ ni nyɛshɛ biɛ nɛɛ! Ani minɔ ní nyɛkɛbaaha mi nɛ?” Kɛkɛ ni yoo lɛ kɛfata he akɛ, “Ehi jogbaŋŋ akɛ Yehowa Odasefoi lɛ miifee nɔ ko ni tamɔ nɛkɛ.”
3 Mɛi ni yɔɔ wiemɔ lɛ he miishɛɛ lɛ ateŋ mɛi pii kɛ amɛninefɔ̃ɔ wolo lɛ ba kpee lɛ shishi. Mɛi ni yɔɔ wiemɔ lɛ he miishɛɛ lɛ ateŋ mɛi komɛi fã gbɛ kakadaŋŋ kɛba kpee lɛ fãi komɛi ashishi. Mɔdɛŋ ni wɔbɔ kɛfɔ̃ mɛi krokomɛi anine lɛ ha mɛi ayibɔ ni ba kpee lɛ tee hiɛ, ni yɛ maŋ ko nɔ lɛ, mɛi ni tee kpee lɛ ayifalɛ tee hiɛ oha mlijaa 27 kɛ́ akɛto afi ni tsɔ hiɛ lɛ yibɔ lɛ he.
4 Shikpɔŋkuku lɛ Mli Nitsumɔ: Nyɛbaanyɛ nyɛbɔi ninefɔ̃ɔ wolo lɛ jaa kɛ́ eshwɛ otsii etɛ dani nyɛkpee lɛ aaaje shishi. Esa akɛ abɔ mɔdɛŋ fɛɛ ni abaanyɛ koni aja ninefɔ̃ɔ wolo lɛ yɛ shikpɔŋkuku lɛ mli fɛɛ. Yɛ asafoi ni yɔɔ shikpɔŋkukuji ni dara lɛ amli lɛ, shiɛlɔi baanyɛ amɛkɛ nilee ashi ninefɔ̃ɔ wolo lɛ yɛ mɛi ni amɛyanaaa yɛ shĩa lɛ ashinaai anaa kɛ́ eshwɛ otsi ni kpee be lɛ baashɛ. Esa akɛ asafoi fɛɛ abɔ mɔdɛŋ akɛ amɛbaaja ninefɔ̃ɔ wolo ni akɛha amɛ lɛ fɛɛ, ní amɛtsu amɛshikpɔŋkuku lɛ mli nii kɛmɔ shi bɔ ni amɛaanyɛ. Gbɛgbalɔi ni yɔɔ asafo lɛ mli lɛ baanyɛ amɛkɛ nɔ ni baashwɛ lɛ atsu nii.
5 Nɔ ni Esa akɛ Okɛɛ: Obaanyɛ okɛɛ nɔ ko tamɔ: “Wɔkɛ mɛi krokomɛi efee ekome yɛ je lɛŋ fɛɛ kɛmiija ninefɔ̃ɔ wolo nɛɛ kɛha nifeemɔ ko ni he hiaa waa ni abaafee lɛ. Ofainɛ onɔ nɛ. Obaana saji krokomɛi ni he hiaa yɛ wolo lɛ nɔ.” Kɛ́ wɔha wɔshiɛmɔ wiemɔ lɛ fee kuku lɛ, wɔbaanyɛ wɔja wolo lɛ pii. Shi kɛ́ shiatsɛ lɛ yɛ sanebimɔi komɛi lɛ, ŋmɛɛ otsui shi ni oha lɛ hetoo. Kɛ́ mɔ lɛ jie miishɛɛ kpo lɛ, ŋmalamɔ ehe saji oshwie shi, ni oku osɛɛ oyasara lɛ yɛ be kukuoo mli.
6 Kwɛ bɔ ni ehe hiaa waa akɛ wɔɔbɔ mɔdɛŋ wɔnyiɛ Kristo lɛ sɛɛ! (Yoh. 3:36) Kpokpaa wulu nɔ kpee ni wɔbaafee lɛ baaye abua mɛi ni baaya lɛ ni amɛfee nakai. Wɔheɔ wɔyeɔ akɛ ta ni abaafã yɛ jeŋ fɛɛ kɛtswa “Nyiɛmɔ Kristo lɛ Sɛɛ!” Kpokpaa Wulu nɔ Kpee lɛ he adafi lɛ baaha wɔye mɛi babaoo odase ekoŋŋ. No hewɔ lɛ, okɛ ekãa afɔ̃ mɛi babaoo nine kɛba kpee lɛ bɔ ni ooonyɛ. Eba akɛ Yehowa aaajɔɔ mɔdɛŋ ni obɔɔ beni okɛ ohe woɔ jeŋ fɛɛ tafãa nɛɛ mli lɛ nɔ.