Tafãa ko Ní Woɔ Yibii
Kɛ́ eshwɛ otsii etɛ ni asafoi lɛ baaya amɛ kpee lɛ, amɛ baajara ninefɔ̃ɔ woji kɛfɔ̃ mɛi ni yɔɔ wiemɔ lɛ he miishɛɛ ni yɔɔ shikpɔŋkuku lɛ mli lɛ nine kɛya kpee lɛ. Yiŋtoo kpakpa hewɔ ni afãa ta nɛɛ daa afi lɛ. Bei pii lɛ, mɛi ni kpɛlɛɔ ninefɔ̃ɔ lɛ nɔ ni amɛbaa kpee lɛ náa Ŋmalɛ naa wiemɔi ni ahaa lɛ, bɔ ni ato nitsumɔi lɛ ahe gbɛjianɔ jogbaŋŋ aha ní mɛi ni kɛ amɛhe eha ji mɛi ni tsuɔ lɛ, bɔ ni wɔbaa wɔjeŋ jogbaŋŋ wɔhaa lɛ kɛ ekomefeemɔ ni yɔɔ wɔteŋ lɛ he miishɛɛ waa. (Lala 110:3; 133:1; Yes. 65:13, 14) Ani enɛ tsɔɔ akɛ ta ni wɔfãa lɛ woɔ yibii, titri lɛ yɛ hei ni esa akɛ mɛi ni yɔɔ wiemɔ lɛ he miishɛɛ lɛ afã gbɛ kakadaŋŋ kɛya kpee lɛ?
Beni agbe afi 2011 kpokpaa wulu nɔ kpee lɛ naa lɛ, yoo ko ni na ninefɔ̃ɔ wolo lɛ eko yɛ eshinaa naa lɛ ŋma nitsumɔhe nine ko wolo. Bei pii kɛ́ Yehowa Odasefoi tswa eshinaa lɛ eteɔ. Eŋma akɛ: “Miyɛ shĩa fɛfɛo kɛ wu ni nɔ bɛ, ni misusu akɛ miyɛ nɔ fɛɛ nɔ ni baaha maná miishɛɛ. Dɔlɛ sane ji akɛ, fɛɛ sɛɛ lɛ minaaa miishɛɛ, ni yɛ anɔkwale mli lɛ yiŋtoo ko kwraa bɛ mishihilɛ he. No hewɔ lɛ, mikpɛ mi yiŋ akɛ makudɔ tsɔne kilomitai 320 kɛya Hɔɔ nifeemɔ lɛ shishi.” Ená nifeemɔ lɛ he miishɛɛ aahu akɛ etswa ewu ni ekɛɛ lɛ akɛ ebaahi shi ní kɛ́ je tsɛre lɛ eya Hɔgbaa hu. “Mibo wiemɔi ni aha lɛ fɛɛ toi, mikɛ Yehowa Odasefoi babaoo kpe, no hewɔ lɛ mikpɛ miyiŋ akɛ misumɔŋ ni enɛ aba naagbee.” Beni eku esɛɛ eba shĩa lɛ, ebɔi nikasemɔ, ni yɛ nyɔji ejwɛ mli lɛ ebatsɔ shiɛlɔ ni abaptisiko lɛ. “Eŋɔɔ minaa waa akɛ mina nakai ninefɔ̃ɔ wolo lɛ yɛ mishinaa lɛ naa, ejaakɛ eha yiŋtoo eba mishihilɛ he diɛŋtsɛ!”
Mɛi komɛi ni nine shɛɔ ninefɔ̃ɔ wolo lɛ eko nɔ lɛ baaba kpee lɛ. No hewɔ lɛ, okɛ ekãa atsu tafãa ni he hiaa waa nɛɛ. Kɛ́ ninefɔ̃ɔ woji ni aha bo lɛ eko shwɛ lɛ, kɛba he ni afeɔ kpee lɛ yɛ lɛ koni okɛye odase beni onyiɛɛɛ shiɛmɔ.
[Akrabatsa ni yɔɔ baafa 5]
Te Wɔɔfee Tɛŋŋ Wɔkɛ Ninefɔ̃ɔ Wolo lɛ Aha?
Bɔni afee ni wɔnyɛ wɔtsu wɔshikpɔŋkuku lɛ fɛɛ mli nii lɛ, ebaabi ni wɔha wɔwiemɔ lɛ afee kuku. Wɔbaanyɛ wɔkɛɛ nɔ ko tamɔ nɛkɛ: “Hɛloo. Wɔmiijara ninefɔ̃ɔ wolo nɛɛ yɛ jeŋ fɛɛ. Onɔ̃ nɛ. Obaana ninefɔ̃ɔ nɛɛ he saji babaoo yɛ wolo lɛ nɔ.” Wiemɔ kɛ miishɛɛ. Kɛ́ wɔkɛ wɔhe miiwo tafãa lɛ mli yɛ otsi lɛ naagbee lɛ, esa akɛ okɛ woji tɛtrɛbii lɛ hu aha kɛ́ ebaahi.