Jee Gbɛ Ofɔ̃ Mɛi Nine

1. Mɛɛ be wɔbaabɔi mɛi ninefɔ̃ɔ kɛhã kpee lɛ?

¹ Kɛ́ ooto gbɛjianɔ ni ohoo niyenii krɛdɛɛ ko ohã onanemɛi loo owekumɛi, ni ebaahã ofite be kɛ shika pii lɛ, ekã shi faŋŋ akɛ okɛ miishɛɛ baafɔ̃ amɛ nine ni amɛbaye. Nakai nɔŋŋ agbo deŋme kɛto mumɔŋ niyenii ni akɛbaahã wɔ yɛ kpokpaa wulu nɔ kpee ni kã wɔhiɛ ni wɔbaaya lɛ he gbɛjianɔ. Kɛ́ eshwɛ otsii etɛ ni wɔbaaya kpee lɛ, Yehowa baahã wɔná hegbɛ ni wɔkɛfɔ̃ mɛi krokomɛi nine. Mɛni baaye abua wɔ ni wɔkɛ miishɛɛ afɔ̃ mɛi nine?

2. Mɛni baatsirɛ wɔ ni wɔkɛ wɔhe awo ninefɔ̃ɔ woji lɛ ajaramɔ mli kɛmɔ shi?

² Kɛ́ wɔjwɛŋ bɔ ni wɔnáa tsɔsemɔ kpakpa ni Yehowa kɛhãa wɔ yɛ kpeei wuji ashishi lɛ he sɛɛ lɛ nɔ lɛ, ebaatsirɛ wɔ ni wɔkɛ wɔhe awo ninefɔ̃ɔ woji lɛ ajaramɔ mli kɛmɔ shi. (Yes. 65:13, 14) Esa akɛ wɔkai hu akɛ ta ni wɔfãa daa afi kɛjaraa ninefɔ̃ɔ woji nɛɛ woɔ yibii. (Kwɛmɔ akrabatsa ni ji, “Ewoɔ Yibii” lɛ.) Mɛi ni wɔfɔ̃ɔ amɛ nine lɛ ateŋ mɛi komɛi kɛ wɔ baaya kpee lɛ, shi mɛi komɛi hu eyaŋ. Ekɔɔɔ he eko mɛi abɔ ni baaba kpee lɛ, mɔdɛŋ ni wɔbɔɔ kɛjaraa ninefɔ̃ɔ woji lɛ kɛ yijiemɔ hãa Yehowa, ni ehãa anaa hu akɛ emli hi.—Lala 145:3, 7; Kpoj. 22:17.

3. Mɛɛ gbɛ nɔ wɔbaatsɔ wɔjara ninefɔ̃ɔ woji lɛ?

³ Esa akɛ onukpai akuu lɛ akwɛ bɔ ni amɛsafo lɛ baafee ajara ninefɔ̃ɔ woji lɛ yɛ shikpɔŋkuku lɛ mli fɛɛ, ni amɛkwɛ kɛji esa akɛ ashi eko yɛ mɛi ni bɛ shĩa lɛ ashinai anaa, loo akɛhã kɛ́ aaye maŋ odase yɛ amɛshikpɔŋkuku lɛ mli. Kɛ́ nyɛmiijara ninefɔ̃ɔ woji lɛ yɛ otsi lɛ naagbee lɛ, nyɛkɛ woji tɛtrɛbii lɛ afataa he, kɛ́ ebaahi. Kɛ́ wɔgbe ninefɔ̃ɔ lɛ naa lɛ, kwɛ miishɛɛ ni wɔbaaná akɛ wɔkɛ wɔhe wo mli kɛ ekãa, ni akɛ wɔfɔ̃ mɛi babaoo ni wɔbaanyɛ lɛ nine kɛbafata wɔhe yɛ mumɔŋ okpɔlɔ ni Yehowa ŋmɛ wɔ lɛ shishi!

Ewoɔ Yibii

Afii babaoo ni eho nɛ be ni nyɛmi yoo ko jaraa ninefɔ̃ɔ woji lɛ, eyiŋ etɛ̃ɛɛ lɛ kɛji sɛɛnamɔ yɛ he akɛ agbo deŋme kɛjara ninefɔ̃ɔ woji lɛ. Ebi ehe akɛ, ‘Ani mɛi baakpɛlɛ ninefɔ̃ɔ lɛ nɔ ni amɛkɛ wɔ aya kpee lɛ?’ Hɔɔ leebi be ni atee kpee lɛ, ena owula ko ni yɔɔ Sikjamɔ lɛ mli yɛ he ni eta lɛ gbɛ, ni efee eyiŋ akɛ ekɛ lɛ baagba sane. Nuu lɛ hã nyɛmi yoo lɛ le akɛ, eba kpee lɛ yɛ ninefɔ̃ɔ wolo lɛ eko ni enine shɛ nɔ lɛ hewɔ. Ebi nyɛmi yoo lɛ saji pii, ni ehã lɛ fɛɛ hetoo. Ewie akɛ enya kpee lɛ he waa, ni etsɔɔ hu akɛ bɔ ni mɛi ni eba kpee lɛ esaa amɛhe kɛ bɔ ni amɛfeɔ amɛnii lɛ sa ehiɛ waa. Sɛɛ mli yɛ nakai gbi lɛ nɔŋŋ mli lɛ, nyɛmi yoo lɛ kɛ gbalashihilɛ mli hefatalɔi komɛi ni ta emasɛi lɛ hu bɔi sanegbaa. Amɛ hu amɛwó bɔs kɛba kpee lɛ yɛ ninefɔ̃ɔ wolo ni amɛnine shɛ nɔ lɛ hewɔ. Amɛnya kpee lɛ he waa, ni amɛkɛɛ amɛbaaba Hɔgbaa hu. Enɛ hã nyɛmi yoo lɛ yɔse bɔ ni ninefɔ̃ɔ woji lɛ ni wɔjaraa daa afi lɛ he yɔɔ sɛɛnamɔ hã.
Yɛ kpee ko ni afee nyɛsɛɛ nɛɛ shishi lɛ, nuu ko kɛ eŋa ni amɛji daa gbɛgbalɔi lɛ kɛ gbalashihilɛ mli hefatalɔi komɛi ni efɔ̃ nɔ yɛ afii amli lɛ gba sane. Gbalashihilɛ mli hefatalɔi lɛ kɛɛ akɛ, enɛ ji klɛŋklɛŋ ni amɛbaa wɔkpee lɛ eko. Gbɛgbalɔi lɛ bi amɛ akɛ, “Namɔ fɔ̃ nyɛ nine?” Amɛhã hetoo akɛ, “Gbi ko be ni wɔba shĩa lɛ, wɔna ninefɔ̃ɔ wolo lɛ hɔ wɔshinaa lɛ shishi.” Amɛkane ninefɔ̃ɔ wolo lɛ, ni amɛŋmala kupɔŋ ni yɔɔ sɛɛ lɛ nɔ nii po. Mɛi krokomɛi ni eba kpee lɛ kɛ gbalashihilɛ mli hefatalɔi nɛɛ ja amɛshwane niyenii lɛ. Amɛnya kpee lɛ he aahu akɛ amɛto gbɛjianɔ akɛ amɛbaaba enɔ jetsɛremɔ hu. Ato gbɛjianɔ ni ayasara amɛ koni akɛ amɛ akase nii.