Ye Obua Mɛi Koni ‘Amɛjɛ Amɛtsui Mli Amɛfee Toiboo’
1. Mɛni Yehowa taoɔ ni ejálɔi afee?
1 Toiboo ji nifeemɔ ni he hiaa ni haa ajáa Yehowa yɛ gbɛ ní ekpɛlɛɔ nɔ lɛ nɔ. (5 Mose 12:28; 1 Pet. 1:14-16) Etsɛŋ ni Nyɔŋmɔ baabu “mɛi ni leee Nyɔŋmɔ kɛ mɛi ni booo . . . sanekpakpa lɛ toi” lɛ fɔ́. (2 Tes. 1:8) Mɛɛ gbɛ nɔ wɔɔtsɔ wɔye wɔbua mɛi ní ‘amɛjɛ amɛtsui mli amɛbo’ tsɔɔmɔi ni yɔɔ Nyɔŋmɔ Wiemɔ lɛ mli lɛ atoi?—Rom. 6:17.
2. Mɛni hewɔ ehe hiaa ni aye abua mɛi koni amɛná hemɔkɛyeli ni mli wa lɛ?
2 Ní Wɔɔye Wɔbua Amɛ ní Amɛná Hemɔkɛyeli kɛ Suɔmɔ: Yɛ Ŋmalɛi lɛ amli lɛ, toiboo kɛ hemɔkɛyeli yɛ tsakpaa diɛŋtsɛ. Bɔfo Paulo wie ‘naanɔ Nyɔŋmɔ lɛ kitã ni haa atsɔɔ hemɔkɛyeli nɔ afeɔ toiboo’ lɛ he. (Rom. 16:26) Hebri yitso 11 lɛ tsĩɔ hemɔkɛyeli he nɔkwɛmɔnii srɔtoi atã, ni enɛɛmɛi ateŋ babaoo kɔɔ nii ni afeɔ yɛ Yehowa suɔmɔnaa nii ni étsɔɔ lɛ kɛ gbeekpamɔ naa lɛ he. (Heb. 11:7, 8, 17) Yɛ gbɛ kroko nɔ lɛ, toigbele tsɔɔ hemɔkɛyeli ni abɛ. (Yoh. 3:36; Heb. 3:18, 19) Ehe miihia ni wɔha wɔhe asa yɛ bɔ ni wɔkɛ Nyɔŋmɔ Wiemɔ lɛ tsuɔ nii wɔhaa lɛ mli, bɔni afee ni wɔnyɛ wɔye wɔbua mɛi ní amɛná hemɔkɛyeli ni haa afeɔ toiboo lɛ.—2 Tim. 2:15; Yak. 2:14, 17.
3. (a) Toiboo kɛ suɔmɔ yɛ tsakpaa yɛ mɛɛ gbɛ nɔ? (b) Mɛɛ gbɛ nɔ wɔbaanyɛ wɔtsɔ wɔye wɔbua Biblia mli nikaselɔi koni amɛná suɔmɔ amɛha Yehowa?
3 Toiboo kɛ suɔmɔ ni ayɔɔ kɛha Nyɔŋmɔ lɛ hu yɛ tsakpaa. (5 Mose 5:10; 11:1, 22; 30:16) Yohane Klɛŋklɛŋ Wolo 5:3 lɛ kɛɔ akɛ: ‘Enɛ ji Nyɔŋmɔ suɔmɔ lɛ, akɛ wɔye ekitai lɛ anɔ; ni ekitai lɛ waaa.’ Mɛɛ gbɛ nɔ wɔɔtsɔ wɔye wɔbua Biblia mli nikaselɔi koni amɛná suɔmɔ amɛha Yehowa? Kɛ́ okɛ amɛ miikase nii lɛ, taomɔ hegbɛi ni okɛha amɛná hiɛsɔɔ kɛha Yehowa sui lɛ. Tsɔɔmɔ amɛ bɔ ni ohiɛ sɔɔ Nyɔŋmɔ jogbaŋŋ ha. Ye obua nikaselɔ lɛ koni esusu bɔ ni eeefee ená ekɛ Yehowa teŋ wekukpaa lɛ he. Nɔ titri ni baakanya mɛi—kɛ wɔ diɛŋtsɛ hu—koni wɔkɛ amɛ fɛɛ ajɛ tsui mli kɛbo Yehowa toi ji suɔmɔ ni aaaná aha lɛ.—Mat. 22:37.
4. (a) Mɛni hewɔ wɔnɔkwɛmɔnɔ he hiaa lɛ? (b) Mɛni esa akɛ wɔfee koni wɔná “toiboo tsui”?
4 Kɛtsɔ Wɔnɔkwɛmɔnɔ Nɔ: Gbɛ ni mɔɔ shi jogbaŋŋ ni wɔbaanyɛ wɔtsɔ nɔ wɔwo mɛi ahewalɛ koni amɛbo sanekpakpa lɛ toi ji wɔnɔkwɛmɔnɔ. Shi kɛlɛ, ehe miihia ni wɔya nɔ wɔbɔ mɔdɛŋ koni wɔná “toiboo tsui.” (1 Maŋ. 3:9; Abɛi 4:23) Mɛni enɛ biɔ ni wɔfee? Lɛɛ otsui lɛ kɛtsɔ daa Biblia kasemɔ kɛ kpeeiyaa nɔ. (Lala 1:1, 2; Heb. 10:24, 25) Okɛ mɛi ni tsui emɔ anɔkwale lɛ abɔ. (Abɛi 13:20) Okɛ ohe awo shiɛmɔ nitsumɔ lɛ mli daa, kɛ shwelɛ akɛ oooye obua mɛi ni yɔɔ oshikpɔŋkuku lɛ mli lɛ. Sɔlemɔ obi Yehowa ní eye ebua bo koni oná tsui kpakpa. (Lala 86:11) Kwa nibii ni baanyɛ afite otsui lɛ, tamɔ hiɛtserɛjiemɔ ni jeŋba shara loo yiwalɛ nifeemɔ yɔɔ mli. Tiumɔ nibii ni baaha obɛŋkɛ Nyɔŋmɔ kpaakpa ni ewo okɛ lɛ teŋ wekukpaa lɛ mli hewalɛ lɛ asɛɛ.—Yak. 4:7, 8.
5. Aajɔɔ mɛi ni feɔ toiboo lɛ yɛ mɛɛ gbɛ nɔ?
5 Yehowa wo ewebii ni hi shi yɛ blema lɛ ashi akɛ kɛ́ amɛbo egbee toi lɛ, ebaajɔɔ amɛ kɛteke nɔ. (5 Mose 28:1, 2) Ŋmɛnɛ, Yehowa miijɔɔ “mɛi ni boɔ lɛ toi lɛ” jogbaŋŋ nakai nɔŋŋ. (Bɔf. 5:32) No hewɔ lɛ, nyɛhaa wɔtsɔa wɔnitsɔɔmɔ kɛ wɔnɔkwɛmɔnɔ lɛ nɔ wɔye wɔbua mɛi koni amɛjɛ amɛtsui mli amɛfee toiboo.