Ná Sui Kpakpai Koni Oná Jɔɔmɔi Babaoo
1. Mɛni hewɔ ehe hiaa ni opɛi mumɔŋ nibii ni okɛ ohe woɔ mli daa lɛ amli okwɛ lɛ?
1 Beni obatsɔ Kristofonyo etsɛko lɛ, ekolɛ obɔ mɔdɛŋ babaoo bɔni afee ni daa gbi lɛ, okɛ ohe awo mumɔŋ nifeemɔ ko mli, tamɔ Biblia kasemɔ, Kristofoi akpeeiyaa, shiɛmɔyaa, kɛ sɔlemɔ. Akɛni Yehowa jɔɔ omɔdɛŋbɔɔ lɛ nɔ hewɔ lɛ, otee hiɛ yɛ mumɔŋ. Ekolɛ, abaptisi bo nɛɛ, afii saŋŋ eho. Ani okã he ohiɛ mumɔŋ sui kpakpai ni ojie lɛ kpo beni obaa obatsɔ Kristofonyo lɛ mli kɛbashi ŋmɛnɛ?
2. Mɛɛ gbɛ nɔ wɔnáa Biblia lɛ ni wɔkaneɔ daa lɛ he sɛɛ?
2 Pɛimɔ Nibii ni Ofeɔ Daa lɛ Amli Okwɛ: Ani okɛfee osu akɛ obaakane Nyɔŋmɔ Wiemɔ lɛ mli fã ko daa gbi? Kwɛ jɔɔmɔi ni wɔnáa kɛjɛɔ enɛ feemɔ mli! (Yosh. 1:8; Lala 1:2, 3) Yɛ blema Israel lɛ, abi koni mɔ fɛɛ mɔ ni aaawo lɛ maŋtsɛ lɛ aŋma Mla lɛ eko eha ehe koni ekane “ewala gbii abɔ fɛɛ.” Mɛɛ sɛɛ ebaaná yɛ enɛ feemɔ mli? No baaha eba ehe shi ni ekase Yehowa gbeyeishemɔ bɔni afee ni ekaje E-kitãi lɛ asɛɛ. (5 Mose 17:18-20) Nakai nɔŋŋ ŋmɛnɛ lɛ, Biblia lɛ ni wɔkaneɔ daa lɛ yeɔ buaa wɔ koni wɔhe akahi shwamɔ ni wɔfee mɛi krɔŋŋi yɛ nɛkɛ yiwalɛ jeŋ ni ekpɔtɔ nɛɛ mli. Kɛfata he lɛ, esaa wɔ jogbaŋŋ kɛha shiɛmɔ nitsumɔ lɛ.—Fil. 2:15; 2 Tim. 3:17.
3. Mɛɛ jɔɔmɔi wɔnáa kɛjɛɔ kpeei ni wɔyaa daa lɛ amli?
3 Yesu fɔɔ kpeehe lɛ ni ji he ni asusuɔ Ŋmalɛi lɛ ahe yɛ lɛ yaa. (Luka 4:16) Ŋwanejee bɛ he akɛ, no waje lɛ ni enyɛ edamɔ kaai ni ekɛkpe lɛ anaa. Wɔ hu mumɔŋ tsɔsemɔi ni wɔnine shɛɔ nɔ yɛ asafoŋ kpeei ashishi kɛ ‘hewalɛ ni wɔwoɔ wɔhe’ yɛ jɛmɛ lɛ wajeɔ wɔ. (Rom. 1:12) Wɔ kɛ wɔnyɛmimɛi lɛ ahenaabuamɔ lɛ yeɔ buaa ni wɔnyɛɔ wɔdamɔɔ naagbai ni wɔkɛkpeɔ yɛ naagbee gbii nɛɛ amli lɛ anaa. (Heb. 10:24, 25) Ani okã he oyaa asafoŋ kpeei fɛɛ?
4. Mɛɛ gbɛ nɔ wɔhe ni wɔkɛwoɔ shiɛmɔ nitsumɔ lɛ mli daa otsi lɛ he baa sɛɛnamɔ kɛhaa wɔ?
4 Ŋmalɛi lɛ bɔɔ wɔ amaniɛ akɛ bɔfoi lɛ jaje sanekpakpa lɛ “yɛ sɔlemɔwe lɛ kɛ shĩai be fɛɛ be.” (Bɔf. 5:42) Ekolɛ, wɔnyɛŋ wɔshiɛ daa gbi, shi ani wɔbaanyɛ wɔkɛfee wɔsu akɛ daa otsi lɛ wɔbaaná gbɛfaŋnɔ ko yɛ shiɛmɔ nitsumɔ lɛ mli? Kɛ́ wɔfee nakai lɛ, wɔhe baasa jogbaŋŋ yɛ Nyɔŋmɔ Wiemɔ lɛ kɛ nitsumɔ mli, ni ekolɛ wɔbaaná Biblia mli anɔkwalei ni wɔtsɔɔ mɛi lɛ amli niiashikpamɔi ni yɔɔ miishɛɛ.
5. Mɛni hewɔ ehe hiaa waa akɛ wɔsɔle wɔha Yehowa daa lɛ?
5 Ajɔɔ gbalɔ Daniel babaoo yɛ Yehowa ni ‘esɔmɔ lɛ daa’ yɛ ewala gbii abɔ fɛɛ mli lɛ hewɔ. Yehowa ni esɔleɔ ehaa daa fata sɔɔmɔ ni esɔmɔ lɛ lɛ he. (Dan. 6:11, 17, 21) Nakai nɔŋŋ, kɛ́ wɔ hu wɔjɛ wɔtsuiŋ wɔsɔle wɔha Yehowa daa lɛ, ebaaduro wɔ emumɔ krɔŋkrɔŋ lɛ eko. (Luka 11:9-13) Kɛfata he lɛ, Yehowa baabo wɔsɔlemɔ lɛ toi ní etsi ebɛŋkɛ wɔ, ni no baaha wekukpãa kpakpa abakã wɔ kɛ lɛ teŋ. (Lala 25:14; Yak. 4:8) Mɛɛ jɔɔmɔ po nɛ! Belɛ miamɔ ohiɛ koni oná mumɔŋ sui kpakpai ni Yehowa ajɔɔ bo babaoo.