Wɔhiɛ Sɔɔ Hegbɛi ní Wɔná Kɛsɔmɔɔ Nyɔŋmɔ Lɛ!
1 Yehowa kɛ hegbɛi srɔtoi babaoo eha etsuji yɛ adesai ayinɔsane mli fɛɛ. Eha amɛ hegbɛi ní amɛsɔmɔ lɛ, ekɔɔɔ he eko kɛ́ amɛji hii loo yei, afii abɔ ni amɛye, loo gbɛhe mli ni amɛyɔɔ yɛ shihilɛ mli. (Luka 1:41, 42; Bɔf. 7:46; Fil. 1:29) Mɛɛ hegbɛi ekɛhaa wɔ ŋmɛnɛ?
2 Hegbɛi Komɛi ni Wɔná: Wɔná hegbɛ akɛ Yehowa aaatsɔɔ wɔ nii. (Mat. 13:11, 15) Yehowa yi ni wɔjieɔ kɛtsɔ saji ahetoo ni wɔhaa yɛ asafoŋ kpeei ashishi lɛ nɔ lɛ hu ji hegbɛ kroko ni wɔná. (Lala 35:18) Be fɛɛ be ni wɔnáa hegbɛ akɛ wɔha sane hetoo lɛ, wɔkɛ miishɛɛ feɔ nakai. Nakai nɔŋŋ hu kɛ́ wɔbuɔ nɔ fɛɛ nɔ ni akɛhaa wɔ akɛ wɔtsu yɛ asafo lɛ mli lɛ akɛ eji hegbɛ ní wɔná lɛ, wɔbaatsu lɛ jogbaŋŋ bɔ ni wɔɔnyɛ. Ani wɔtsuɔ hegbɛ ni wɔnáa akɛ wɔha Maŋtsɛyeli Asa lɛ nɔ atse ní wɔkula lɛ jogbaŋŋ lɛ he nii daa?
3 Eyɛ mli akɛ mɛi akpekpei abɔ ayiŋ feɔ amɛ kɔshikɔshi kɛji Nyɔŋmɔ boɔ amɛsɔlemɔi atoi moŋ, shi wɔná hegbɛ akɛ Mɔ ni nɔ kwɔ fe fɛɛ yɛ je lɛŋ fɛɛ lɛ aaabo wɔsɔlemɔi atoi. (Abɛi 15:29) Yehowa diɛŋtsɛ boɔ etsuji lɛ asɔlemɔi atoi. (1 Pet. 3:12) Etsɔɔɔ shii abɔ ni esa akɛ wɔsɔle wɔha lɛ. Mɛɛ nikeenii ni he hiaa waa po wɔná nɛkɛ akɛ wɔɔsɔle “daa”!—Efe. 6:18.
4 “Nyɔŋmɔ Hefatalɔi Nitsulɔi”: Hegbɛi ni fe fɛɛ ni wɔná lɛ ateŋ ekome ji Nyɔŋmɔ Maŋtsɛyeli lɛ he sanekpakpa lɛ ni wɔjajeɔ akɛ “Nyɔŋmɔ hefatalɔi nitsulɔi” lɛ. (1 Kor. 3:9) Eji nitsumɔ ni haa mɔ tsui nyɔɔ emli ní haa mɔ náa miishɛɛ. (Yoh. 4:34) Yehowa baanyɛ etsu nitsumɔ nɛɛ ní adesai ayelikɛbuamɔ fataaa he, shi akɛni esumɔɔ wɔ hewɔ lɛ, ekɛ nitsumɔ nɛɛ ewo wɔdɛŋ. (Luka 19:39, 40) Ni kɛlɛ, ekɛ hegbɛ nɛɛ haaa mɔ fɛɛ mɔ kɛkɛ. Esa akɛ mɛi ni kɛ amɛhe woɔ shiɛmɔ nitsumɔ lɛ mli lɛ ashɛ ŋmalɛ naa taomɔ nii komɛi ahe ni amɛhi shi yɛ naa. (Yes. 52:11) Ani wɔkɛ wɔhe woɔ shiɛmɔ nitsumɔ lɛ mli daa otsi ni wɔkɛtsɔɔ akɛ wɔhiɛ sɔɔ hegbɛ nɛɛ?
5 Hegbɛi ni wɔnáa kɛjɛɔ Yehowa dɛŋ lɛ haa wɔtsui nyɔɔ wɔ mli yɛ shihilɛ mli. (Abɛi 10:22) Ekaba kɔkɔɔkɔ akɛ wɔɔbu hegbɛi nɛɛ akɛ amɛhe ehiaaa! Kɛ́ wɔtsɔɔ diɛŋtsɛ akɛ wɔhiɛ sɔɔ sɔɔmɔ hegbɛi ni wɔnáa lɛ, wɔsaa wɔŋwɛi Tsɛ ni ji “duromɔ nii kpakpai fɛɛ kɛ nikeenii ni hi kɛwula shi fɛɛ lɛ” a-Halɔ lɛ hiɛ.—Yak. 1:17.