Ye Obua Ohiafoi lɛ ní Amɛná Hiɛnɔkamɔ
1 Yesu ná ohiafoi ahe miishɛɛ waa. Bei komɛi lɛ etsɔɔ naakpɛɛ gbɛ nɔ ekɛ heloonaa nibii yeɔ ebuaa mɛi, ni etsáa helatsɛmɛi, shi oti ni ma ehiɛ ji ní ejaje “sanekpakpa” lɛ etsɔɔ ohiafoi lɛ. (Mat. 11:5) Ŋmɛnɛ, Kristofoi ashiɛmɔ nitsumɔ lɛ miiya nɔ eeye eebua ohiafoi kɛ mɛi krokomɛi fɛɛ.—Mat. 24:14; 28:19, 20.
2 Hiɛnɔkamɔ Diɛŋtsɛ ni Yɔɔ: Bei pii lɛ, Kristendom osɔfoi lɛ woɔ ohiafoi lɛ ashi akɛ kɛ́ amɛjɛ amɛsuɔmɔ mli amɛkɛ shika fĩ sɔlemɔ lɛ sɛɛ lɛ, amɛbaaná nii waa. Shi Biblia lɛ tsɔɔ akɛ Nyɔŋmɔ Maŋtsɛyeli lɛ pɛ ji nɔ ni kɛ ohia baaba naagbee, ni no pɛ baajie adesai anaagbai fɛɛ kɛya. (Lala 9:19; 145:16; Yes. 65:21-23) Kɛ́ wɔtsɔɔ ohiafoi lɛ nɔ ni Biblia lɛ tsɔɔ diɛŋtsɛ lɛ, wɔhaa amɛnáa hiɛnɔkamɔ, ni eyeɔ buaa amɛ ni amɛleɔ Nyɔŋmɔ ni amɛjaa lɛ.—Mat. 5:3.
3 Farisifoi ni hi shi yɛ Yesu beaŋ lɛ ebuuu ohiafoi, ni amɛkɛ heguɔgbee tsɛɔ amɛ akɛ ‘am-ha·’aʹrets, loo “shikpɔŋ lɛ nɔ bii.” Shi kɛlɛ, Yesu bu “amɛlá” loo amɛwala akɛ ‘ejara wa.’ (Lala 72:13, 14) Wɔbaanyɛ ‘wɔna’ ohiafoi lɛ ‘mɔbɔ’ taakɛ Yesu fee lɛ, kɛtsɔ mlihilɛ kɛ mɔbɔnalɛ kpo ni wɔɔjie wɔtsɔɔ amɛ lɛ nɔ. (Abɛi 14:31) Ekaba kɔkɔɔkɔ akɛ wɔɔgbe mɛi ni yɔɔ ohiafoi ashihilɛ mli lɛ ahe guɔ, loo wɔɔshashao shi akɛ wɔbaashiɛ wɔha amɛ. Mɛi babaoo ni boɔ Maŋtsɛyeli shɛɛ sane lɛ toi lɛ ji ohiafoi.
4 Ye Obua Amɛ Bianɛ: Kɛ́ wɔtsɔɔ ohiafoi ni yɔɔ wɔshikpɔŋkuku lɛ mli lɛ Biblia mli shishitoo mlai lɛ, eyeɔ kɛbuaa amɛ ni amɛshihilɛ hiɔ bianɛ fe tsutsu lɛ. Ákɛ nɔkwɛmɔnɔ lɛ, Biblia lɛ guɔ dãatɔɔ, asɔshwɛmɔ, anihaofeemɔ, tawa kɛ nitsumɔ, kɛ nifeemɔi krokomɛi ni haa mɔ yeɔ ohia lɛ. (Abɛi 6:10, 11; 23:21; 2 Kor. 7:1; Efe. 5:5) Ŋmalɛi lɛ woɔ wɔ hewalɛ ni wɔye anɔkwa ní wɔjɛ ‘wɔmusuŋ wɔtsu’ nii, ejaakɛ enɛɛmɛi ji sui ni akpaa gbɛ yɛ nitsulɔi adɛŋ. (Kol. 3:22, 23; Heb. 13:18) Anɔkwale sane ji akɛ, yɛ niiamlitaomɔ ko ni afee lɛ mli lɛ, nitsumɔtsɛmɛi babaoo tsɔɔ akɛ anɔkwayeli kɛ ekãa ni akɛtsuɔ nii ji sui titri ni amɛkwɛɔ yɛ mɛi ní miitao nitsumɔ lɛ ahe.
5 Yehowa nuɔ ohiafoi lɛ apiŋmɔi ahe. Etsɛŋ ni Yesu Kristo baakpɔ̃ “ohiafoi ni bolɔɔ lɛ.” (Lala 72:12) Kɛyashi nakai be lɛ aaaba lɛ, eji hegbɛ ni wɔná akɛ wɔkɛ Biblia mli shɛɛ sane ni haa mɔ hiɛnɔkamɔ lɛ aaashɛje mɛi krokomɛi ní ohiafoi fata he lɛ amii.