Sanebimɔ He
◼ Mɛɛ atade nɛkɛ esa akɛ wɔwo kɛ́ wɔyaasara hei ni atsuɔ Yehowa sɔɔmɔ he nii yɛ lɛ?
Maŋtsɛyeli Asai, Kpee Asai, Betel shĩai, kɛ asafo lɛ nitsumɔhe niji ni yɔɔ je lɛŋ fɛɛ lɛ bafeɔ hei ni sa jogbaŋŋ ni ajɔɔ nɔ kɛha Yehowa sɔɔmɔ. Amɛbɛ haŋtsii, jɛmɛ tsé, ni akwɛɔ nɔ jogbaŋŋ, no hewɔ lɛ amɛyɛ fɛo waa. Kɛ́ akɛto nibii ni yɔɔ Satan gbɛjianɔtoo lɛ mli lɛ ahe lɛ, srɔto agbo yɛ mli. Kɛ́ wɔmiiya wɔyasara hei ni atsuɔ Yehowa sɔɔmɔ he nii yɛ lɛ, esa akɛ ana wɔ akɛ mɛi ni sumɔɔ Yehowa, ni amɛfeɔ esuɔmɔnaa nii.
Ákɛ Kristofoi lɛ, “wɔkɛ wɔhe tsɔɔ akɛ Nyɔŋmɔ sɔɔlɔi” yɛ nɔ fɛɛ nɔ mli, ni nɔ ni fata enɛ he ji wɔtadewoo kɛ wɔhesaamɔ ni sa jogbaŋŋ lɛ. (2 Kor. 6:3, 4) Agbɛnɛ hu aakpa gbɛ akɛ wɔbaaba wɔjeŋ jogbaŋŋ. Be fɛɛ be lɛ, esa akɛ wɔtadewoo kɛ wɔhesaamɔ atsɔɔ akɛ wɔji Yehowa Nyɔŋmɔ tsuji ni bulɛ kɛ woo yɔɔ amɛhe. Enɛ he miihia jogbaŋŋ, titri lɛ kɛ́ wɔmiiya wɔyasara asafo lɛ nitsumɔhe yitso ni yɔɔ New York lɛ, kɛ agbɛnɛ asafo lɛ nitsumɔhe niji ni yɔɔ je lɛŋ fɛɛ lɛ.
Beni awieɔ bɔ ni ehe hiaa ni wɔtadewoo kɛ wɔhesaamɔ afee nɔ ni sa jogbaŋŋ yɛ Ato Wɔhe Gbɛjianɔ Koni Wɔfee Yehowa Suɔmɔnaa Nii wolo lɛ mli lɛ he lɛ, atsɔɔ bɔ ni ehe hiaa ni wɔhe atse, wɔwo atade ni yɔɔ hiŋmɛi nɔ, ni wɔsaa wɔhe jogbaŋŋ kɛ́ wɔmiitsu shiɛmɔ nitsumɔ lɛ, kɛ agbɛnɛ kɛ́ wɔmiiya Kristofoi akpeei. Kɛkɛ ni aŋma yɛ baafa 138, kuku 3 lɛ akɛ: “Kaimɔ akɛ, gbɛi Betel lɛ shishi ji ‘Nyɔŋmɔ We.’ No hewɔ lɛ, esa akɛ wɔ atadewoo, hesaamɔ, kɛ jeŋba atamɔ bɔ ni akpaa gbɛ kɛjɛɔ wɔdɛŋ beni wɔyaa kpeei kɛha jamɔ yɛ Maŋtsɛyeli Asa lɛ nɔ lɛ.” Esa akɛ Maŋtsɛyeli shiɛlɔi ni yasaraa Betel shĩai ni yɔɔ maji anɔ ni amɛyɔɔ lɛ, kɛ mɛi ni jɛɔ shɔŋŋ amɛbasaraa Betel lɛ akwɛ ni amɛkɛ nɛkɛ gbɛtsɔɔmɔi nɛɛ atsu nii. Kɛ́ mɔ ko ní miiya eyasara Betel lɛ kɛ nakai gbɛtsɔɔmɔ lɛ tsu nii lɛ, etsɔɔ akɛ eejie hiɛsɔɔ kɛ bulɛ kpo.—Lala 29:2.
Esa akɛ atadei ni wɔwoɔ lɛ aha ana wɔ akɛ mɛi ni ‘tsɛɔ amɛhe akɛ Nyɔŋmɔ jálɔi.’ (1 Tim. 2:10) Kɛ́ wɔwo atadei ni sa ni wɔsaa wɔhe jogbaŋŋ lɛ, ebaaha mɛi krokomɛi aná bulɛ amɛha Yehowa anɔkwa jamɔ lɛ. Shi nɔ ni akpa shi ana ji akɛ, nyɛmimɛi hii kɛ yei fioo komɛi ni yasaraa nitsumɔhe nine lɛ woɔ atadei ni esaaa, loo atadei ni haa anaa gbɔmɔtso lɛ hei komɛi ni esaaa akɛ anaa. Esaaa akɛ Kristofoi woɔ atadei ni tamɔ nakai yɛ be ko kwraa mli. No hewɔ lɛ, taakɛ eji yɛ wɔ-Kristofoi ashihilɛi fɛɛ mli lɛ, wɔmiisumɔ ni wɔhi shi yɛ shishitoo mlai ni nɔ kwɔlɔ ni haa esoroɔ Nyɔŋmɔ webii lɛ yɛ je lɛ he lɛ anaa, ni wɔfee nɔ fɛɛ nɔ kɛwo Nyɔŋmɔ hiɛ nyam.—Rom. 12:2; 1 Kor. 10:31.
No hewɔ lɛ, kɛ́ ooya oyasara nitsumɔhe nine lɛ yitso ni yɔɔ New York State, aloo nitsumɔhe nine kroko lɛ, kɛji oje gbɛ oto he gbɛjianɔ jio, otee shisharamɔ ni otsɔ jɛmɛ jio lɛ, bi ohe akɛ: ‘Ani mitade kɛ mihesaamɔ lɛ sa, ehe tse, ni etsɔɔ akɛ miyɛ bulɛ kɛha heni miyasara lɛ lo? Ani ebaaha awie Nyɔŋmɔ ni mijáa lɛ lɛ he ekpakpa? Ani kɛ́ mɛi krokomɛi na bɔ ni misaa mihe miha lɛ, ebaagbala amɛjwɛŋmɔ loo ebaagba amɛnaa?’ Eba akɛ ‘wɔbaawula Nyɔŋmɔ ni ji wɔ-Yiwalaherelɔ lɛ tsɔɔmɔ lɛ yɛ nibii fɛɛ mli’ kɛtsɔ wɔhesaamɔ kɛ wɔtadewoo nɔ!—Tito 2:10.