“Nyɛwoa Mipã lɛ Nyɛfɔ̃a Nyɛnɔ”
1 Wɔná hejɔɔmɔ diɛŋtsɛ yɛ jeŋ ni nɔnyɛɛ kɛ naagbai eyi mli obɔ nɛɛ mli, kɛtsɔ Yesu ninefɔ̃ɔ akɛ wɔbaná hejɔɔmɔ wɔha wɔsusumai yɛ epã lɛ shishi lɛ nɔ ni wɔkpɛlɛ lɛ hewɔ. (Mat. 11:29, 30) Ákɛ wɔɔtsu kaselɔfeemɔ nitsumɔ lɛ biɔ ni wɔkɛ wɔhe awo nitsumɔ ni wa, shi ehaa mɔ he jɔɔ lɛ hu lɛ mli. Nakai feemɔ biɔ ni wɔshiɛ Maŋtsɛyeli lɛ he sanekpakpa lɛ, ni wɔye wɔbua mɛi krokomɛi ní amɛ kɛ wɔ fɛɛ aná hejɔɔmɔ yɛ Yesu apã ni teremɔ waaa lɛ shishi.—Mat. 24:14; 28:19, 20.
2 Hejɔɔmɔ ní Anáa yɛ Shiɛmɔ Nitsumɔ lɛ Mli: Yesu biii ekaselɔi lɛ ni amɛkɛ ejatsu lɛ afata amɛnɔ̃ ní amɛtere momo lɛ he. Ebi amɛ ní amɛkɛ amɛjatsu ni tsii lɛ abatsake enɔ̃ ni etsiii lɛ. Wɔfeee yeyeeye ni wɔnijiaŋ hu ejeee wui dɔŋŋ yɛ nibii agbɛjianɔtoo ni haa etɔɔ mɔ nɛɛ mli; asaŋ wɔgboŋ nifalɛ ni bɛ shweshweeshwe lɛ he deŋme hu dɔŋŋ. (Luka 21:34; 1 Tim. 6:17) Eyɛ mli akɛ wɔbɛ dekã, ni esa akɛ wɔtsu nii koni wɔná nibii ni he hiaa wɔ daa gbi lɛ moŋ, shi wɔhaa Nyɔŋmɔjamɔ feɔ oti yɛ wɔshihilɛ mli. (Mat. 6:33) Kɛ́ wɔhiɛ jwɛŋmɔ ni ja yɛ nɔ ni he hiaa titri lɛ he lɛ, ehaŋ wɔna shiɛmɔ nitsumɔ lɛ akɛ jatsu, shi moŋ wɔbaana akɛ eji nɔ ni haa mɔ he jɔɔ lɛ be fɛɛ be.—Fil. 1:10.
3 Bei pii lɛ, wɔfɔɔ nibii ní wɔyɔɔ he miishɛɛ waa lɛ ahe wiemɔ. (Luka 6:45) Kristofoi fɛɛ nyãa Yehowa kɛ Maŋtsɛyeli jɔɔmɔi ni ewo shi yɛ he lɛ he. No hewɔ lɛ, kɛ́ wɔjie wɔjwɛŋmɔ yɛ wɔnaagbai anɔ, ni wɔshiɛ ‘nibii kpakpai ahe sanekpakpa’ lɛ, ehaa wɔhe jɔɔ wɔ waa diɛŋtsɛ! (Rom. 10:15) Ekã shi faŋŋ akɛ, kɛ́ wɔfɔɔ nɔ ko feemɔ lɛ, ehaa wɔhe saa kɛfeemɔ, ni no haa wɔnáa miishɛɛ babaoo. No hewɔ lɛ, kɛ́ wɔnyɛ́ wɔkɛ be babaoo tsu shiɛmɔ nitsumɔ lɛ, ebaaha wɔtsuii anyɔ wɔmli babaoo. Ni kɛ́ mɛi bo wɔshiɛmɔ lɛ toi lɛ, ewoɔ wɔ hewalɛ waa diɛŋtsɛ! (Bɔf. 15:3) Kɛji abooo wɔ toi loo ate shi awo wɔ po, ni wɔha ehi wɔjwɛŋmɔ mli ákɛ Yehowa hiɛ sɔɔ wɔmɔdɛŋbɔɔ lɛ, ni ákɛ ejɔɔmɔi lɛ baanyɛ aha wɔsɔɔmɔ nitsumɔ lɛ awo yibii kpakpai lɛ, shiɛmɔ nitsumɔ lɛ baaha wɔtsui anyɔ wɔmli yɛ mumɔŋ.—Bɔf. 5:41; 1 Kor. 3:9.
4 Kɛ́ wɔhere Yesu ninefɔɔ lɛ nɔ lɛ, wɔnáa hegbɛ akɛ wɔkɛ lɛ aaafee ekome kɛsɔmɔ akɛ Yehowa Odasefoi. (Yes. 43:10; Kpoj. 1:5) Nɔ ko kwraa bɛ ni haa mɔ he jɔɔ lɛ fe enɛ!