Kɛ́ Shiatsɛ lɛ Wieɔ Wiemɔ Kroko
1. Mɛni hewɔ ehe ebahia waa ni afee ekome kɛtsu nii yɛ shikpɔŋkuku lɛ mli lɛ?
1 Bei nɛɛ amli lɛ, Maŋtsɛyeli shiɛlɔi kɛ mɛi ni yɔɔ anɔkwale lɛ he miishɛɛ shi amɛwieɔ wiemɔ kroko lɛ kpeɔ. Akɛni eeenyɛ eba akɛ, yɛ shikpɔŋkuku ko mli lɛ awieɔ wiemɔi srɔtoi hewɔ lɛ, asafoi fe ekome baanyɛ ashiɛ yɛ shikpɔŋkuku nɛɛ mli. Te asafoi lɛ baafee tɛŋŋ amɛfee ekome koni amɛha shiɛmɔ nitsumɔ lɛ afee nɔ ni ato he gbɛjianɔ jogbaŋŋ lɛ?—1 Kor. 14:33.
2. (a) Ekɔɔɔ he eko shikpɔŋkuku mli ni wɔtsuɔ nii yɛ lɛ, mɛni esa akɛ wɔshwe akɛ wɔbaafee? (b) Kɛ́ wɔmiitsu shĩa kɛ shĩa nitsumɔ lɛ, mɛɛ gbɛ nɔ wɔɔtsɔ wɔkɛ asafo loo kuu ko ní wieɔ wiemɔ kroko ní wɔkɛ amɛ fɛɛ miitsu nii yɛ he kome lɛ afee ekome kɛtsu nii lɛ?
2 Ekomefeemɔ He Miihia: Kɛ́ shiɛlɔ ko miiye odase yɛ gbɛjegbɛi ahe, loo eeye trukaa odase lɛ, esa akɛ enyɛ ebɛŋkɛ mɔ fɛɛ mɔ, ní mɛi ni wieɔ wiemɔ kroko lɛ hu fata he lɛ, ní ekɛ amɛ agba sane, ní ekɛ wolo ni yɔɔ wiemɔ ni mɛi lɛ baasumɔ ni amɛkane lɛ mli lɛ aha amɛ. Nakai nɔŋŋ esa akɛ afee kɛ́ aaya shĩa kɛ shĩa. Kɛ́ shiɛlɔ lɛ wieɔ shiatsɛ lɛ wiemɔ lɛ jogbaŋŋ lɛ, esa akɛ eye lɛ odase, eyɛ mli akɛ esoro wiemɔ ni awieɔ yɛ shiɛlɔ lɛ asafo lɛ mli lɛ. Kɛ́ asafoi srɔtoi shiɛɔ yɛ akutso kome too lɛ nɔŋŋ mli lɛ, ehe miihia ni wɔŋmala shĩa kɛ shĩa nitsumɔ lɛ he saji wɔshwie shi, bɔni afee ni wɔkaya mɛi ni wɔtee amɛŋɔɔ momo lɛ nɔŋŋ aŋɔɔ shii abɔ. Esa akɛ shiɛmɔ nitsumɔ lɛ nɔkwɛlɔi lɛ afee ekome kɛto gbɛjianɔ bɔni afee ni akatsu shikpɔŋkukuji lɛ ekomɛi amli nii fe nine.—Abɛi 11:14.
3. Kɛ́ wɔkɛ mɔ ko ni nuuu wiemɔ ni awieɔ yɛ wɔsafo lɛ mli lɛ jogbaŋŋ lɛ je Biblia mli nikasemɔ shishi lɛ, mɛni esa akɛ wɔshwe akɛ wɔbaafee, ni mɛni hewɔ?
3 Suɔmɔ ní Osato Bɛ Mli He Miihia: Bei komɛi lɛ, shiɛlɔ ko kɛ mɔ ko ni nuuu wiemɔ ni awieɔ yɛ esafo lɛ mli lɛ jogbaŋŋ lɛ baaje nikasemɔ shishi. Kɛ́ nikasemɔ lɛ mɔ̃ shi, ni nikaselɔ lɛ tee hiɛ aahu akɛ eesumɔ ni ebɔi kpeei yaa lɛ, mɛni esa akɛ afee? Mɛi komɛi shashaoɔ shi akɛ amɛbaaha shiɛlɔ ko ni yɔɔ asafo ni kɛ wiemɔ ni nikaselɔ lɛ nuɔ lɛ tsuɔ nii lɛ mli lɛ atsa nikasemɔ lɛ nɔ. Shi esa akɛ suɔmɔ ni wɔyɔɔ kɛha nikaselɔ lɛ atsirɛ wɔ ni wɔfee nɔ ni he baaba sɛɛnamɔ aha lɛ. Esa akɛ aha shiɛlɔ ko ni baanyɛ atsa nikasemɔ lɛ nɔ jogbaŋŋ ni yɔɔ asafo ni kɛ wiemɔ ni nikaselɔ lɛ nuɔ lɛ tsuɔ nii lɛ mli lɛ atsa nikasemɔ lɛ nɔ. Enɛ baaha nikaselɔ lɛ aná asafoŋ kpeei srɔtoi lɛ ahe sɛɛ kɛmɔ shi.
4. Kɛ́ wɔkɛ shiɛlɔi ni jɛ kuu loo asafo ni wieɔ wiemɔ kroko mli lɛ yakpe yɛ shikpɔŋkuku kome too lɛ mli lɛ, mɛni esa akɛ wɔfee?
4 Nitsumɔ Kome Too lɛ Nɔŋŋ: Kɛ́ ebalɛ akɛ shiɛlɔi ni jɛ asafoi srɔtoi amli lɛ miitsu shikpɔŋkuku kome too lɛ nɔŋŋ mli nii yɛ gbi kome too lɛ nɔ lɛ, te esa akɛ atsu he nii aha tɛŋŋ? Ekã shi faŋŋ akɛ Kristofoi asuɔmɔ ni wɔyɔɔ lɛ haŋ wiemɔ ko afee gbɛtsĩi nii aha wɔ, ni nɔ klɛŋklɛŋ ni wɔbaasumɔ ni wɔfee ji ní wɔtsu mɛi ni yɔɔ shikpɔŋkuku lɛ mli lɛ amumɔŋ hiamɔnii ahe nii. (Yoh. 13:34, 35) No hewɔ lɛ, mɛi ni nyiɛɔ nitsumɔ lɛ hiɛ lɛ baajɛ nilee kɛ suɔmɔ mli amɛkwɛ kɛji esa akɛ amɛha kuu kome aya shikpɔŋkuku kroko mli amɛyashiɛ yɛ jɛmɛ be fioo lo.—Yak. 3:17, 18.
5. Mɛɛ gbalɛ náa emlibaa ŋmɛnɛ?
5 Biblia lɛ gba efɔ̃ shi akɛ mɛi ni jɛ majianɔ wiemɔi srɔtoi amli baabo sanekpakpa lɛ toi. (Kpoj. 14:6, 7) Kɛ́ wɔ fɛɛ wɔfee ekome kɛtsu enɛ he nii jogbaŋŋ lɛ, ebaŋ lɛ akɛ shiɛlɔi ni jɛ asafoi srɔtoi amli ni wieɔ wiemɔ kroko lɛ kɛ amɛhe baakpe yɛ shĩa kome too lɛ nɔŋŋ mli, ni mɛi heei babaoo, ní mɛi ni wieɔ wiemɔ kroko lɛ fata he lɛ anine baashɛ sanekpakpa lɛ nɔ.—Efe. 4:16.