Yelikɛbuamɔ Kɛha Mɛi ni Wieɔ Maŋsɛɛ Wiemɔ Lɛ
1. Beni wɔtsuɔ shiɛmɔ nitsumɔ lɛ yɛ wɔshikpɔŋkuku lɛ mli lɛ, mɛɛ hegbɛ wɔnáa?
1 Yesu Kristo gba akɛ abaashiɛ sanekpakpa lɛ yɛ je lɛŋ fɛɛ, “ní akɛye jeŋmaji lɛ fɛɛ odase.” Mɛi fɛɛ ni tsuɔ shiɛmɔ kɛ nitsɔɔmɔ nitsumɔ lɛ le bɔ ni nakai wiemɔi lɛ ahe hiaa ha. (Mat. 24:14; 28:19, 20) Beni wɔshiɛɔ ni wɔfeɔ kaselɔi lɛ, ekolɛ wɔkɛ mɛi ni jɛ maji krokomɛi anɔ ni wieɔ wiemɔ kroko (tamɔ Arabic, French, kɛ China wiemɔ) lɛ baakpe. Esa akɛ mɛnɛɛmɛi hu anu Maŋtsɛyeli shɛɛ sane lɛ, ní amɛkpɛlɛ anɔkwale lɛ nɔ dani Yehowa gbi ni yɔɔ gbeyei lɛ ashɛ. (Mal. 3:18) Mɛɛ gbɛ nɔ wɔbaanyɛ wɔye wɔbua mɛi ni wieɔ maŋsɛɛ wiemɔ ni yɔɔ wɔshikpɔŋkuku lɛ mli lɛ?
2. Mɛɛ gbɛ nɔ wɔkaseɔ Yehowa kɛ́ wɔkɛ mɛi ni wieɔ wiemɔ kroko lɛ miiwie?
2 Naa Mɛi ni Wieɔ Wiemɔ Kroko lɛ Tamɔ Bɔ ni Yehowa Naa Amɛ Lɛ: Kɛ́ wɔbaajie suɔmɔ ni hiɛaŋkwɛmɔ bɛ mli ni Yehowa yɔɔ lɛ eko kpo wɔha mɛi fɛɛ ni yɔɔ wɔshikpɔŋkuku lɛ mli lɛ, esa akɛ wɔná shwelɛ ni mli wa akɛ wɔbaaye wɔbua mɛi koni amɛbale anɔkwale ni kɔɔ Yehowa, ni ji anɔkwa Nyɔŋmɔ lɛ he, ekɔɔɔ he eko wiemɔ ni amɛwieɔ. (Lala 83:19; Bɔf. 10:34, 35) Eyɛ mli akɛ wɔgbalaa wɔjwɛŋmɔ kɛyaa mɛi ni wieɔ wiemɔ ni wɔsafo lɛ kɛtsuɔ nii lɛ anɔ titri moŋ, shi esa akɛ wɔsusu mɛi ni wieɔ wiemɔ kroko lɛ ahiamɔ nii ahe, ni wɔtao gbɛ̀i anɔ ni wɔɔtsɔ wɔkɛ Nyɔŋmɔ Maŋtsɛyeli shɛɛ sane lɛ aha amɛ. Kɛ́ wɔku wɔhiɛ wɔshwie mɛi ni wieɔ wiemɔ kroko lɛ anɔ lɛ, etsɔɔ akɛ wɔfiii Yehowa yiŋtoo akɛ aye mɛi ni jɛ jeŋmaji fɛɛ mli lɛ odase lɛ sɛɛ. Belɛ, te wɔɔfee tɛŋŋ wɔye wɔbua mɛi ni nuuu wɔwiemɔ lɛ?
3. Mɛɛ wolo ni he yɔɔ sɛɛnamɔ ato he gbɛjianɔ aha wɔ, ni mɛɛ gbɛ nɔ wɔbaanyɛ wɔtsɔ wɔsaa wɔhe koni wɔkɛtsu nii?
3 Okɛ Good News for People of All Nations Wolo lɛ Atsu Nii: Áto wolo nɛɛ he gbɛjianɔ ni wɔkɛtsu nii kɛ́ wɔkɛ mɛi ni wieɔ wiemɔ kroko ni wɔnuuu lɛ kpe. Ha wolo nɛɛ ahi ohe be fɛɛ be, kasemɔ fãi srɔtoi ni yɔɔ mli lɛ, ni ofee klalo akɛ okɛbaatsu nii. Bɔni afee ni ekɛ nitsumɔ afee mlɛo kɛha bo lɛ, kadimɔ wiemɔi srɔtoi ni okɛkpeɔ yɛ oshikpɔŋkuku lɛ mli lɛ yɛ mli. Kɛ́ ayɛ woji yɛ wiemɔi nɛɛ amli lɛ, ebaahi akɛ oto gbɛjianɔ ni oyaha mɔ lɛ eko beni okɛ wolo bibioo lɛ etsu nii kɛye lɛ odase lɛ sɛɛ.
4. Mɛɛ gbɛ nɔ wɔbaanyɛ wɔkɛ Nations wolo bibioo lɛ atsu nii yɛ shiɛmɔ nitsumɔ lɛ mli?
4 Kɛ́ okɛ mɔ ko kpe yɛ shiɛmɔ nitsumɔ lɛ mli ni wieɔ wiemɔ kroko shi oleee wiemɔ pɔtɛɛ ni ewieɔ lɛ, okɛ wolo lɛ sɛɛ atsɔɔ lɛ klɛŋklɛŋ. Okɛ owao atsɔɔ bo diɛŋtsɛ ohe ní otsɛ maŋ nɔ ni ojɛ, ni ofee okadi ko ni tsɔɔ akɛ oosumɔ ni ole maŋ nɔ ni shiatsɛ lɛ hu jɛ kɛ wiemɔ ni ewieɔ. Kɛ́ ona wiemɔ ni ewieɔ lɛ, kwɛmɔ heni aŋma emli saji lɛ yɛ lɛ, taomɔ baafa ni wiemɔ ni ewieɔ lɛ yɔɔ, gbalamɔ shiatsɛ lɛ jwɛŋmɔ kɛya wiemɔ ni akɛ niŋmaa ni mli ti eŋma ni yɔɔ baafa lɛ yiteŋgbɛ lɛ nɔ, ni ofee nɔ ko ni tsɔɔ akɛ obaasumɔ ni shiatsɛ lɛ akane sane ni yɔɔ jɛmɛ lɛ. Kɛ́ ekane egbe naa lɛ, ha lɛ dɛhiɛmɔ wolo ko ni yɔɔ wiemɔ ni ewieɔ lɛ mli loo okɛ sane ni yɔɔ heni akɛ lamlu su ediki ní tsɔɔ akɛ obaasumɔ ni oku osɛɛ okɛ wolo ko ni yɔɔ shiatsɛ lɛ diɛŋtsɛ wiemɔ mli lɛ abaha lɛ lɛ atsɔɔ lɛ. No sɛɛ lɛ, okɛ onine atsɔɔ he ni aŋma “migbɛi” ni akɛ niŋmaa ni mli ti eŋma lɛ, ni otsɛ ogbɛi. Okɛ onine atsɔɔ he ni aŋma “ogbɛi” ni akɛ niŋmaa ni mli ti eŋma lɛ, ni obo shiatsɛ lɛ toi. Bɔɔ mɔdɛŋ oto gbɛjianɔ ni oku osɛɛ oyasara lɛ.
5. Bɔni afee ni aye abua mɛi ni wieɔ wiemɔ kroko ni yɔɔ sane lɛ he miishɛɛ lɛ, mɛɛ gbɛjianɔ esa akɛ ato kɛha sɛɛkuu kɛsaramɔ?
5 Too Gbɛjianɔ ni Oku Osɛɛ: Esa akɛ wɔbɔ mɔdɛŋ wɔku wɔsɛɛ wɔyasara mɛi ni náa Maŋtsɛyeli shɛɛ sane lɛ he miishɛɛ lɛ, ekɔɔɔ he eko wiemɔ ni amɛwieɔ. Kɛ́ wɔyɔse akɛ mɔ ko yɛ Nyɔŋmɔ kɛ e-Wiemɔ, ni ji Biblia lɛ he miishɛɛ lɛ, esa akɛ wɔŋmala Please Follow Up (S-43) wolo lɛ eko nɔ nii oya nɔŋŋ, ní wɔkɛha asafo lɛ woloŋmalɔ lɛ koni ekɛmaje nitsumɔhe nine lɛ, bɔni afee ni aha mɔ ko ni wieɔ mɔ ni yɔɔ wiemɔ lɛ he miishɛɛ nɛɛ wiemɔ lɛ ayasara lɛ. No sɛɛ lɛ, nitsumɔhe nine lɛ kɛ wolo lɛ baamaje kuu ni wieɔ nakai wiemɔ lɛ. Kɛ́ nine shɛ wolo lɛ nɔ lɛ, abaaya mɔ lɛ ŋɔɔ amrɔ nɔŋŋ. Kɛ́ woloŋmalɔ lɛ nine shɛ wolo lɛ nɔ lɛ, ebaanyɛ efee fotokɔpe eha sɔɔmɔ nitsumɔ nɔkwɛlɔ lɛ bɔni afee ni enyɛ ele mɛi abɔ ni wieɔ wiemɔ pɔtɛ̃ɛ ko ni yɔɔ sane lɛ he miishɛɛ. Esa ákɛ akɛ wolo nɛɛ atsu nii kɛ́ mɔ lɛ jie miishɛɛ kpo lɛɛlɛŋ.
6. Kɛ́ wɔkɛ mɔ ko ni yɔɔ wiemɔ lɛ he miishɛɛ kpe, shi ewieɔ wiemɔ kroko lɛ, mɛni ebiɔ ni wɔfee?
6 Ekolɛ kɛjɛ beni akɛ S-43 wolo lɛ baaya nitsumɔhe nine lɛ kɛyashi be ni abaaha shiɛlɔ ko ni wieɔ mɔ ni yɔɔ sane lɛ he miishɛɛ lɛ wiemɔ lɛ aku sɛɛ ayasara lɛ ekoŋŋ lɛ, be baashwie mli. No hewɔ lɛ, bɔni afee ni atsa miishɛɛ ni mɔ lɛ jie lɛ kpo lɛ nɔ lɛ, shiɛlɔ ni ŋmala S-43 wolo lɛ nɔ nii dani akɛmaje lɛ baanyɛ aya nɔ etsu miishɛɛ ni mɔ lɛ jie lɛ kpo lɛ he nii kɛyashi mɔ ko ni nuɔ mɔ lɛ wiemɔ baaya eŋɔɔ. Yɛ shihilɛi komɛi amli lɛ, abaanyɛ akɛ mɔ ni yɔɔ sane lɛ he miishɛɛ lɛ afee Biblia mli nikasemɔ. Shi yɛ nɛkɛ be nɛɛ mli, te shiɛlɔ lɛ baafee tɛŋŋ enine ashɛ woji anɔ yɛ mɔ ni yɔɔ sane lɛ he miishɛɛ lɛ wiemɔ mli lɛ?
7. Mɛɛ gbɛjianɔ ato koni wɔnine ashɛ woji ni yɔɔ mɛi ni wɔkɛkpeɔ lɛ awiemɔ mli lɛ nɔ?
7 Woji ni Yɔɔ Wiemɔi Krokomɛi Amli: Esaaa akɛ asafoi tiaa woji ni yɔɔ wiemɔi krokomɛi amli lɛ anaa amɛshwieɔ shi. Shi kɛ́ sɔɔmɔ nitsumɔ nɔkwɛlɔ lɛ yɔse akɛ mɛi komɛi ni wieɔ wiemɔ pɔtɛ̃ɛ ko lɛ miiná sane lɛ he miishɛɛ lɛ, ebaanyɛ eto gbɛjianɔ koni abua nakai wiemɔ lɛ mli woji fioo naa ashwie shi koni shiɛlɔi lɛ kɛtsu nii. Kɛ́ nyɛsafo lɛ bɛ woji yɛ nakai wiemɔ lɛ mli lɛ, nyɛbaanyɛ nyɛshɛ eko. Ekolɛ ebaahe be fioo dani woji ni yɔɔ wiemɔ pɔtɛ̃ɛ ko mli lɛ baashɛ shi. No hewɔ lɛ, ato gbɛjianɔ koni anyɛ aprinti woji srɔtoi lɛ kɛjɛ www.watchtower.org Web site lɛ. Akɛ woji srɔtoi babaoo ni yɔɔ wiemɔi srɔtoi ohai abɔ mli ewo jɛmɛ ní shiɛlɔ lɛ loo mɔ ni yɔɔ wiemɔ lɛ he miishɛɛ lɛ nine baanyɛ ashɛ nɔ. Ŋwanejee ko bɛ he akɛ enɛ he baaba sɛɛnamɔ kɛ́ aaye aabua mɛi ni wieɔ wiemɔ kroko ni ná sane lɛ he miishɛɛ lɛ.
8. Mɛɛ yelikɛbuamɔ asafo lɛ kɛhaa mɛi ni yɔɔ wiemɔ lɛ he miishɛɛ ni wieɔ wiemɔ kroko lɛ?
8 Gbɛfaŋnɔ ni Asafo lɛ Tsuɔ: Yɛ hei ni mɛi ni wieɔ maŋsɛɛ wiemɔ lɛ ayi fáa yɛ lɛ, ekolɛ asafo ko bɛŋkɛɛɛ he ni amɛyɔɔ lɛ ni feɔ kpeei yɛ nakai wiemɔ lɛ mli. No hewɔ lɛ esa akɛ nyɛfɔ̃ mɛi ni yɔɔ wiemɔ lɛ he miishɛɛ ni wieɔ wiemɔ kroko lɛ nine ní amɛkɛnyɛ aba kpee. Miishɛɛ ni akɛbaahere amɛ, kɛ mɔ hedɔɔ kpo ni abaajie atsɔɔ amɛ lɛ baanyɛ awo amɛ hewalɛ koni amɛba kpee lɛ daa. Shishijee lɛ, ekolɛ wiemɔ lɛ kɛ bɔ ni afeɔ nibii ahaa lɛ baanyɛ afee naagba kɛha amɛ; shi kɛlɛ, husu bɛ anɔkwa Kristofoi asuɔmɔ ni Yehowa Odasefoi ni yɔɔ jeŋ fɛɛ lɛ jieɔ lɛ kpo lɛ he. (Zef. 3:9; Yoh. 13:35) Ani onyɛɔ owieɔ wiemɔ kroko jogbaŋŋ? Kɛ́ onyɛɔ owieɔ wiemɔ kroko jogbaŋŋ, ni obaasumɔ ni oye obua mɛi ni wieɔ nakai wiemɔ lɛ, ofainɛ ni owó osafoŋ woloŋmalɔ lɛ toi nɔ koni eha nitsumɔhe nine lɛ ale. Enɛ he baaba sɛɛnamɔ kɛ́ nitsumɔhe nine lɛ miitao shiɛlɔ ko ní eyaye ebua mɔ ko ní yɔɔ wiemɔ lɛ he miishɛɛ lɛ.
9. Mɛɛ be abaanyɛ aŋmɛ gbɛ koni shiɛlɔi akase wiemɔ pɔtɛɛ ko, ni te abaatsu enɛ he nii aha tɛŋŋ?
9 Wiemɔ Kasemɔ: Kɛ́ ooye oobua mɛi ni wieɔ wiemɔ kroko lɛ, ebaahi akɛ obaawo amɛ hewalɛ ni amɛkɛ asafo ni wieɔ amɛ diɛŋtsɛ amɛwiemɔ lɛ abɔi kpeei yaa, kɛ́ eko bɛŋkɛ amɛ ni amɛbaanyɛ amɛya. Shi kɛ́ enyɛŋ ebalɛ nakai lɛ, ekolɛ shiɛlɔi komɛi baasumɔ akɛ amɛkase wiemɔ kroko lɛ, ni no baaha amɛnyɛ amɛye amɛbua mɛi ni yɔɔ sane lɛ he miishɛɛ lɛ. Kɛ́ asafo ko bɛŋkɛɛɛ he ni amɛyɔɔ lɛ, nitsumɔhe nine lɛ baanyɛ akpɛ mli akɛ, yɛ maŋsɛɛbii ni yɔɔ maŋ lɛ mli, loo maŋbii ni wieɔ wiemɔ kroko lɛ ayifalɛ ko hewɔ lɛ, abaanyɛ ato wiemɔ kasemɔ he gbɛjianɔ. Kɛ́ ebalɛ nakai lɛ, nitsumɔhe nine lɛ baanyɛ eha asafoi krokomɛi ni bɛŋkɛ lɛ ale hiamɔ ni yɔɔ lɛ, koni amɛtswa wiemɔ kasemɔ lɛ he adafi. Esa akɛ mɛi ni baabi gbɛ kɛha wiemɔ lɛ kasemɔ lɛ afee mɛi ni baasumɔ ni amɛshi kɛya kuu loo asafo ni abaatse lɛ mli, koni amɛnyɛ amɛye amɛbua mɛi ni wieɔ nakai wiemɔ lɛ.
10. Mɛɛ be abaanyɛ atse kuu ni wieɔ maŋsɛɛ wiemɔ ko, ni te abaafee tɛŋŋ ale kɛji esa akɛ afee nakai?
10 Kuu Tsemɔ: Bɔni afee ni atse kuu ko yɛ wiemɔ pɔtɛ̃ɛ ko mli lɛ, nibii ejwɛ komɛi ahe miihia. (1) Esa akɛ aná mɛi ni fa bɔ ni sa ni wieɔ nakai wiemɔ lɛ, ní baanyá sane lɛ he. (2) Esa akɛ aná shiɛlɔi ayibɔ ko ni nuɔ wiemɔ lɛ loo amɛmiikase. (3) Esa akɛ aná asafoŋ onukpa loo asafoŋ sɔɔlɔ ko ni baakwɛ kpeei ni afeɔ yɛ otsi lɛ mli lɛ ateŋ ekome nɔ yɛ nakai wiemɔ lɛ mli, kɛhoo kwraa lɛ daa otsi. (4) Esa akɛ aná asafoŋ onukpai akuu ko ni baasumɔ akɛ amɛye amɛbua kuu lɛ. Kɛ́ abɔ mɔdɛŋ atsu taomɔnii lɛ ahe nii bɔ ni sa lɛ, no lɛ onukpai akuu lɛ baaŋma nitsumɔhe nine lɛ wolo yɛ bɔ ni kuu lɛ yɔɔ ha lɛ he, ní amɛbi ni akpɛlɛ amɛnɔ akɛ asafo ni yeɔ ebuaa maŋsɛɛ wiemɔ kuu ko. (Kwɛmɔ Gbɛjianɔ wolo lɛ, bf. 106-107.) Abaatsɛ asafoŋ onukpa loo asafoŋ sɔɔlɔ ni nyiɛ hiɛ lɛ akɛ “kuu nɔkwɛlɔ” loo “kuu sɔɔlɔ” ni baakwɛ kuu lɛ nɔ.
11. Mɛni hewɔ eji hegbɛ kpele ni wɔná akɛ wɔbaaye wɔbua mɛi ni wieɔ maŋsɛɛ wiemɔ ni yɔɔ wɔshikpɔŋkuku lɛ mli lɛ?
11 Yelikɛbuamɔ ni akɛaaha kuu ko ni wieɔ maŋsɛɛ wiemɔ ni yɔɔ wɔshikpɔŋkuku lɛ mli lɛ ji wɔshiɛmɔ nitsumɔ lɛ fã ko ni he hiaa waa ní Yesu Kristo, ni ji wɔ-Nɔkwɛmɔnɔ lɛ je shishi lɛ. Eyɛ mli akɛ sane nɛɛ kɔɔ yelikɛbuamɔ ni akɛbaaha mɛi ni wieɔ maŋsɛɛ wiemɔ lɛ he moŋ, shi shishitoo mla ni yɔɔ mli lɛ baanyɛ akɔ mɛi ni wɔkɛkpeɔ ni wieɔ wɔmaŋ nɛɛ mli wiemɔ kroko lɛ hu ahe. Eba akɛ wɔkɛ ekãa baatsu wɔgbɛfaŋnɔ, ní wɔkwɛ bɔ ni Yehowa yaa nɔ ehosoɔ jeŋmaji lɛ ní ebuaa nibii ni jara wa ha lɛ lɛ naa ehaa ehe lɛ. (Hag. 2:7) Kwɛ miishɛɛ ni eji akɛ wɔɔfĩ gbɛjianɔtoo nɛɛ sɛɛ kɛmɔ shi! Yehowa ajɔɔ ekome ni wɔfeɔ kɛyeɔ wɔbuaa mɛi ni wieɔ maŋsɛɛ wiemɔ ni yɔɔ wɔshikpɔŋkuku lɛ mli lɛ, ni esa akɛ wɔkai be fɛɛ be akɛ, ekɔɔɔ he eko wiemɔ he naagbai ni yɔɔ lɛ, Nyɔŋmɔ baanyɛ aha eshwere!—1 Kor. 3:6-9.