Gbi Krɛdɛɛ ko Kɛha Biblia Mli Nikasemɔ Shishijee
1 Kɛjɛ January kɛyaa lɛ, asafo fɛɛ asafo baato otsi naagbee ko daa nyɔɔŋ, ekolɛ klɛŋklɛŋ nɔ̃ lɛ, koni amɛkɛ mɛi aje Biblia mli nikasemɔ shishi. Gbi nɛɛ baanyɛ afee Hɔɔ loo Hɔgbaa ko, yɛ bɔ ni baahi aha nyɛsafo lɛ naa. Kɛ́ shiatsɛmɛi lɛ ekpɛlɛɛɛ ní akɛ amɛ aje Biblia mli nikasemɔ shishi yɛ nakai gbi lɛ nɔ lɛ, shiɛlɔi lɛ baanyɛ amɛkɛ Biblia lɛ Tsɔɔ wolo lɛ loo woji tɛtrɛbii heei ni eba lɛ aha. Esa akɛ asafoŋ onukpai kɛ asafoŋ sɔɔlɔi fɛɛ ato gbɛjianɔ ní amɛkɛ amɛhe awo nifeemɔ nɛɛ mli, koni amɛye amɛbua shiɛlɔi ní amɛje Biblia mli nikasemɔ shishi.
2 Asafoŋ Sɔɔmɔ Ajinafoi Akuu lɛ baakpɛ amɛyiŋ yɛ otsii anaagbee lɛ ateŋ nɔ ni amɛbaahala ní akɛ mɛi aje Biblia mli nikasemɔ shishi lɛ he. Esa akɛ yɛ be kɛ beaŋ lɛ akai shiɛlɔi koni amɛnyɛ amɛsaa amɛhe, ní amɛbɔ mɔdɛŋ waa koni amɛje Biblia mli nikasemɔi ashishi yɛ shĩa kɛ shĩa, kɛ agbɛnɛ beni amɛsaraa mɛi ni jie miishɛɛ kpo yɛ sane lɛ he be ko ni eho lɛ.
3 Gbɛ Nɔ ní Wɔɔtsɔ Wɔsaa Wɔhe: Wɔbaanyɛ wɔna ŋaawoo ni tsɔɔ bɔ ni ajeɔ Biblia mli nikasemɔ shishi lɛ yɛ nɔ ni aŋma ahɔ March 2006 Wɔ Maŋtsɛyeli Sɔɔmɔ lɛ mli lɛ mli, kɛ Reasoning wolo lɛ baafa 12 lɛ. Ekolɛ mɛi komɛi baahala akɛ amɛkɛ dɛhiɛmɔ wolo ko tamɔ Ani Obaasumɔ ní Ole Anɔkwale Lɛ? atsu nii. Kɛfata he lɛ, August 2007 Wɔ Maŋtsɛyeli Sɔɔmɔ lɛ baafa 3 lɛ kɛ ŋaawoo haa yɛ bɔ ni ajeɔ Biblia mli nikasemɔ shishi kɛ́ atee mɛi ni ŋɔ woji tɛtrɛbii lɛ eko lɛ asaramɔ. Abaato gbɛjianɔ koni asafoŋ onukpai kɛ asafoŋ sɔɔlɔi kɛ minitii 10 kɛmiimɔ 15 akwɛ kpee kɛha shiɛmɔyaa lɛ nɔ, ni esa akɛ asusu ŋaawoo kome loo enyɔ ni kɔɔ bɔ ni abaafee aje Biblia mli nikasemɔ shishi lɛ he loo afee he nɔkwɛmɔnɔ yɛ kpee nɛɛ shishi.
4 Ekã shi faŋŋ akɛ jeee mɔ fɛɛ mɔ baakpɛlɛ ni akɛ lɛ aje Biblia mli nikasemɔ shishi loo aya nɔ akɛ lɛ akase nii be kplaŋŋ. Akɛni Yehowa ji mɔ ni gbalaa mɛi ni tamɔ gwantɛŋi lɛ kɛbaa egbɛjianɔtoo lɛ mli hewɔ lɛ, esaaa akɛ enɛ tsĩɔ wɔnaa akɛ wɔkɛ mɛi aaakase nii. (Yoh. 6:44) Gbɛnaanii ni kã wɔnɔ lɛ jeee ní wɔdũ anɔkwale wui lɛ kɛkɛ, shi moŋ ni wɔkwra, ni wɔshwie nɔ ni ená shishifã lɛ nɔ nu, kɛ agbɛnɛ lɛ ní wɔkɛ mɛi ni hiɛ tsui ni ja lɛ akase Biblia lɛ. Kɛ́ wɔkɛ amɛ kase nii lɛ, no tsɔɔ akɛ wɔmiisɔmɔ ákɛ Nyɔŋmɔ hefatalɔi nitsulɔi.—1 Kor. 3:9.