Nyɛsaa Nyɛhe Jogbaŋŋ Kɛha Kaimɔ Lɛ

Mɛɛ miishɛɛ kɛ hegbɛ po eji nɛkɛ akɛ Kristo sɛɛnyiɛlɔi lɛ aaasaa amɛhe jogbaŋŋ kɛha gbɛkɛ ni wɔkɛbaakai Yesu Kristo gbele lɛ! (Luka 22:19) Mɛɛ gbɛjianɔ esa akɛ wɔto kɛsaa wɔhe kɛha Kaimɔ lɛ?

◼ Be kɛ He ni Abaafee Yɛ: Esa akɛ mɔ fɛɛ mɔ ale ŋmɛlɛtswaa nɔ ni abaafee Kaimɔ lɛ, kɛ he tuuntu ni abaafee yɛ. Kɛ́ asafoi fe ekome baakpe yɛ Maŋtsɛyeli Asa lɛ nɔ lɛ, ehe baahia ni ashɛ shi mra, ni ato tsui shi kɛshi kɛ́ akpá, akɛni be ni kamɔ kpeei be lɛ mli lɛ faaa tsɔ lɛ hewɔ. Esa akɛ ato gbɛjianɔ bɔni afee ni mɛi akafá babaoo kɛtsĩ gbɛ bɔ ni esaaa yɛ agbó ni atsɔɔ mli kɛbaa lɛ naa, nyiɛmɔhei, kɛ tsɔji amaamɔhe lɛ.

◼ Ninefɔ̃ɔ: Ani shiɛlɔi lɛ fɛɛ nine eshɛ ninefɔ̃ɔ wolo lɛ eko nɔ, ni amɛle nibii ni yɔɔ mli? Ani osaa ohe yɛ bɔ ni obaafee okɛ ninefɔ̃ɔ wolo lɛ aha lɛ he? Namɔ nine obaafɔ̃? Esa akɛ abɔ mɔdɛŋ ni aja ninefɔ̃ɔ wolo lɛ fɛɛ.

◼ Tsɔne ni Akɛbaawó Mɛi: Ekolɛ, ehe baahia ni ayawó mɛi ni yɔɔ wiemɔ lɛ he miishɛɛ kɛ nyɛmimɛi hii kɛ yei babaoo ni baaba Kaimɔ lɛ, loo aye abua amɛ yɛ gbɛi krokomɛi ni tamɔ nakai nɔ. Mɛɛ gbɛjianɔ ato koni akɛtsu mɛi nɛɛ ahiamɔ nii lɛ ahe nii?

◼ Okadi Nibii: Nyɛkwɛa jogbaŋŋ ni akɛ okadi nibii lɛ akaha, ja hulu enyɔ shi dã. Esa akɛ ato gbɛjianɔ koni akɛ okadi nibii lɛ eko ayaha mɔ fɛɛ mɔ ni afɔ lɛ mu ni bɛ gbɔmɔtsoŋ hewalɛ ni nyɛɛɛ aba kaimɔ lɛ shishi lɛ. Esa akɛ aná aboloo kɛ wein ní sa, ní aha efee klalo.—Kwɛmɔ February 15, 2003 Buu-Mɔɔ lɛ baafa 14-15, kuku 14, 17 lɛ.

◼ Maŋtsɛyeli Asa: Esa akɛ asaa asa lɛ nɔ fɛɛ fɛfɛo kɛtsɔ hiɛ. Esa ákɛ akɛ plɛtei, wein glasei kɛ okpɔlɔ ni sa kɛ enɔhaanɔ kpakpa aba asa lɛ nɔ ní áto amamɔ shi kɛtsɔ hiɛ. Kɛ́ jeee Maŋtsɛyeli Asa lɛ nɔ abaakpe yɛ lɛ, esa akɛ nyɛkwɛ akɛ ayɛ tsɔne ni awieɔ awoɔ mli ni gbɛɔ jogbaŋŋ bɔ ni baaha mɛi fɛɛ ni eba nifeemɔ lɛ shishi lɛ anu mɔ ni baaha wiemɔ lɛ gbee. Esa akɛ atsɔ hiɛ ahala mɛi ni baakwɛ shitaramɔ nɔ kɛ mɛi ni kɛ okadi nibii lɛ baaha lɛ koni atsɔɔ amɛ amɛnitsumɔi, nifeemɔ gbɛ ni sa ni esa akɛ amɛnyiɛ sɛɛ, kɛ bɔ ni ehe hiaa ni amɛha amɛhesaamɔ kɛ atadewoo afee nɔ ni yɔɔ hiŋmɛi nɔ ni bulɛ yɔɔ he.

Wɔmiisumɔ ni wɔ fɛɛ wɔsaa wɔhe akɛ aŋkroaŋkro kɛ agbɛnɛ ákɛ asafo kɛha Yesu Kristo gbele lɛ, ni ji nifeemɔ ni he hiaa fe fɛɛ nɛɛ Kaimɔ. Yɛ anɔkwale mli lɛ, Yehowa baajɔɔ mɛi fɛɛ ni jɛɔ amɛtsui mli amɛjieɔ hiɛsɔɔ kpo yɛ nibii fɛɛ ni Yehowa efee eha adesai lɛ he kɛtsɔ esuɔmɔ Bi, Yesu Kristo kpɔ̃mɔnɔ lɛ nɔ.