Ani Ofee Klalo Kɛha Skul?
1. Mɛɛ hegbɛ nyɛbaaná beni nyɛjeɔ skul shishi lɛ?
1 Kɛ́ kpaako nyɛbaaya skul jio, nyɛbaaje afi kroko shishi yɛ skul jio lɛ, nyɛ oblahii kɛ oblayei ni ji Kristofoi lɛ kɛ naagbai heei kɛ nɔnyɛɛ baakpe. Shi nyɛbaaná hegbɛ hu kɛye “anɔkwale lɛ he odase.” (Yoh. 18:37) Ani nyɛsaa nyɛhe jogbaŋŋ ni nyɛfee klalo akɛ nyɛbaaye odase?
2. Mɛɛ gbɛ̀i anɔ asaa bo kɛha skul?
2 Bɔni afee ni oye omanye yɛ shihilɛi fɛɛ amli lɛ, Yehowa, ofɔlɔi, kɛ tsulɔ anɔkwafo kɛ nilelɔ lɛ etsɔse bo jogbaŋŋ. (Abɛi 1:8; 6:20; 23:23-25; Efe. 6:1-4; 2 Tim. 3:16, 17) Kɛbashi amrɔ nɛɛ, ŋwanejee ko bɛ he akɛ ole kaai ni okɛbaakpe yɛ skul. Okɛ tsɔsemɔ ni Nyɔŋmɔ kɛha bo lɛ kɛ shihilɛ ni okɛbaakpe lɛ he nilee ní oyɔɔ lɛ asaa ohe kɛye odase. (Abɛi 22:3) Okɛ hiɛdɔɔ asusu gbɛtsɔɔmɔ kɛ Ŋmalɛ mli ŋaawoi ni akɛha yɛ Young People Ask wolokpoi enyɔ lɛ kɛ ŋaawoi krokomɛi ni kɔɔ enɛ he ni akalaa awoɔ Awake! lɛ mli daa lɛ ahe.
3. Mɛɛ gbɛ̀i anɔ obaanyɛ otsɔ oye odase?
3 Oshikpɔŋkuku nɛɛ baaha bo hegbɛ ni oye odase yɛ gbɛ̀i srɔtoi anɔ. Kɛ́ mɛi na ohesaamɔ ni yɔɔ hiŋmɛi nɔ, ojeŋba kɛ owiemɔ ni he tse, bulɛ ni ojieɔ lɛ kpo otsɔɔ oklasbii kɛ otsɔɔlɔi lɛ kɛ omɔdɛŋbɔɔ po yɛ skul lɛ, ni amɛna akɛ oyɛ shishitoo kpakpa yɛ shihilɛ mli lɛ, amɛbaabi bo akɛ, “Mɛni hewɔ esoro bo kwraa nakai lɛ?” (Mal. 3:18; Yoh. 15:19) Ekolɛ no baafee hegbɛ ní obaanyɛ okɛye odase, ni ogbala nibii ni oheɔ oyeɔ lɛ amli otsɔɔ amɛ. (1 Tim. 2:9, 10) Yɛ afi lɛ mli lɛ, okɛ naagbai tamɔ maŋhedɔɔ nifeemɔi kɛ gbijuji ahe saji baakpe. Kɛ́ abi bo nɔ̃ hewɔ ni okɛ ohe wooo mli lɛ, ani obaakɛɛ kɛkɛ akɛ, “Eteɔ shi ewoɔ mijamɔ lɛ; Yehowa Odasefonyo ji mi,” aloo obaaŋɔ hegbɛ lɛ kɛye Yehowa ni ji o-Tsɛ ni yɔɔ suɔmɔ lɛ he odase? Kɛ́ okɛ gbɛtsɔɔmɔ ni Yehowa kɛhaa lɛ saa ohe jogbaŋŋ lɛ, ebaaha onyɛ oye tsɔɔlɔi, onanemɛi skulbii, kɛ mɛi krokomɛi odase jogbaŋŋ.—1 Pet. 3:15.
4. Mɛni hewɔ oyɔɔ nɔmimaa akɛ obaanyɛ oye omanye beni oyaa skul lɛ?
4 Eyɛ mli akɛ skul ni obaaya ekoŋŋ lɛ baanyɛ aha otsui afã fioo moŋ, shi na ole akɛ mɛi babaoo miisumɔ ni amɛye amɛbua bo ni oye omanye beni oyaa skul lɛ. Kɛfata he lɛ, wɔ hu wɔyɛ miishɛɛ yɛ hegbɛ ni oná ni okɛbaaye mɛi odase yɛ oshikpɔŋkuku nɛɛ mli lɛ he. No hewɔ lɛ, ná ekãa ni ofee klalo kɛha skul!