Wɔkɛ Tsuishitoo Tsuɔ Wɔshiɛmɔ Nitsumɔ Lɛ
1. Mɛɛ gbɛ nɔ Yehowa eto etsui shi eha adesai?
1 Nyɔŋmɔ toɔ etsui shi waa ehaa adesai. (2 Mose 34:6; Lala 106:41-45; 2 Pet. 3:9) Maŋtsɛyeli shiɛmɔ nitsumɔ lɛ ni atsuɔ yɛ jeŋ fɛɛ lɛ ji nɔkwɛmɔnii titrii ni tsɔɔ akɛ ejɛɔ esuɔmɔ mli etoɔ etsui shi lɛ ateŋ ekome. Yehowa eha ashiɛ atsɔɔ adesai nɔ ni miihe ashɛ afii 2,000 sɔŋŋ, ni kɛlɛ eeya nɔ eegbala mɛi ni hiɛ tsui kpakpa lɛ kɛmiiba eŋɔɔ lolo. (Yoh. 6:44) Te wɔɔfee tɛŋŋ wɔkase Yehowa tsuishitoo lɛ yɛ wɔsɔɔmɔ nitsumɔ lɛ mli?
2. Mɛɛ gbɛi anɔ wɔɔtsɔ wɔto wɔtsui shi kɛ́ wɔmiitsu wɔshikpɔŋkuku lɛ mli nii?
2 Shĩa kɛ Shĩa Shiɛmɔ Nitsumɔ Lɛ: Kɛ́ wɔtee nɔ wɔshiɛ yɛ hei ni mɛi nyaaa wɔshiɛmɔ nitsumɔ lɛ he, ni ‘wɔfɔ̃ɔɔ’ lɛ, no tsɔɔ akɛ wɔmiikase Yehowa tsuishitoo lɛ. (Bɔf. 5:42) Wɔkɛ tsuishitoo miaa wɔhiɛ kɛ́ mɛi booo wɔ toi, amɛye wɔhe fɛo, ní amɛte shi amɛwo wɔ yɛ shiɛmɔ nitsumɔ lɛ mli lɛ. (Mar. 13:12, 13) Kɛfata he lɛ, wɔkãa he wɔkɛ tsuishitoo shwieɔ anɔkwale dumɔwui lɛ anɔ nu kɛ́ ewa kɛha wɔ po akɛ wɔnine aaashɛ mɛi ni yɔɔ wiemɔ lɛ he miishɛɛ lɛ anɔ yɛ shĩa.
3. Mɛni hewɔ esa akɛ wɔto wɔtsui shi kɛ́ wɔmiifee sɛɛkuu-kɛsaramɔi kɛ Biblia mli nikasemɔi lɛ?
3 Biblia Mli Nikasemɔi: Nidumɔ biɔ tsuishitoo. Wɔbaanyɛ wɔshwie nɔ nu ní wɔkwɛ nɔ, shi esa akɛ wɔmɛ ni dumɔnii lɛ diɛŋtsɛ ada. (Yak. 5:7) Nakai nɔŋŋ hu eji yɛ mumɔŋ dalɛ gbɛfaŋ, ebaa lɛ fiofio, ni ejɛɔ ŋɛlɛ kome nɔ kɛyaa ekroko nɔ. (Mar. 4:28) Ebaanyɛ ewa kɛha mɛi ni wɔkɛkaseɔ nii lɛ akɛ amɛaaŋmɛɛ apasa hemɔkɛyelii loo kusumii ni kɛ Ŋmalɛ lɛ kpaaa gbee lɛ ahe. Esaaa akɛ wɔbɔɔ mɔdɛŋ akɛ wɔɔha amɛya hiɛ yɛ mumɔŋ oyayaayai kɛtsɔ amɛnɔ ni wɔɔnyɛ koni amɛfee tsakemɔi lɛ nɔ. Esa akɛ wɔto wɔtsui shi, ní wɔha be ni sa ashwie mli bɔ ni baaha Nyɔŋmɔ mumɔ lɛ aná nikaselɔ lɛ tsui nɔ hewalɛ.—1 Kor. 3:6, 7.
4. Mɛɛ gbɛ nɔ tsuishitoo baanyɛ aye abua wɔ koni wɔye wɔwekumɛi ni heee yeee lɛ odase kɛmɔ shi?
4 Wekumɛi ni Heee Yeee: Eyɛ mli akɛ wɔshweɔ waa akɛ wɔwekumɛi ni heee yeee lɛ ale anɔkwale lɛ moŋ, shi esa akɛ wɔto wɔtsui shi ni wɔtao be ni sa ni wɔkɛ amɛ agba wɔhemɔkɛyeli lɛ he sane, ni wɔkwɛ jogbaŋŋ koni wɔkawie saji babaoo fe bɔ ni amɛaanyɛ mli amɛmɔ. (Jaj. 3:1, 7) Yɛ nakai beaŋ nɔŋŋ lɛ, esa akɛ wɔjeŋba aha amɛna mɛi ni wɔji, ní wɔfee klalo akɛ wɔkɛ amɛ baagba wɔhemɔkɛyeli lɛ he sane kɛ mlijɔlɛ kɛ gbeyeishemɔ. (1 Pet. 3:1, 15) Hɛɛ, kɛ́ wɔkɛ tsuishitoo tsu shiɛmɔ nitsumɔ lɛ, ebaamɔ shi jogbaŋŋ, ni wɔŋwɛi Tsɛ lɛ baaná wɔhe miishɛɛ.