Hegbɛi Babaoo ni Wɔkɛaajie Yehowa Yi
1. Mɛɛ gbɛjianɔtoo hee baaye abua wɔ ni ‘wɔjie Yehowa yi babaoo’?
1 Yɛ March ni ho nɛɛ mli lɛ, ato gbɛjianɔ hee ko ni baaha shiɛlɔi aná hegbɛ ni amɛkɛ ŋmɛlɛtswai 30 atsu gbɛgbalɔi awamɔ nitsumɔ lɛ yɛ March kɛ April mli daa afi kɛ be ni kpokpaa nɔkwɛlɔ lɛ ebasara amɛ lɛ hu mli. Kɛ́ kpokpaa nɔkwɛlɔ lɛ saramɔ lɛ je shishi yɛ nyɔɔŋ kome nɔ ni eyagbe naa yɛ ekroko mli lɛ, shiɛlɔi ni miisumɔ ni amɛkɛ ŋmɛlɛtswai 30 atsu nii lɛ baanyɛ ahala nyɔɔŋ mli ni amɛbaasumɔ ni amɛtsu gbɛgbalɔi awamɔ nitsumɔ lɛ. Gbɛgbalɔi awalɔi lɛ fɛɛ baanyɛ aya kpee ni kpokpaa nɔkwɛlɔ lɛ kɛ daa gbɛgbalɔi kɛ gbɛgbalɔi krɛdɛi lɛ baafee lɛ fɛɛ kɛgbe naa. Enɛ tsɔɔ akɛ, kɛ́ wɔnyɛɛɛ wɔshɛ ŋmɛlɛtswai 50 lɛ he lɛ, loloolo lɛ wɔbaanyɛ wɔkɛ ŋmɛlɛtswai 30 ni ataoɔ lɛ ‘ajie Yehowa yi babaoo’ akɛ gbɛgbalɔi awalɔi kɛ́ hooo kwraa lɛ, shii ejwɛ yɛ afi mli!—Lala 109:30; 119:171.
2. Mɛni mɛi ni kɛ amɛhe woɔ gbɛgbalɔi awamɔ nitsumɔ lɛ mli yɛ kpokpaa nɔkwɛlɔ lɛ saramɔ be lɛ mli lɛ baaná mli ŋɔɔmɔ?
2 Yɛ Kpokpaa Nɔkwɛlɔ lɛ Saramɔ Be lɛ Mli: Amrɔ nɛɛ, mɛi babaoo baanyɛ amɛkɛ amɛhe awo gbɛgbalɔi awamɔ nitsumɔ lɛ mli yɛ kpokpaa nɔkwɛlɔ lɛ saramɔ be lɛ mli ní amɛkɛ lɛ atsu nii koni amɛnyɛ amɛwowoo amɛhe hewalɛ. (Rom. 1:11, 12) Eka shi faŋŋ akɛ, gbɛgbalɔi awalɔi babaoo baaŋɔ gbi kome yɛ otsi lɛ mli koni amɛnyɛ amɛkɛ kpokpaa nɔkwɛlɔ lɛ aya shiɛmɔ. Mɛi ni yaa nitsumɔ yɛ otsi lɛ mli lɛ baanyɛ abi lɛ kɛ́ ekɛ amɛ baaya shiɛmɔ Hɔɔ loo Hɔgbaa. Kɛfata he lɛ, kwɛ bɔ ni ebaawo gbɛgbalɔi awalɔi lɛ hewalɛ akɛ amɛaafata daa gbɛgbalɔi kɛ gbɛgbalɔi krɛdɛi lɛ ahe kɛfee kpee ni akɛ amɛ feɔ lɛ!
3. Mɛni hewɔ Kaimɔ be lɛ ji be ni sa waa ni wɔkɛ wɔhe aaawo gbɛgbalɔi awamɔ nitsumɔ lɛ mli lɛ?
3 Yɛ March kɛ April Mli: Mɛi ni ŋɔ hegbɛ lɛ ni amɛkɛ amɛhe wo gbɛgbalɔi awamɔ nitsumɔ lɛ mli nyɔɔŋ kome yɛ Kaimɔ be lɛ mli be ko ni eho ní ha ŋmɛlɛtswai 30 ni ataoɔ lɛ, baanyɛ amɛkɛ “yijiemɔ afɔle” ni amɛkɛha lɛ toi enyɔ aha bianɛ! (Heb. 13:15) March kɛ April fɛɛ ji nyɔji ni sa waa ni wɔkɛaalɛɛ wɔsɔɔmɔ lɛ mli akɛ gbɛgbalɔi awalɔi. Afi fɛɛ afi yɛ nakai nyɔji lɛ amli lɛ, wɔkɛ wɔhe woɔ tafãa ko ni yɔɔ miishɛɛ waa mli kɛfɔ̃ɔ mɛi anine ni amɛba Kaimɔ lɛ shishi. Kɛfata he lɛ, akɛni mɛi babaoo yaa shiɛmɔ yɛ Kaimɔ be lɛ mli hewɔ lɛ, wɔbaanyɛ wɔkɛ shiɛlɔi srɔtoi atsu nii yɛ shiɛmɔ nitsumɔ lɛ mli. Kɛ́ agbe Kaimɔ lɛ naa lɛ, wɔyaa mɛi ni jie miishɛɛ kpo ni amɛba lɛ aŋɔɔ ekoŋŋ koni wɔtee amɛmiishɛɛ shi kɛha wiemɔ krɛdɛɛ ni abaaha lɛ. Ani otsui baatsirɛ bo ni oŋɔ hegbɛi hei nɛɛ ni okɛ ohe awo gbɛgbalɔi awamɔ nitsumɔ lɛ mli?—Luka 6:45.