Nyɛkasea Gbalɔi Lɛ—Yoel
1. Mɛɛ gbɛ nɔ wɔbaanyɛ wɔkase Yoel heshibaa lɛ yɛ wɔshiɛmɔ nitsumɔ lɛ mli?
1 Namɔ ji gbalɔ Yoel? Nɔ pɛ ni eha ale yɛ ehe ji akɛ, eji “Petuel bi.” (Yoel 1:1) Gbalɔ ni baa ehe shi nɛɛ ma Yehowa wiemɔ lɛ nɔ mi shi jeee enitsumɔ akɛ gbalɔ lɛ. Nakai nɔŋŋ yɛ nɔ najiaŋ ni wɔɔtao hiɛnyam loo ni wɔɔha mɛi ajwɛŋmɔ aba wɔnɔ yɛ wɔshiɛmɔ nitsumɔ lɛ mli lɛ, wɔgbalaa amɛjwɛŋmɔ kɛyaa Yehowa kɛ Biblia lɛ moŋ nɔ. (1 Kor. 9:16; 2 Kor. 3:5) Kɛfata he lɛ, sane ni wɔshiɛɔ lɛ woɔ wɔ hewalɛ. Mɛɛ Yoel gbalɛ lɛ mli saji komɛi baanyɛ aha wɔná ekãa kɛ hiɛnɔkamɔ ŋmɛnɛ?
2. Mɛni esa akɛ Yehowa gbi lɛ ni ebɛŋkɛ lɛ awo wɔ hewalɛ ni wɔfee?
2 “Yehowa Gbi lɛ Ebɛŋkɛ.” (Yoel 1:15): Eyɛ mli akɛ aŋmala wiemɔi nɛɛ afii akpei abɔ ni eho nɛ moŋ, shi wɔyɛ be ni amɛbaaná amɛnaagbee mlibaa lɛ mli. Je lɛŋ shihilɛ ni yaa nɔ efiteɔ, wɔwiemɔ lɛ toi ni abooo, kɛ wɔhe fɛo ni mɛi yeɔ yɛ wɔshikpɔŋkuku lɛ mli lɛ ji odaseyeli ni tsɔɔ faŋŋ akɛ jeŋ fɔŋ nɛɛ naagbee gbii lɛ eshɛ. (2 Tim. 3:1-5; 2 Pet. 3:3, 4) Kɛ́ wɔsusu bɔ ni naagbee lɛ ebɛŋkɛ lɛ he lɛ, ehaa wɔnaa akɛ esa akɛ wɔkɛ shiɛmɔ nitsumɔ lɛ aye klɛŋklɛŋ gbɛhe yɛ wɔshihilɛ mli.—2 Pet. 3:11, 12.
3. Mɛni hewɔ shiɛmɔ nitsumɔ lɛ he hiaa waa, titri lɛ akɛni wɔmiibɛŋkɛ amanehulu kpeteŋkpele lɛ?
3 “Yehowa Aaatsɔ Abobaahe Eha Emaŋ Lɛ.” (Yoel 4:16): Hosomɔ ni awie he yɛ kuku nɛɛ mli lɛ baanyɛ akɔ Yehowa fɔbuu kojomɔ yɛ amanehulu kpeteŋkpele lɛ mli lɛ pɛ he. Le ni wɔle akɛ Yehowa baahere etsuji anɔkwafoi lɛ yɛ nakai be lɛ mli lɛ shɛjeɔ wɔmii. (Kpoj. 7:9, 14) Beni wɔshiɛɔ ni wɔnaa bɔ ni Yehowa yeɔ ebuaa wɔ ni ewoɔ wɔ hewalɛ lɛ, ehaa wɔnáa hemɔkɛyeli ni mli wa, ni wɔnaa bɔ ni wɔɔfee wɔmia wɔhiɛ kɛkpee amanehulu kpeteŋkpele ni kã wɔhiɛ lɛ naa.
4. Mɛni hewɔ wɔbaanyɛ wɔha wɔmli afili wɔ ni wɔkɛ hekɛnɔfɔɔ akwɛ wɔsɛɛ be ni kã wɔhiɛ lɛ gbɛ lɛ?
4 Eyɛ mli akɛ mɛi komɛi kɛɔ akɛ sane ni Yoel gba lɛ ji awerɛho sane moŋ, shi ehaa Nyɔŋmɔ webii náa hiɛnɔkamɔ ni yɔɔ nyam akɛ abaakpɔ̃ amɛ. (Yoel 3:5) Belɛ, nyɛhaa wɔkɛ hekɛnɔfɔɔ akwɛa wɔsɛɛ be ni kã wɔhiɛ lɛ gbɛ, ni wɔkɛ ekãa ashiɛ Nyɔŋmɔ Maŋtsɛyeli lɛ he sanekpakpa lɛ beni wɔkɛ wiemɔi ni yɔɔ Yoel 2:23 ni kɛɔ akɛ: ‘Nyɛmli afilia nyɛ ní nyɛnyaa yɛ Yehowa, nyɛ-Nyɔŋmɔ lɛ, mli’ lɛ tsuɔ nii lɛ.