August Baafee Nyɔɔŋ ni Sa Kadimɔ Waa!

1. Mɛɛ ta krɛdɛɛ abaafã yɛ jeŋ fɛɛ be ni Nyɔŋmɔ Maŋtsɛyeli lɛ náa afii 100 yɛ be fioo ni kã wɔhiɛ lɛ mli lɛ?

¹ Yɛ be fioo ni kã wɔhiɛ lɛ mli lɛ, Nyɔŋmɔ Maŋtsɛyeli lɛ baaná afii 100. Enɛ hewɔ lɛ, ehi jogbaŋŋ akɛ wɔɔwo Yehowa hiɛ nyam kɛtsɔ tafãa krɛdɛɛ ko nɔ! Yɛ August mli lɛ, wɔbaaja dɛhiɛmɔ wolo hee ko ni yitso ji, Nɛgbɛ Wɔbaanyɛ Wɔná Hetoi Kɛhã Shihilɛ mli Sanebimɔi ni he Hiaa Waa lɛ Yɛ? lɛ yɛ jeŋ fɛɛ. Dɛhiɛmɔ wolo nɛɛ baawo mɛi fɛɛ ni baakane lɛ hewalɛ ni amɛtaoɔ sanebimɔi ni he hiaa waa lɛ ahetoo yɛ Biblia lɛ mli, ni ebaahã amɛna bɔ ni jw.org lɛ baanyɛ aye abua amɛ.

2. Te wɔɔfee tɛŋŋ wɔfata he ni akɛ ‘oshebɔɔ akafo Yehowa’ yɛ August mli?

² Wɔkɛ Oshebɔɔ Baakafo Yehowa: Bɔ ni afee ni shiɛlɔi anyɛ alɛɛ amɛsɔɔmɔ lɛ mli yɛ August mli lɛ, ato gbɛjianɔ krɛdɛɛ ko kɛhã mɛi fɛɛ ni baasumɔ ni amɛkɛ amɛhe awo gbɛgbalɔi awamɔ nitsumɔ lɛ mli lɛ. Yɛ nakai nyɔɔŋ lɛ nɔ lɛ, shiɛlɔi ni abaptisi amɛ lɛ baanyɛ amɛkɛ ŋmɛlɛtswai 30 atsu gbɛgbalɔi awamɔ nitsumɔ lɛ. Akɛni Sohaa, Hɔɔ, kɛ Hɔgbaa enumɔ yɔɔ August mli hewɔ lɛ, shiɛlɔi ni tsuɔ heloonaa nitsumɔ yɛ otsi lɛ mli lɛ ateŋ mɛi babaoo baanyɛ atsu gbɛgbalɔi awamɔ nitsumɔ lɛ. Kɛfata he lɛ, oblahii kɛ oblayei baanyɛ amɛkɛ amɛhe awo gbɛgbalɔi awamɔ nitsumɔ lɛ mli yɛ August gbɛhamɔ be lɛ mli. Kɛ́ oyɛ Biblia mli nikaselɔ ko ni miiya ehiɛ waa loo obi ko ni baasumɔ ni etsɔ shiɛlɔ lɛ, okɛ onukpai akuu lɛ saji ahe gbɛjianɔtolɔ lɛ agba he sane amrɔ nɔŋŋ. Ebaafee miishɛɛ waa akɛ mɛi ni tamɔ nɛkɛ baafata wɔhe akɛ shiɛlɔi yɛ nyɔɔŋ ni sa kadimɔ waa nɛɛ mli! Eyɛ mli akɛ kɛ́ gbɛgbalɔi babaoo shɛ ŋmɛlɛtswai abɔ ni ataoɔ yɛ amɛdɛŋ yɛ afi mli lɛ he dani August shɛ lɛ, amɛjɔɔ amɛhe moŋ, shi amɛbaanyɛ amɛto gbɛjianɔ ni amɛná tafãa krɛdɛɛ nɛɛ mli gbɛfaŋnɔ kɛmɔ shi. Amrɔ nɛɛ ji be ni esa akɛ wekui asusu bɔ ni amɛbaafee amɛfata he ni akɛ ‘oshebɔɔ akafo Yehowa’ yɛ August mli lɛ he.​—Ezra 3:11; Abɛi 15:22.

3. Mɛni ji wɔgbɛkpamɔ kɛhã tafãa krɛdɛɛ nɛɛ?

³ Eyɛ mli akɛ wɔkɛ wɔhe ewo tafãi ni tamɔ nɛkɛ mli yɛ bei ni eho lɛ amli moŋ, shi wɔgbɛkpamɔ ji akɛ enɛ baafee nɔ ni sa kadimɔ waa. Ani wɔbaanyɛ wɔná ŋmɛlɛtswai, shiɛlɔi, kɛ gbɛgbalɔi awalɔi ayibɔ ni fa fe fɛɛ yɛ August mli? Be ni wɔmuɔ afi 2014 sɔɔmɔ afi lɛ naa lɛ, eba akɛ Yehowa baajɔɔ mɔdɛŋ ni ewebii ni yɔɔ jeŋ fɛɛ lɛ bɔɔ koni amɛhã August nyɔɔŋ lɛ afee nyɔɔŋ ni aye odase yɛ mli fe fɛɛ lɛ nɔ!​—Mat. 24:14.